Paggunita sa World War II... Russia vs. Ukraine, 3 days tigil-putukan

ni Jenny Rose Albason @World News | May 10, 2026

Inanunsyo ni US President Donald Trump ang tatlong araw na ceasefire sa pagitan ng Russia at Ukraine mula Mayo 9 hanggang Mayo 11 bilang bahagi ng paggunita ng Russia sa pagtatapos ng World War II.

Sa kanyang post sa Truth Social, sinabi ni Trump na kabilang sa ceasefire ang pansamantalang pagtigil ng lahat ng opensibang militar, gayundin ang pagpapalitan ng tig-1,000 bilanggo mula sa bawat bansa.

“Hopefully, it is the beginning of the end of a very long, deadly, and hard-fought war,” ani Trump.

Nauna nang inihayag ni Trump na may isinasagawang negosasyon para sa isang pansamantalang tigil-putukan matapos ang kanyang pakikipag-usap kay Vladimir Putin noong Abril 29.

Kasabay nito, nagdeklara rin ang Russia ng sarili nitong ceasefire mula Mayo 8 hanggang Mayo 9 bilang bahagi ng paggunita nito sa tagumpay ng dating Soviet Union laban sa Nazi Germany noong World War II.

Samantala, iminungkahi ng Ukraine ang isang open-ended ceasefire na nagsimula noong Martes, at nanawagan sa Russia na sumunod sa naturang hakbang.

Bukod dito, dumating na sa Miami ang pangunahing negotiator ng Ukraine na si Rustem Umerov para sa serye ng pagpupulong kasama ang mga kinatawan ng Estados Unidos.

Gayunpaman, nananatiling hindi nagkakasundo ang magkabilang panig, lalo na sa usapin ng Donetsk region sa silangang bahagi ng Ukraine. Patuloy ding inaakusahan ng Moscow at Kyiv ang isa’t isa ng paglabag sa mga naunang deklarasyon ng ceasefire.

Russia at Ukraine, wala pa ring napagkasunduan

by Jenny Rose Albason @World News | February 20, 2026

Photo: Ukrainian President Volodymyr Zelenskyy - SS

Walang magandang resulta ang pinakahuling pagpupulong ng mga kinatawan ng Russia at Ukraine na ginanap sa Switzerland, na inorganisa ng Estados Unidos. Ito na ang ikatlong negosasyon ngayong taon, matapos ang unang pulong na ginanap noong Enero sa Abu Dhabi.

Ayon kay Ukrainian President Volodymyr Zelenskyy, hindi naging madali ang mga negosasyon. Inihayag niya ang pahayag matapos makausap ang kanyang negotiating team na dumalo sa pulong. Una niyang inakusahan ang Russia na hindi sumasang-ayon sa ilang napag-usapan sa negosasyon.

Bagama’t nagkaroon ng ilang diskusyon, kabilang ang posibilidad na ipasakamay ng Russia ang mga sinakop nitong teritoryo sa Ukraine, walang konkretong kasunduan ang naabot. Naniniwala si Zelenskyy na sa mga susunod na araw ay magkakaroon muli ng mga pag-uusap sa pagitan ng dalawang panig.

Ukraine binomba ng Russia, 4 dedo 9 pa sugatan

by Jenny Rose Albason @World News | February 11, 2026

Photo: Kharkiv Region - Ukraine's DSNS Emergencies Service

Patay ang apat na sibilyan sa pinakabagong malawakang aerial assault ng Russia sa Ukraine, kabilang ang isang babae at ang kanyang 10‑anyos na anak sa bayan ng Bohodukhiv sa Kharkiv region. Bukod dito, nasugatan ang siyam na iba pang mga tao at dinala sa ospital para gamutin ang mga ito.

Ayon sa ulat ng Ukrainian air force, naglunsad ang Russia ng hindi bababa sa 11 ballistic missiles at 149 drones sa isang magdamag na serye ng pag‑atake sa iba’t ibang rehiyon ng bansa. Sa mga naturang drone at missile, maraming bahagi ng residential areas, gas pipelines, at power grid ang nasira, na nagdulot ng malawakang pagkasira ng imprastruktura at pagkakababad sa madaming residente.

Ang air defenses ng Ukraine ay nakapag‑intercept o nakapigil ng malaking bahagi ng mga drone, ngunit hindi iyon sapat upang maiwasan lahat ng pagbasag sa mga sistema ng enerhiya at mga tirahan.