Iyak nang iyak, pahiwatig na ayaw ipaalam sa ibang tao na mahina

ni Seigusmundo Del Mundo - @Panaginip, salamin ng inyong buhay | January 18, 2021

Salaminin natin ang panaginip ni Eva na ipinadala sa Facebook Messenger.

Dear Professor,

Madalas akong umiiyak sa panaginip ko na parang totoo tungkol sa relasyon namin ng fiancée ko. Ano ang ibig sabihin nito?

Ang isa ko pang panaginip ay ang isang dangkal na alupihan ay hinahabol ko para patayin at napatay ko ‘yun. Ano ang ibig sabihin ng alupihan sa panaginip?

Naghihintay,

Eva

Sa iyo, Eva,

Alam mo ba kung bakit sa panaginip mo ay umiiyak ka? Ito ang katotohanan kung bakit naiiyak sa panaginip. Tanggapin mo ang katagang “The truth will set you free,” kumbaga, kapag natanggap mo ang katotohanan, sasaya at liligaya ka, gayundin, hindi ka na maiiyak pa.

Nagkukunwari kang malakas, nagkukunwari kang kaya mo ang mga problema mo, nagkukunwari kang iba ka sa lahat. Ito ang nangyayari sa iyo sa tunay na buhay dahil ayaw mong ipakita sa iyong fiancée at mga tao na ikaw ay mahina.

Kahit sa totoo lang, hirap na hirap ang iyong kalooban kung saan ikaw ay labis na nasasakal sa nangyayari sa iyong love life. May panahon ang lahat ng bagay, iha. Ito ay batas ng kapalaran na hindi kayang labanan ng sinuman.

Narinig mo na ba ang ang lumang aral sa buhay, pero hanggang ngayon ay talab pa rin na paulit-ulit na nararanasan ng bawat tao? Ito ay ang sinasabing “May panahon ng pag-iyak at panahon ng pagtangis,” kung saan sa buhay mo ngayon, kasalukuyan nang nagaganap ang nasabing panahon.

Narinig mo na rin ba na nahihinog ang mga pangyayari tulad ng pagkahinog ng mga prutas? Ibig sabihin, hinog na ang panahon para mapasaiyo ang panahon kung saan dapat kang maiyak. Pero pilit mong nilalalaban dahil muli, nagkukunawari kang malakas, pero sa totoo lang, ikaw ay mahina.

Dahil hindi naman naaawat ang takbo ng mga panahon, wala ka ring magagawa para labanan ang panahon ng pagtangis at dahil kailangang ito ay mangyari, sa panaginip, tiyak na maiiyak ka.

Nagbababala ang nararanasan mo na lalo mong pinahihirapan ang iyong sarili, kaya ang payo ay nagsasabing umiyak ka nang umiyak. Kung ayaw mong makita ninuman ang pag-iyak mo, pumasok ka sa isang silid o CR at doon ka umiyak nang umiyak.

Narinig mo rin ba na sa pag-iyak ng tao ay gumiginhawa ang kanyang pakiramdam at kapag maginhawa ang pakiramdam ng tao, ang mga solusyon sa bagay na nagpapagulo sa kanyang isip ay isa-isang maglalabasan? Oo, masosolusyunan mo na ang mga gumugulo sa isipan mo na nagsasabing, lalaya ka sa mga nagpapahirap sa sarili mo.

Ang alupihan sa panaginip ay nagbababala ng sakit o karamdaman na sanhi ng mikrobyo na papasok sa katawan ng tao. Dahil dito, ikaw ay pinapayuhan na palakasin ang iyong immune system dahil kapag malakas ang resistensya ng isang tao, hindi siya tatablan ng masamang epekto ng nakapasok na mikrobyo sa kanyang katawan.

Hanggang sa muli,

Professor Seigusmundo del Mundo

Pahiwatig na ‘di nag-iisa sa mga paghihirap kahit single mom

ni Seigusmundo Del Mundo - @Panaginip, salamin ng inyong buhay | January 17, 2021

Salaminin natin ang panaginip ni Jasmine na ipinadala sa Facebook Messenger.

Dear Professor,

Naguguluhan ako sa aking panaginip, kaya naisipan kong sumangguni sa inyo. Ang totoo, noong nakaraang linggo pa ito pero hindi ko talaga makalimutan.

Nanaginip ako na nasa isang parang gubat ako, mapuno at maaliwalas. May nakita akong malaki at magandang Lotus flower na nakasara pa. Nu’ng hahawakan ko ito, biglang may lumiwanag nang husto at halos wala akong makita. Tapos, medyo humina ‘yung liwanag at kaya ko nang mag-adjust at du’n ko nakita na nakabukas na pala ‘yung Lotus at sa gitna nu’n, nakatayo si Jesus. Inaabot Niya sa akin ang kamay Niya at napakaaliwalas ng mukha Niya.

Umiiyak ako sa saya nang makita Siya, lalo na nang ngumiti Siya. Nang aabutin ko na ang kamay Niya, bigla akong nagising dahil sa tawag ng mama ko.

Hanggang ngayon, nahihiwagaan ako sa kahulugan nito. Ano ang ibig sabihin ng panaginip ko? Sa ngayon, ako ay single mom at 3-anyos ang anak ko at nakatira ako ngayon sa mama ko.

