Sinehan, parke, video arcades, bubuksan na

ni Ronalyn Seminiano Reonico | February 12, 2021

Inaprubahan na ng Inter-Agency Task Force on Emerging Infectious Diseases (IATF) na taasan sa 50% mula sa 30% capacity ang mga religious gatherings sa mga lugar na nasa ilalim ng general community quarantine (GCQ).

Pahayag ni Presidential Spokesperson Harry Roque, “Starting February 15, pinapayagan na po ang religious gatherings up to 50% of the seating or venue capacity.”

Ayon din kay Roque, sa mga GCQ areas ay maaari na rin umanong magbalik-operasyon ang mga sumusunod:

• Driving schools

• Traditional cinemas

• Video at interactive-game arcades

• Libraries, archives, museums, cultural centers

• Meetings, incentives, conferences at exhibitions

• Limited social events sa mga credited establishments ng Department of Tourism

• Limited tourist attractions katulad ng mga parke, natural sites at historical landmarks

Saad ni Roque, “These businesses/industries shall comply with the strict observance of minimum public health standards set by the Department of Health."

Aniya pa, "Alinsunod ito sa katotohanan na kailangan nating magbukas pa ng ekonomiya dahil kinakailangang magkaroon ng karagdagang hanapbuhay ang ating mga kababayan.

"Iyong mga nabuksan nating industriya, marami pong nagtatrabaho r'yan na matagal nang walang hanapbuhay. Ngayon po magkakahanapbuhay na silang muli."

Bukod sa Metro Manila, ang Cordillera Administrative Region (CAR), Batangas, Tacloban City, Davao City, Davao del Norte, Lanao del Sur at Iligan City ay isinailalim din sa GCQ ngayong buwan ng Pebrero.

22 na may UK variant ng COVID-19, gumaling na — DOH

ni Ronalyn Seminiano Reonico | February 8, 2021

Dalawampu’t dalawa sa 25 kaso ng naitalang infected ng bagong B.1.1.7 variant ng COVID-19 ang nakarekober na sa nasabing sakit, ayon sa Department of Health (DOH).

Sinabi ni DOH Usec. Maria Rosario Vergeire na isa sa mga tinamaan ng bagong variant ang namatay habang nananatiling aktibo ang dalawang kaso nito.

Matatandaang nai-report ng DOH na isang 84-anyos na lalaki ang namatay dahil sa bagong variant ng coronavirus na mula sa La Trinidad, Benguet, subalit wala itong history na bumiyahe sa ibang bansa at hindi nagkaroon ng contact sa sinumang nagkaroon ng COVID-19.

“Nu’ng kausap namin ‘yung regional office namin, they said that this person never went out. Seldom. Pero hindi talaga, nandu’n lang daw sa loob ng bahay, walang ibang contact, so tinitingnan natin kung ano ‘yung source of infection at ano ‘yung ibang circumstances,” sabi ni Vergeire sa briefing ngayong Lunes.

Ang 15-anyos na babae namang kamag-anak ng namatay sa bagong variant ay infected na rin ng UK variant ng COVID-19.

Unang nadiskubre sa United Kingdom ang B.1.1.7 variant ng COVID-19, kung saan na-detect din sa mga residente sa Bontoc, Mountain Province at ilang umuwing overseas Filipinos.

Ayon kay Vergeire, inaasahan ng Philippine Genome Center na makakapag-sequence sila ng 720 samples ngayong linggo para ma-detect ang ibang kaso ng UK variant.

Noong nakaraang linggo, naantala ang ginagawang genome sequencing dahil sa kakulangan ng kailangang reagents. Gayunman, ayon sa DOH, naresolbahan na ang isyu dahil nai-deliver na ang mga bagong supplies nito.

Buntis na edad 10-14, mas dumami

ni Ronalyn Seminiano Reonico | February 8, 2021

Nababahala ang Commission on Population and Development (POPCOM) sa pagtaas ng bilang ng mga nanganganak na edad-15 pababa sa 7% noong 2019 kumpara sa mga nakalipas na taon.

Pahayag ng POPCOM, "In 2019, 2,411 girls considered as very young adolescents aged 10 to 14 gave birth, or almost seven every day. This was a three-fold increase from 2000, when only 755 from the said age group gave birth.”

Ayon sa tala ng POPCOM, ang Calabarzon ang may pinakamataas na bilang ng mga nanganak na menor de edad na pumalo sa 8,008. Sinundan ito ng National Capital Region na may bilang na 7,546, at ang Central Luzon ay nakapagtala naman ng 7,523.

Mataas din ang kaso ng teenage pregnancies sa Northern Mindanao na nakapagtala ng 4,747. Sinundan ito ng Davao na may 4,551 at ang Central Visayas na may 4,541.

Sa pangkalahatan, pumalo sa 62,510 ang bilang ng mga menor de edad na nanganak noong 2019 kumpara sa 62,341 na naitala noong 2018.

Nanawagan naman si PopCom Executive Director Juan Antonio Perez III sa pamahalaan na unahing isulong ang teenage pregnancy reduction program at nakikipag-ugnayan na rin umano ang ahensiya sa Department of Social Welfare and Development (DSWD) upang maprotektahan ang mga batang ina.

Saad pa ni Perez, “Adolescent mothers, as well as their children, can be provided with social protection, similar to the ones offered to older persons and victims of disasters.”