Ribbon-cutting sa modular hospital, sayang-oras lang — Binay

ni Mary Gutierrez Almirañez | April 7, 2021

Pinalagan ni Senator Nancy Binay ang ribbon-cutting ceremony sa binuksang Quezon Institute Offsite Modular Hospital na pinangunahan nina Senator Bong Go, Department of Health Secretary Francisco Duque III at Vaccine Czar Carlito Galvez, Jr. sa Quezon City kahapon, Abril 6.

Komento ni Binay, "Pakiusap, kung puwedeng buksan na lang para magamit agad. Sayang lang ang oras sa ribbon-cutting at photo ops. These things are unnecessary and leave a bad taste for families of Covid patients who are racing against life and time.”

Binuksan ang bagong pasilidad bilang extension ng Jose R. Reyes Memorial Medical Center dahil sa patuloy na pagdami ng mga pasyenteng naa-admit sa ospital dulot ng COVID-19.

Sa ngayon, tinatayang 110 na pasyente ang kayang i-accommodate ng modular hospital mula sa referral ng One Hospital Command at hindi muna umano tatanggap ng mga walk-in patients.

Residential area sa QC at Las Piñas, nasunog

ni Mary Gutierrez Almirañez | April 5, 2021

Dalawang magkahiwalay na sunog ang tumupok sa residential area sa North Fairview, Quezon City at Pamplona Uno, Las Piñas City kaninang madaling-araw, Abril 5.

Ayon sa ulat, alas-dos nang madaling-araw nang magsimula ang apoy sa Barangay North Fairview, kung saan 18 bahay at 36 pamilya ang naapektuhan ng sunog na umabot sa ikalawang alarma.

Ayon kay Bureau of Fire Protection Chief Inspector Joseph del Mundo, nahirapan ang mga bumbero na apulahin ang apoy dahil sa makitid na daan kaya kinailangan nilang dumaan sa bubong. Aniya, electrical problem ang itinuturong pinagmulan ng sunog.

Samantala, mahigit P100,000 ang halaga ng mga napinsala.

Kaugnay nito, itinaas naman sa unang alarma ang sunog sa Las Piñas City kaninang 1:30 nang madaling-araw na nagsimula sa isang junkshop sa Burgos Street Barangay Pamplona Uno at idineklarang fire under control pasado 3:02 AM na umabot sa ikatlong alarma.

Ayon pa sa caretaker ng junkshop na si Ricardo Flores, natutulog siya’t ginising lamang ng anak nang maramdaman nitong nasusunog na ang unang palapag ng kanilang junkshop kung nasaan ang mga plastic bottles at iba pang kalakal na naging dahilan upang mabilis na kumalat ang apoy sa kalapit na apartment.

Tinatayang P100,000 ang halaga ng mga napinsala at halos 3 pamilya ang naapektuhan ng sunog.

Sa ngayon ay kasalukuyang nasa covered court ang mga nawalan ng tirahan.

Wala namang iniulat na namatay o nasugatan sa insidente.

Registration para sa 1-M doses ng AstraZeneca sa Kyusi, start na

ni Mary Gutierrez Almirañez | March 26, 2021

Darating na sa ikatlong quarter ng taon ang mahigit 1 milyong doses ng AstraZeneca COVID-19 vaccines na binili ng Quezon City, kasabay ang iba pang doses na inilaan ng national government para sa pamahalaang lungsod, ayon kay Mayor Joy Belmonte.

Aniya, “Definitely, for example in our city, although we reserved 1.1 million dosages, that’s not enough. That’s very little. That’s going to cover a fifth of our population so we need the help and assistance of whatever the vaccines the national government can spare for Quezon City.”

Sa ngayon, maaari nang makapagparehistro ang mga residenteng 15-anyos pataas sa website na https://qceservices.quezoncity.gov.ph kabilang ang homeowner, tenant, kasambahay, mahihirap at mayayaman, partikular na ang mga senior citizens upang mabakunahan ng libre kontra COVID-19.

Pinaaalalahanan din ang mga residente na sundin ang mga sumusunod na hakbang sa pre-registration:

• Piktyuran ang valid I.D. na naka-address sa Quezon City

• Sa mga senior citizens, piktyuran ang SC Card na inisyu ng lungsod

• Pumirma sa kulay puting papel. Kailangang magkapareho ang pirma sa I.D. at papel

• I-search ang https://qceservices.quezoncity.gov.ph para sagutan ang mga hinihinging impormasyon

• I-upload ang picture ng I.D.

• I-upload ang sariling larawan o mag-selfie gamit ang QC-ID App. Hindi dapat kulay puti ang background sa picture • I-upload ang picture ng pinirmahang papel

• Hintayin ang approval Batay sa huling tala ay umabot na sa 14,819 ang mga nabakunahang healthcare workers sa Quezon City at inaasahang madaragdagan pa ito sa pagpapatuloy ng rollout at pagdating ng iba pang bakuna.

QC E-Services qceservices.quezoncity.gov.ph