4 pang staff ng Fabella, positibo sa COVID-19

ni Ronalyn Seminiano Reonico | October 25, 2020

Positibo sa COVID-19 ang apat pang personnel ng pinakamalaking maternity ospital sa bansa, ayon sa Philippine Red Cross matapos itong magsagawa ng coronavirus tests sa mga empleyado ng Dr. Jose Fabella Memorial Hospital.

Pitong doktor ng naturang ospital ang unang naiulat na positibo sa COVID-19, ayon sa kanilang medical center chief na si Dr. Esmeraldo Ilem at Red Cross chairman Sen. Richard Gordon.

Saad ni Gordon, "Nakadiskubre pa tayo ng apat na may sakit. At 'di natin puwedeng pigilin 'yan, ‘di ho natin matitiis 'yan. Kahit papaano, pipigain natin para makapag-test tayo sapagkat 'pag ‘di tayo nag-test, lalong marami ang mapapahamak.”

Ayon naman kay Ilem, karamihan sa mga naturang empleyado ay asymptomatic at isinailalim na sa isolation.

Aniya, "Natutuwa po ang personnel namin dahil at least, nalaman po nila ang kanilang status. 'Di na po sila nangangamba... Lumuwag po ang kalooban nila, ‘di na po sila takot.”

Nagsagawa na ng disinfection sa pasilidad ng ospital at ayon din kay Ilem, 600 nanay ang kasalukuyang naka-admit dito.

Aniya, "Lahat po ng exposed, ipate-test po muna namin bago ma-discharge.”

Libre ang isinagawang COVID-19 testing ng Red Cross sa mga frontliners ng ospital sa kabila ng minsang pagtigil nito dahil sa P930 million utang ng PhilHealth, ayon kay Gordon.

Aniya, "Ba't nila nababayaran ‘yung mga hotel, pero ‘yung tests, ‘di nila mabayaran. Samantalang ‘pag binayaran nila ang mga tests, ‘di na tayo kailangang mag-hotel, ‘di nasusuya ang mga tao na umabot ng 6, 7 araw ang testing nila.”

Pangako naman ng PhilHealth, babayaran din nila ang utang sa PRC.

Pulis na nakapatay ng drug suspect, kakasuhan

ni Ronalyn Seminiano Reonico | October 20, 2020

Ipinag-utos ng hepe ng Manila Police District (MPD) na sampahan ng kaso ang isang pulis na nakapatay ng suspek na sangkot sa droga sa loob ng Station Drug Enforcement Unit (SDEU) office sa Moriones Police Station, Tondo, Manila.

Ayon kay MPD Director Brig. Gen. Rolando Miranda, pinaiimbestigahan na niya sa General Assignment and Investigation Section ang insidente.

Aniya, “Pinaimbestigahan ko na ito sa General Assignment and Investigation Section natin pati ‘yung criminal and administrative culpability nitong si Joel kung meron man. At siya ay pinakakasuhan ko na rin sa City Prosecutor’s Office dahil sa pagkakapatay dito kay John Doe, ‘yung nahuli nilang suspect.”

Ayon sa ulat, inaresto ni Cpl. Joel Calagaran ang isang hindi pa nakikilalang lalaki sa Chacon Street, Tondo noong Linggo nang gabi dahil umano sa kasong possession of illegal drugs. Nang dinala umano ang suspek sa SDEU office, bumunot ito ng improvised caliber 22. na nakatago sa underwear nito upang barilin si Calagaran.

Nang agawin ni Calagaran ang baril, aksidenteng naiputok nito umano sa mukha ng suspek na kaagad namang isinugod sa ospital ngunit idineklara ring dead on arrival.

Saad ni Miranda, “Pati administrative lapses, pinatitingnan ko kasi kasama ‘yan sa operational procedure natin na you will frisk the suspect at iha-handcuff mo ‘yan sa likod. ‘Yun ang instruction ko. Walang naka-handcuff sa harap.

“Sa tingin ko, may pagkukulang ang ating pulis although sa criminal liability ay there is the benefit of the doubt na ibinibigay ko sa kanila na ‘yun talaga ay nangyari. Pero doon sa administrative lapses nila, sa operational procedure, hindi ko maintindihan kung bakit hindi nila kinapkapan at hindi nila thoroughly na-frisk ‘yung tao at hindi naka-posas. Bakit ganu’n?”

PNP official na nagkritikal sa pagsabog ng chopper, pumanaw na

ni Ronalyn Seminiano Reonico | October 20, 2020

Pumanaw na ang dating Philippine National Police Director for Comptrollership na si Police Maj. Gen. Jose Maria Ramos na isa sa mga high-ranking officials ng PNP na naging kritikal sa helicopter crash noong Marso 5.

Kinumpirma ng Philippine National Police (PNP) spokesperson na si Col. Ysmael Yu ang balitang pagpanaw ni Ramos.

Aniya, “The PNP is saddened by this news, on behalf of CPNP PGen Cascolan, the PNP extends its condolences to the family and to PMA Sinagtala Class of 1986. Kagabi siya pumanaw.”

Na-comatose si Ramos simula noong naganap ang helicopter crash. Kabilang sina Retired Police General Archie Francisco Gamboa at former PNP Spokesman Brig. Gen. Bernard Banac sa 8 police officials sakay ng 2-year-old Bell 429 chopper nang mag-crash ito sa Laguna.