Barilan ng PNP at PDEA, iimbestigahan ng Senado

ni Ronalyn Seminiano Reonico | February 25, 2021

Umakyat na sa apat ang kumpirmadong patay sa naganap na barilan sa pagitan ng Philippine National Police (PNP) at Philippine Drug Enforcement Agency (PDEA) noong Miyerkules nang gabi sa parking lot ng isang fast food restaurant sa Commonwealth Avenue, Quezon City, ayon kay PDEA Chief Wilkins Villanueva.

Dalawang pulis, isang PDEA agent at isang informant ang nasawi sa insidente.

Ayon din kay Villanueva, stable na ang kondisyon ng 3 PDEA agents na naiulat na critically injured.

“Out of danger na ang tatlo,” aniya.

Magtutulungan din ang dalawang sangay ng pamahalaan sa pagsasagawa ng imbestigasyon sa diumano’y misencounter sa pagitan ng kapulisan at PDEA.

Siniguro rin ni PNP Spokesman Police Brigadier General Ildebrandi Usana na hindi makaaapekto sa operational relationship ng dalawang ahensiya ang insidente.

Ayon sa ulat, isa sa hanay ng dalawang grupo ang nagsagawa ng buy-bust operation at ayon kay Villanueva, “‘Yun nga, what we are trying to find out, sino rito ang buy-bust? But right not we cannot tell whether both of us or one of us are doing the buy-bust and one of us are not doing the same buy-bust.

“But we cannot tell that. Because we do not have the evidence that will prove that right now.”

Pahayag naman ni PNP Chief Police General Debold Sinas, “Very unfortunate incident na talagang it happened. That’s why we have to investigate properly.

“Ayaw naming magbigay kaagad ng report only to find out mali pala and masaktan na ‘yung sa kabila… without first going with the available facts and available evidence na nakikita.”

Samantala, nakatakdang magsagawa ng imbestigasyon ang Senate Dangerous Drugs Committee sa insidente sa susunod na linggo, ayon kay Senator Ronald Dela Rosa.

Aniya, "My committee on public order and dangerous drugs is going to conduct an inquiry in aid of legislation relative to that incident this coming Tuesday.”

38 Kadamay, guilty sa trespassing, pinagmulta

ni Ronalyn Seminiano Reonico | February 23, 2021

Pinagmulta ng Quezon City court ang 38 miyembro ng grupong Kadamay ng halagang P200 kada tao matapos hatulang guilty sa kasong trespassing sa isang private property noong taong 2017.

Ayon kay Quezon City Metropolitan Trial Court Branch 43 Judge Don Ace Mariano Alagar, noong April 2, 2017, sapilitan at walang paalam na pinasok ng mga miyembro ng Kadamay ang isang property sa Apollo Street, Barangay Tandang Sora siyam na buwan matapos i-demolish ng Quezon City government ang kanilang mga bahay noong 2016.

Maaaring makulong nang 30 araw o pagmultahin ang mga sangkot sa kasong paglabag sa Article 281 of the Revised Penal Code ngunit pinili ng korte ang huli.

Ayon pa sa ruling ng korte noong February 22, "The system of criminal law followed in the Philippines, true to the ways of constitutionalism, has always leaned toward the milder form of responsibility, whether as to the nature of the offense or the penalty to be incurred by the wrongdoer.”

Japan, may “Minister of Loneliness” dahil sa dami ng nagsu-suicide

ni Ronalyn Seminiano Reonico | February 23, 2021

Itinalaga ni Prime Minister Yoshihide Suga bilang “Minister of Loneliness” si Tetsushi Sakamoto matapos lumobo ang kaso ng suicide sa Japan.

Si Sakamoto ay isa ring minister-in-charge sa mababang birthrate ng Japan.

Pahayag ni PM Suga kay Sakamoto, “Women are suffering from isolation more (than men are), and the number of suicides is on a rising trend.

“I hope you will identify problems and promote policy measures comprehensively.”

Naalarma ang pamahalaan dahil noong October, 2020, umabot sa 2,153 ang kaso ng suicide sa Japan habang 1,765 naman ang pumanaw dahil sa COVID-19, ayon sa Japanese National Police Agency.