2 patay sa sunog sa QC

ni Thea Janica Teh | December 19, 2020

Patay ang dalawang katao kabilang ang isang person with disability (PWD) matapos masunog ang tinitirhan nitong lumang residential building sa Barangay Pagasa, Quezon City nitong Biyernes nang gabi.

Napag-alamang magkapatid ang mga biktima na kinilalang sina Juanita Ramo, 58-anyos at Silvestre Ramo, 63-anyos na naka-wheelchair.

Ayon kay Bureau of Fire Protection Quezon City District Director Senior Superintendent Joe Bangyod, nagsimula ang sunog sa ikaapat na palapag. Namatay umano ang magkapatid sa suffocation dahil ang unit nito ay nasa ikalimang palapag kung saan umaakyat ang usok.

Dagdag pa ni Bangyod, nakita nilang maraming nakatambak na papel at gulong sa pinagmulan ng sunog na dahilan umano ng paglaki nito.

Nakita rin ng isang residente na sa unit na ‘yun ay nasusunog ang aircon. Kaya naman isa ito sa tinitingnang dahilan ng sunog ng mga bumbero.

Umabot sa ikalawang alarma ang sunog na tumagal nang halos isang oras. Apektado sa sunog ang 8 pamilyang nakatira sa nasabing gusali.

Samantala, tinatayang nasa P150,000 ang halaga ng istrakturang napinsala sa sunog.

18-anyos, bawal sa public places sa QC, huli na, multa pa

ni Ronalyn Seminiano Reonico | December 18, 2020

Bawal nang pumunta sa mga pampublikong lugar ang mga menor-de-edad sa Quezon City “whether alone or accompanied by parent or guardian and without any justification” dahil sa patuloy na banta ng COVID-19 pandemic, ayon sa Quezon City local government.

Inaprubahan na ni QC Mayor Joy Belmonte ang Ordinance No. SP-2985, S-2020, o ang “Quezon City Special Protection of Children against COVID-19” na naglalayong mapanatili sa kani-kanyang bahay ang mga 18-anyos pababa “during the so-called ‘Children Protection Hours’ or 24 hours a day and seven days a week.”

Pahayag ni Belmonte, “Ang Ordinansang ito ay batay sa rekomendasyon ng mga dalubhasa sa Philippine Pediatric Society na kailangang manatili ang mga menor-de-edad sa mga tahanan dahil malaki ang tsansa na sila’y mahawa.

“Ang kautusang ito ay para na rin sa kapakanan ng ating mga kabataan upang hindi na malagay sa panganib ang kanilang buhay.”

Samantala, mayroong “exemptions” na nakapaloob sa naturang ordinansa katulad ng: engagement ng menor-de-edad sa isang authorized employment activity na nangangailangan ng physical presence “provided that they are accompanied by parent or guardian”; ang mga nangangailangan ng atensiyong medikal o ang mga mayroong medical/dental appointments; at ang mga walang kasamang nasa legal age na nangangailangang bumili ng essential goods.

Pagmumultahin din ang mga magulang o guardian ng mga menor-de-edad na lalabag sa naturang ordinansa ng halagang P300, P500 o P1,000 para sa una, ikalawa at ikatlo at “subsequent offenses.”

Dadalhin naman ang mga menor-de-edad na lalabag sa naturang ordinansa sa Barangay Council for the protection of Children (BCPC) sa barangay kung saan sila mahuhuli at ire-require na sumailalim sa counseling bago sila ibalik sa kani-kanyang magulang o guardian.

Sa mga lalabag naman sa ikatlo at “subsequent offenses”, bukod sa counseling ay isasailalim din ang mga menor-de-edad sa intervention program ng Social Services and Development Department (SSDD).

Pagmumultahin din ang mga may-ari, “proprietors” at managers ng mga mall, shopping centers, commercial establishments, atbp. pampublikong lugar katulad ng mga sinehan na lalabag sa naturang ordinansa ng halagang P500 para sa first offense. Sa second offense naman ay pagmumultahin sila ng P1,000 at makakatanggap din sila ng “warning for the revocation of business permit/license and closure of establishment.” At sa third at subsequent offense, pagmumultahin sila ng P3,000 “for each violation and revocation of business permit/license and closure of establishment will be meted.”

U-turn slot sa tapat ng QC Academy, bubuksan na uli

ni Thea Janica Teh | December 16, 2020

Bubuksan nang muli ang U-turn slot sa tapat ng Quezon City Academy ngayong darating na Biyernes upang maiwasan ang matinding trapiko ngayong Christmas season.

Matatandaang ipinasara ng Metropolitan Manila Development Authority (MMDA) ang U-turn slot noong Setyembre upang maisagawa ang planong busway sa EDSA.

Makatutulong din ang pagbubukas nito upang makapagbigay-daan sa mga emergency vehicle lalo na sa mga sasakyang patungo sa WC General Hospital na isa sa COVID-19 facility sa QC.

Bukod pa rito, magbubukas din ang MMDA ng special lane sa isa pang isinarang u-turn slot sa Panorama upang madaanan lamang ng mga emergency vehicles.

Sa ngayon ay inaayos na rin ang zipper lane na magsisilbing daanan ng mga emergency vehicle na ipapasok sa loob ng busway.

Magtatalaga ng ilang MMDA enforcers sa lugar upang masigurong ang dadaan lamang dito ay mga ambulansiya, bumbero at mga pulis.

Ayon kay MMDA EDSA traffic czar Bong Nebrija, tanging ang U-turn slot lamang sa may Quezon City Academy ang bubuksan. Maglalagay din umano ang MMDA ng ilang signage upang hindi malito ang mga motorista.