Naghihintay,

Jasmine

Sa iyo, Jasmine,

Mahirap talagang maging single parent dahil madalas ay malungkot, nangunguilala at napapaiyak na lang mag-isa. Pero kailangan mong maging magpakatatag dahil sa kaisa-isang minamahal mong anak.

Sa iyong panaginip, ang mensahe ni Jesus ay kasama Siya sa mga paghihirap mo. Mahirap paniwalaan, pero ang nasabing katotohanan ay makikita sa sikat na sikat na awitin noon at hangang ngayon na kapag naririnig ng mga tao, hindi nila maiwasang tumigil sa anumang kanilang pinagkakaabalahan dahil ang awit ay tungkol sa kanilang buhay.

Ito ay ang awiting “Footprints in the Sand.” Sa awiting ito, para bang sinasabi na ang nakikitang bakas ng mga paa sa buhangin ay kay Jesus dahil ang totoo, binbuhat ka Niya. Kumbaga, pasan ka ni Jesus, kaya ito rin ay nagsasabing bahagi Siya ng paghihirap ng bawat tao habang sila ay naglalakad sa landas ng kanilang buhay na mahirap na lakaran.

Totoo man ito o hindi, masarap pakinggan ang nasabing awitin dahil gumagaan ang mga pasanin ng tulad mong single parent. Mas maganda kung aktuwal na marinig ng iyong mga tainga ang lyrics ng nasabing kanta dahil madarama mo talaga na si Jesus na iyong Panginoon ay nagmamahal sa tulad mong nag-iisa sa pakikibaka sa buhay.

Hanggang sa muli,

Professor Seigusmundo del Mundo

Babala na makakabalikan ang ex-BF kahit may asawa na

ni Seigusmundo Del Mundo - @Panaginip, salamin ng inyong buhay | January 15, 2021

Salaminin natin ang panaginip ni Carmela na ipinadala sa Facebook Messenger.

Dear Professor,

Madalas kong mapanaginipan ang ex-boyfriend ko, pero may asawa na ako ngayon at dalawa na ang anak ko. Bakit ko pa napapanaginipan ang ex-boyfriend kong ito?

Naghihintay,

Carmela

Sa iyo, Carmela,

Ang mga taong mahahalaga sa buhay natin, sila ang madalas na ating napapanaginipan at ang mga taong walang halaga para sa atin ay malabo nating mapanaginipan.

Sa ganitong pananaw, ayon sa panaginip mo, ang iyong ex-boyfriend ay may halaga pa rin sa iyo. Bakit kaya siya ay may halaga pa rin sa iyo?

Ito ay dahil makikitang sa ngayon, maaaring hindi ka masaya sa iyong buhay may-asawa. Puwedeng hindi ka gaanong binibigyan ng oras ng iyong asawa dahil sa iba’t ibang dahilan tulad ng pagod siya sa paghahanapbuhay, puwede ring siya ay may personal na problema, kaya hindi ka masyadong napahahalagahan.

Pero alam mo, iha, sa huling datos hinggil pag-aaral sa marriage life ng mga Pinoy, ang pangunahing dahilan ay baka hindi ka maniwala na ang asawang lalaki ay sobra ang tiwala sa sarili sa ganitong mga paraan:

• Tiwalang-tiwala ang lalaki na siya ay magaling, ibig sabihin, wala nang mahahanap na mas magaling sa kanya ang kanyang misis.

• Kampanteng-kampante siya na dahil binubuhay niya ang kanyang pamilya, sapat na ang ganu’n para sa kanyang asawa.

• Tiwala rin siyang hindi siya ipagpapalit ng kanyang misis sa iba dahil akala niya ay masaya ang kanyang asawa.

• Kampanteng-kampante ang lalaki na ang kanyang misis ay nasisiyahan sa kanilang pagtatalik. Ito ang kadasalang maling akala ng mga lalaki kung saan dahil sa tingin nila ay nasisiyahan ang asawa ay okey na ang ganu’n.

• Tiwalang-tiwala rin ang lalaki na dahil may mga anak na siya sa kanyang misis, ang babae ay hindi na sasama sa ibang lalaki.

• Dahil sa sila ay kasal, walang magaganap na muling pag-aasawa.

Ito ang pinakamalaking pagkakamali ng asawang lalaki at maging ang babae kung saan dahil kasal na siya, hindi na maghahanap ang kanyang asawa ng isa pang pag-aasawa.

Kaya, Carmela, tulad ng naipaliwanag na, nagbababala ang panaginip mo na puwede pa kayong magkabalikan ng ex-boyfriend mo kahit ikaw ay may asawa na. Ito ay isa ring trending ngayon, kaya lang, ito ay naililihim ng karamihan. Pero may isa pang trending sa modernong panahon na ito kung saan ang parehong may asawa ay nagiging magkarelasyon.

Dahil ito ay babala at ang babala ay puwede pang iwasan, nasa iyo na kung magiging matibay at matatag ka upang habambuhay mong mapanatiling buo ang iyong pamilya.

Hanggang sa muli,

Professor Seigusmundo del Mundo