Bilyonaryong Mafia ang Mahal Ko (72)

ni Maria Angela Gonzales @Kuwentong Pag-Ibig | Ika-30 Araw ng Abril, 2024

“Isla Zamora?” Gilalas na tanong ni Nhel. 

Kahit kailan, hindi siya nagkaroon ng Isla na may pangalang Zamora. 

Oo nga’t Zamora ang kanyang last name, pero hindi niya iyon gagamitin kung bibili siya ng property. Mas gugustuhin pa niyang gamitin ang kanyang pangalan na Nhel at kanyang asawa na si Via. Hindi tuloy niya mapigilan ang mapangiti nang pumasok sa kanyang isipan ang kanyang pinakamamahal. 

“Mayroon pala kayong Isla?”

“Hindi akin ‘yan.”

“Puwede bang lagyan ng apelyido ang Isla na hindi mo naman pag-aari?” 

“Nakikita mo ba riyan ang asawa ko?”

“May kasama siyang isang lalaki,” wika nito. 

Marahas na buntong hininga ang kanyang pinawalan. Parang gusto niyang magalit na kasama ni Via si Jake, pero may tiwala siya sa kanyang asawa. Alam niyang may dahilan kung bakit magkasama ito ngayon, ngunit nakakasiguro siya na hindi siya kayang pagtaksilan ng kanyang misis. Mahal siya ni Via, pero bakit nga talaga ito umalis? 

“Ano hong gagawin ko rito?” Kunwa'y tanong nito. 

Kumunot ang noo niya dahil parang handa nitong ipag-utos na saktan si Jake. Well, gusto niyang saktan si Jake, pero mas gugustuhin pa rin niyang siya ang mananakit dito. 

“Bantayan mo ang asawa ko.”

“Paano kapag pumasok sila sa kuwarto?”

Hindi niya na napigilan ang kanyang sarili na mapamura. Alam na alam niya ang gusto nitong sabihin, kaya ipinaramdam niya rito na hindi niya nagustuhan ang sinabi nito.

Kung kaharap lang niya ang atribidong tauhan, paniguradong nasaktan niya na rin ito. 

“Sabihin mo ang eksaktong lokasyon at pupuntahan ko riyan ngayon.”

Dapat galit ang kanyang maramdaman, ngunit mas namamayani sa kanyang puso ang paka-miss sa kanyang asawa. Ang tangi kasing nais niya ay makita niya at mayakap ang kanyang pinakamamahal. 

Nasasabik din kaya siyang makita at mayakap ni Via?

Itutuloy…

Nahihiya sa boss, kaya iniiwasan ang nanliligaw na anak nito

Dear Roma,

Tawagin mo na lang akong Jane, 28 years old na ako at nagtatrabaho sa garments. Maganda ang puwesto ko roon kasi office work naman ako at nasa accounting, bookkeeping. Matagal din ako sa pagnanahi, pero dahil nakatapos naman ako ng secretarial course, inilagay ako agad ng boss kong babae sa department na ‘yun. Madali ko ring nagamay ang trabaho ko dahil tinuturuan din ako ng boss ko. Kaso dahil lockdown, nasa bahay lang ako. Problema ko lang ‘yung anak ng boss ko na laging nagpupunta sa bahay. Sabi nito, gusto niya ako kaya araw-araw siyang nasa bahay at nagdadala ng kung anu-ano. Aaminin ko na type ko rin siya, guwapo, mabait at binata. Kaso, nahihiya ako sa boss kong babae dahil malaki utang na loob ko sa kanya. Baka kasi isipin ng boss ko na sinasamantala ko lang ang feelings ng anak niya. Kaya nagdadahilan na lang ako at iniiwasan ang anak niya. Mas mabuti na siguro yun kesa ma-in love pa ako nang husto sa anak niya.

Jane,

Walang pinipili kaninuman na magkagusto ang isang tao. Maaaring malaki ang naitulong sa iyo ng boss mo pagdating sa career at kabuhayan n’yo, subalit, ang pag-iwas mo sa taong nagugustuhan mo ay hindi solusyon sa problema mo. Mabuting kausapin mo ang iyong boss at sabihin mo sa kanya ang ginagawang panliligaw ng kanyang anak. Doon mo rin malalaman kung tapat talaga ang lalaking nagugustuhan mo. Siguradong maiintindihan ka rin ng boss mo kapag nag-usap na kayo. Okie?

Single mom na worried magkasakit pero no choice dahil kailangan kumayod kahit may pandemya para sa 3

Dear Roma,

Tawagin mo na lang akong Mary, 39 years old na ako, may tatlong anak na dalawang lalaki at isang babae. Hiwalay na ako sa asawa at may iba na siyang pamilya. Sa krisis na nararanasan natin ngayon, masasabi kong mahirap talaga ang buhay. Isa akong pharmacist at halos nasa store na ako maghapon dahil sa dami ng tao. Kasama ko ang nanay ko sa bahay kaya hindi naman din problema ang mga anak ko dahil hindi sila lumalabas ng bahay. May konting kaba akong nararamdaman, pero kailangan kong magtrabaho dahil kung hindi ay wala kaming kakainin. Ayaw ko ring umasa sa ibibigay ng barangay namin. Sana lang matapos na ang problemang ito. –Mary

Mary,

Matindi ang problemang kinakaharap natin ngayon. Tama rin ang ginagawa ng pamilya mo na pagtulong na manatili na lamang sa bahay. Gayundin, hanga kami sa katatagan mo dahil nakakaya mong buhayin ang iyong mga anak nang hindi humihingi ng tulong sa iyong asawa.

Dobleng ingat na lamang ang iyong gawin sa tuwing papasok sa trabaho. ‘Ika nga, mas mahirap maghintay na lang ng tulong mula sa ibang tao, gayung ang trabaho mo naman ay pinapayagang mag-operate ng gobyerno. Pasalamatan din natin ang Diyos dahil may maganda kang hanapbuhay para sa ikabubuhay ng iyong pamilya at mayroon kang magandang kalusugan.