Ospital, napupuno na sa dami ng COVID cases… Davao City, MECQ hanggang June 20

ni Mary Gutierrez Almirañez | June 4, 2021

Ilalagay ang Davao City sa modified enhanced community quarantine (MECQ) o mas mahigpit na quarantine classifications simula bukas, June 5 hanggang 20, dahil sa biglaang pagtaas ng COVID-19 cases.

Ayon sa naunang anunsiyo ng City Government of Davao sa kanilang Facebook page, “The City Government of Davao has requested the IATF-RTF to declare a Modified Enhanced Community Quarantine (MECQ) from June 5 to 30, 2021 to allow a circuit breaker in the surge of patients inside hospitals.”

Base naman kay Presidential Spokesperson Harry Roque, hanggang June 20 lamang ipatutupad ang MECQ sa Davao City, samantalang ang General Santos City nama’y ilalagay sa general community quarantine (GCQ) o mas maluwag na quarantine classifications hanggang sa katapusan ng Hunyo.

Sa ngayon ay malapit nang maging full capacity ang Southern Philippines Medical Center na pinakamalaking ospital sa Davao, dahil sa biglaang pagdami ng isinusugod na COVID-19 patients.

Base pa sa huling datos ng Department of Health (DOH), ang Mindanao ay nakapagtala ng 11,391 active cases ng COVID-19.

“All public transportation shall be permitted to operate. We need to help our frontliners by making sure that we stay home except for work or business,” dagdag naman ng City Government of Davao sa kanilang Facebook post.

Roque: DDS o hindi, babakunahan

ni Mary Gutierrez Almirañez | May 27, 2021

Nilinaw ni Presidential Spokesperson Harry Roque na walang political discrimination o pamumulitika sa vaccination rollout ng COVID-19 sa ilalim ng administrasyon ni Pangulong Rodrigo Duterte, kaugnay sa isyung prayoridad lamang nito ang mga kapartido.

Aniya, "Scientifically, you can’t discriminate because you’re defeating the purpose of a mass vaccination. No one is safe until we are all safe. It does not make sense if you give priority to areas just because they are political supporters and ignore other areas because the nature of the virus is it does not discriminate against or for political allies or opponents."

Matatandaan namang mahigit 1,600 empleyado ng House of Representatives (HoR) na ang nabakunahan kontra COVID-19 at ilang pulitiko na rin mula sa iba’t ibang local government units (LGU) na nasa high-risk area ng COVID-19 ang napasama sa priority list.

Kabilang din sa isinusulong ng mga opisyal ay ang mas mabilis na vaccination rollout, kung saan inirerekomendang bakunahan na rin ang publiko kahit hindi pa prayoridad sa listahan.

Sa ngayon ay 4,495,375 indibidwal na ang nabakunahan kontra COVID-19. Kabilang dito ang mga healthcare workers, senior citizens at may comorbidities o nasa A1 hanggang A3 priority list.

Inaasahan namang susunod na ang rollout sa ilalim ng A4 at A5, kung saan kabilang ang economic frontliners at mga mahihirap.

Samantala, pinag-aaralan na ng Food and Drug Administration (FDA) ang isinumiteng application para sa emergency use authorization ng Pfizer COVID-19 vaccines upang iturok sa edad 12 hanggang 15-anyos.

"Ang ating mga experts, in-evaluate. In fact, early this evening, I already got the recommendations of our experts and it's very favorable… Within the week, we will issue an amendment and we will be able to use it in children of 12 to 15 years old," sabi pa ni FDA Director General Eric Domingo.

Ilang establisimyento, bubuksan na sa MECQ

ni Mary Gutierrez Almirañez | April 29, 2021

Maglalabas ang Inter-Agency Task Force (IATF) ng bagong listahan ng mga establisimyento na maaari nang magbukas sa ilalim ng extended modified enhanced community quarantine (MECQ) sa NCR Plus, ayon kay Presidential Spokesperson Harry Roque.

Aniya, "Magkakaroon ng listahan ng mga industriya at negosyo na puwedeng pabuksan bagama't MECQ pa rin. Naiintindihan namin na kailangang bumalik na ang mga manggagawa sa kanilang hanapbuhay… We are looking at a gradual reopening."

Hindi naman binanggit kung kailan ilalabas ang listahan ng mga establisimyentong bubuksan.

Samantala, nananawagan naman sa pamahalaan ang ilang manggagawa na huwag na sanang bumaba sa P100 ang hinihiling nilang dagdag-sahod.

Paliwanag pa ni Defend Jobs Philippines Spokesman Christian Lloyd Magsoy, ayos lamang kung bumaba iyon sa P70, subalit ‘wag sanang mas mababa pa du’n, kung saan halos barya na lang.

Aniya, "Tingin ko, puwede na sa amin kahit mga P70, pero ‘wag na sanang bababa pa. Compromised na nga ‘yun. 'Wag naman sanang gawing barya ang ibigay na dagdag-sahod."

Sa ngayon ay pumapatak sa P537 ang kinikita ng isang minimum wage earner kada araw at hindi na iyon sumasapat lalo’t sumabay pa ang pandemya.

Matatandaang maraming manggagawa at maliliit na negosyante ang nawalan ng hanapbuhay mula nang lumaganap ang COVID-19 sa bansa, kaya sinisikap ng pamahalaan na balansehin ang ekonomiya at ang mga ipinatutupad na guidelines sa ilalim ng mahigpit na quarantine restrictions.

Nilinaw naman ng OCTA Research Group na maaari lamang makabalik sa maluwag na quarantine classifications o general community quarantine (GCQ) ang NCR Plus, sakaling bumaba na sa 2,000 ang mga nagpopositibo sa COVID-19 kada araw.