Sasakay sa motorcycle taxi, dapat may sariling helmet

ni Ronalyn Seminiano Reonico | October 18, 2020

Inanunsiyo ni Interior Secretary Eduardo Año nitong Linggo na required ang mga motorcycle taxis na maglagay ng barrier sa kanilang sasakyan kapag maaari nang magbalik-pasada ang mga ito upang mapigilan ang pagkalat ng COVID-19.

Hinikayat din ni Año ang mga commuters na gumamit ng sariling helmet.

Aniya, “Sa motorcycle taxi ay talagang requirement ‘yung barrier kasi hindi 'yan magkakakilala, eh. “At saka 'yung paggamit ng helmet, ini-encourage natin 'yung mga commuters, sana meron kayong sariling helmet para hindi kayo manghihiram.”

Kailangan ding i-disinfect ng mga motorcycle taxi drivers ang mga helmet na ipahihiram nila sa kanilang pasahero. Malaking tulong din aniya sa mga commuters ang pagbabalik-operasyon ng mga motorcycle taxis.

Saad ni Año, “The motorcycle taxi plus the appropriate barrier naman ay additional 'yan. Napakalaking tulong niyan sa ating mga commuters.”

Samantala, pinag-aaralan na ng Inter-Agency Task Force for the Management of Infectious Diseases (IATF) na payagan na ang operasyon ng mga motorcycle taxis.

Magkasintahan, arestado sa nakaw na sasakyan

ni Ronalyn Seminiano Reonico | October 18, 2020

Inaresto ng Philippine National Police Highway Patrol Group (PNP-HPG) ang magkasintahang nagnakaw umano ng sasakyan ng kanilang business partner noong Sabado sa magkahiwalay na operasyon.

Kinilala ng Region 4A PNP-HPG ang mga suspek na sina Frank Ganabe at Seiza Armada. Si Ganabe ay naaresto ng awtoridad sa Santa Rosa, Laguna habang si Armada naman ay sa General Trias, Cavite.

Ayon sa PNP-HPG, ang sasakyan ng magkasintahan ay nakapangalan sa kanilang business partner na ninakaw umano ng dalawa.

Saad ni Police Captain Charlie Reyes, “Nag-conduct kami ng operation and then it so happens na nakita namin sila sa Santa Rosa. Nakuha namin ‘yung sasakyan na subject ng complaint sa Las Piñas.”

Itinanggi naman ng mga suspek na ninakaw nila ang sasakyan dahil mayroon umano silang verbal agreement na ang kanilang suweldo ay mapupunta bilang pambayad sa kanilang business partner.

Saad ni Ganabe, “Hindi lang namin nakuha ‘yung mga warrant or ‘yung mga subpoena due to our negligence kasi naglipat po kami ng bahay kasi natakot po kami doon sa complainant. “Kung ano po ‘yung buwan na hindi namin tinanggap ‘yung suweldo namin, nag-assume po kami na ‘yun po ‘yung ibinayad namin.”

Samantala, nasa kustodiya na ng PNP-HPG 4A ang mga suspek.

70 katao, patay sa landslide

ni Ronalyn Seminiano Reonico | October 18, 2020

Nawawala ang 22 military personnel sa central province ng Quang Tri, Vietnam dahil sa landslide nitong Linggo.

Tinatayang aabot na sa 70 katao ang namatay dahil sa matinding pag-ulan sa central Vietnam simula pa noong mga unang araw ng Oktubre.

Natabunan ng landslide ang army camp ng Vietnam's 4th Military Region, ayon sa Vietnam News Agency.

Saad naman ni Deputy Defence Minister Phan Van Giang, "We had another sleepless night."

Walong katao ang nakaligtas sa insidente habang hinihinalang natabunan ang iba pang nawawalang personnel.

Tatlong katawan naman ang nahukay sa paghahanap sa mga nawawala.

Samantala, inaasahang magpapatuloy ang matinding pag-ulan sa central Vietnam hanggang sa Miyerkules, ayon sa weather agency.