Klase sa Sorsogon, suspended dahil sa Bagyong Quinta

ni Ronalyn Seminiano Reonico | October 25, 2020

Kanselado ang klase sa lahat ng antas sa Sorsogon simula ngayong Lunes hanggang Martes, October 26-27, dahil sa bagyong Quinta.

Sa inilabas na executive order ni Gov. Chiz Escudero, mababasang: “Ordering the suspension of classes in all levels in public and private schools in the province for October 26 and 27, 2020 and for other purposes.”

Ayon sa PAGASA, inaasahang magla-landfall si Quinta sa Catanduanes-Albay kaninang hapon o ngayong gabi.

PBA player, positibo sa COVID-19 , game kanselado

ni Ronalyn Seminiano Reonico | October 25, 2020

Inanunsiyo ng Philippine Basketball Association (PBA) sa ginanap na press conference ngayong Linggo nang umaga na positibo sa COVID-19 ang isang manlalaro sa PBA bubble.

Inilipat na umano ang player mula sa Blackwater Elite sa Athletes' Village kung saan isasailalim ito sa isolation. Naka-isolate na rin ang buong team ng Blackwater, ayon kay PBA Commissioner Willie Marcial.

Ipinost ng PBA sa Twitter ang pahayag ni Testing Czar Secretary Vince Dizon sa press conference na: "‘Yung ating PBA player na may lumabas na positive result kagabi, na-isolate na. We're asking the PBA to conduct an Antigen and RT-PCR for the player who tested positive."

Isang referee naman ng PBA bubble ang nagpositibo kamakailan sa COVID-19 sa initial test at nagnegatibo sa sumunod na testing.

Pahayag ni Dizon, "Ngayon lumabas both ‘yung antigen and RT-PCR test, negative… The index case (referee) proved to be negative (after initially testing positive).

“Kailangang intindihin natin, walang perfect na test, puwedeng magkamali. Ang importante, meron tayong protocol para i-address ang situation na ganito.”

Sumailalim din sa COVID-19 testing ang lahat ng naging close contacts ng naturang referee.

Samantala, dahil sa insidente, kinansela ang laban ng Blackwater at Rain or Shine ngayong araw ngunit natuloy pa rin ang Manila Clasico game sa pagitan ng Ginebra San Miguel at Magnolia Hotshots nitong hapon.

VP Leni at staff, naka-quarantine

ni Ronalyn Seminiano Reonico | October 25, 2020

Inanunsiyo ni Vice President Leni Robredo na naka-quarantine siya at ang ilan niyang staff matapos silang ma-expose sa COVID-19 positive.

Aniya, "Very close contact kami pero sumunod naman kami sa protocols.

"Tingin ko, salbado naman kami pero kailangan nating sumunod sa protocol para sigurado lang."

Wala naman daw silang nararamdamang kahit na anong sintomas ng COVID-19.

Nagsagawa si Robredo ng ilang community projects ngayong linggo kabilang na ang pagbubukas ng community learning hubs sa Pasig at Taytay, Rizal para sa mga estudyanteng nangangailangan ng tulong sa kanilang blended learning classes.

Saad ni Robredo, "Ito, hindi staff pero nakasama namin this week sa ikot. Kasama namin buong umaga pero wala namang may gusto nito."

Sumailalim din sa quarantine ang kanyang chief of staff na si Undersecretary Francisco Dy.

Magpapa-swab test din umano si Robredo at ang kanyang staff.