'Di sa harap ng publiko… P-Duterte, sa puwet magpapaturok ng COVID-19 vaccine

ni Lolet Abania | January 27, 2021

Mariing ipinahayag ng Malacañang na si Pangulong Rodrigo Duterte ay pribadong magpapabakuna ng COVID-19 vaccine kahit pa maraming nagsasabing dapat ipakita ito sa publiko.

Ayon kay Presidential Spokesperson Harry Roque, ang vaccination ay hindi maaaring gawin at ipakita sa publiko dahil sa nais ng Pangulo na iturok ang bakuna sa kanyang pigi o puwet.

“I think so. He has said so. Sabi niya nga, dahil sa puwet siya magpapasaksak, so hindi pupuwedeng public,” sabi ni Roque sa kanyang press briefing tungkol sa desisyon na ito ni P-Duterte.

Gayunman, pinuri ni Roque ang Pangulo dahil aniya, matatawag pa ring “best communicator” ang Punong Ehekutibo pagdating sa mga kampanya ng gobyerno lalo na sa pagpapatupad ng minimum health standards para mapigilan ang pagkalat ng COVID-19.

Matatandaang sinabi ni Department of Health (DOH) Secretary Francisco Duque III sa nakaraang Senate inquiry na susubukan niyang kumbinsihin si Pangulong Duterte na magpabakuna sa harap ng publiko para umangat ang kumpiyansa ng mga Pinoy sa vaccine.

Subali't nabanggit din ni Roque na gagayahin ni P-Duterte ang ginawa ni Queen Elizabeth II ng Britain na ang kanyang pagpapabakuna ay inanunsiyo lamang pagkatapos na siya at ang asawang si Prince Philip ay tumanggap ng first shots.

Sina US President Joe Biden, Indonesian President Joko Widodo at Israel Prime Minister Benjamin Netanyahu ay ilan lamang sa mga lider sa buong mundo na nagpabakuna na sa harap ng publiko.

89 bgy. captains, suspendido sa anomalya sa SAP

ni Ronalyn Seminiano Reonico | January 19, 2021

Sinuspinde nang anim na buwan ng Office of the Ombudsman ang 89 barangay captains dahil sa umano'y anomalya sa distribusyon ng cash aid sa ilalim ng social amelioration program o SAP.

Sa ginanap na press briefing nu'ng Lunes nang gabi ay isa-isang pinangalanan ni Pangulong Rodrigo Duterte ang 89 kapitan ng barangay.

"Itong mga barangay captain, I warned you, pag-umpisa pa lang sinabi ko, do not f*** with this Pantawid, iyong panahon ng COVID na namigay ang gobyerno ng pera para sa mahihirap.

Sinabi ko na lalo na sa barangay level, huwag na huwag ninyong gawin. Now, ito, suspendido for six months, then mag-hearing sa kaso mo. If a case is filed against you kasi pera ito, either pera na binulsa ninyo or hindi ninyo ginamit o ano mang kabulastugan na ginawa ninyo sa pera, contrary to my injunction na huwag na huwag ninyong gawin iyan.”

Mahigit P200 billion ang inilaan ng pamahalaan para sa social amelioration program sa ilalim ng Bayanihan to Heal As One Act (Bayanihan 1) para sa 18 million mamamayan ngayong panahon ng COVID-19 pandemic.

Sa ilalim naman ng Bayanihan to Recover As One Act (Bayanihan 2), aabot sa P5,000 hanggang P8,000 ang natanggap ng mga “low-income households” sa mga lugar na isinailalim sa lockdown, gayundin ang mga pinauwing overseas Filipino workers at mga nawalan ng trabaho.

Nais din ni P-Duterte na sibakin sa puwesto ang mga ito kapag napatunayang sangkot sa korupsiyon.

Aniya, “Ito, preventive lang ito, suspendido kapag iniimbestigahan ka, but at the end of the investigation, if you are good, then you are exonerated. But if you are guilty, I ask, I am asking, requesting, most respectfully requesting the Ombudsman to dismiss them from service...

When they are finally dismissed, it will always carry, it will be accompanied by the statement that they are no longer eligible for public office, iyan ang masakit diyan. Hindi ka na puwedeng tumakbo maski water boy sa barangay n’yo.”

P-Duterte, game noon, atras na ngayon na unang magpabakuna ng COVID-19

ni Lolet Abania | January 14, 2021

Ipinahayag ni Pangulong Rodrigo Duterte na ang mga frontliners at mahihinang sektor ng lipunan ang unang makatatanggap ng dose ng COVID-19 vaccine kapag dumating na ito sa bansa habang siya ay huling magpapabakuna.

"Ang mga frontline na health workers; mauna ang teachers at social workers and other government workers; and three, essential workers outside health, education, social welfare, for example, agriculture, food, tourism and ‘yung may contact talaga sa tao; then the socio-demographic groups at tingnan natin kung sino ang mauna sa kanila.

Then there are the overseas Filipino workers; all remaining workers; other remaining workers; then, all remaining citizens,” sabi ni Pangulong Duterte sa kanyang weekly televised Cabinet briefing.

Ayon kay P-Duterte, mahalaga ring mabakunahan ang mga militar, sundalo at kapulisan. “Priority is uniformed personnel. Mga sundalo natin, kasama sa priority, mauna talaga ‘yung pobre, ‘yung wala talaga.

Kung milyon 'yan (vaccine), magsabay-sabay na kayo, huli na kami. Kung may maiwan para sa amin, kay (Senator) Bong (Go), kay (Secretary Delfin) Lorenzana, kung may maiwan eh, di para sa atin, unahin natin sila," dagdag ng Pangulo.

Matatandaang noong Agosto ng nakaraang taon, sinabi ni Pangulong Duterte na nais niyang magpabakuna na makita ng publiko at nag-volunteer siyang tatanggap ng unang shot ng vaccine. “Ako, pagdating ng bakuna in public, para walang satsat diyan, in public, magpa-injection ako.

Ako ‘yung maunang maeksperimentuhan. Okay para sa akin,” sabi ng Pangulo sa isang televised address noong August 10, isang araw bago ang Russia ay magbigay ng regulatory approval sa kanilang vaccine na Sputnik V. Samantala, target pa rin ng gobyerno na mapabakunahan ang 110 milyong populasyon sa bansa, subalit wala umano silang planong mamilit sa mga tatangging magpaturok ng vaccine.

"It's an obligation imposed upon us governments to take care of your citizens. . . Kung maaari lang, i-vaccinate mo 'yung 100 million plus Filipinos," ani P-Duterte.

"Kung merong mga tao na ayaw, eh, di mas mabuti, mauna na 'yung gusto and we can tone down the orders kung sobra-sobra," dagdag niya.

Binanggit ni Pangulong Duterte na walang mangyayaring diskriminasyon sa vaccination program ng gobyerno. Mauuna lamang tumanggap nito ang mga mahihinang sektor ng lipunan.