Hepe at 26 pulis, sibak dahil sa POGO

Filni Angela Fernando - Trainee @News | November 3, 2023

Sinibak sa tungkulin ang hepe ng pulisya sa Pasay City at 26 pang mga pulis dahil sa posibleng kapabayaan sa pagtupad sa kanilang gawain kaugnay ng ilegal na aktibidad ng isang Philippine offshore gaming operations (POGO) hub, ayon sa pahayag ng Philippine National Police (PNP) ngayong Biyernes.

Saad ni PNP Spokesperson Colonel Police Jean Fajardo, tinanggal sa trabaho ang 26 pulis kasama ang kanilang hepe sa gitna ng isinasagawang imbestigasyon sa ni-raid na POGO sa Pasay City kamakailan.

Aniya, “Inimbestigahan po sila for possible neglect of duty dahil nangyari nga po ito na matagal na po itong POGO establishment, how come hindi po nila na-detect iyong presence ng mga illegal activities doon sa area.”

Papalitan naman ni Police Colonel Mario Mayanes si Police Colonel Froilan Uy bilang hepe ng pulisya sa Pasay City.

PNP, aalisin na ang "full alert status"

ni Eli San Miguel - Trainee @News | November 2, 2023

Inaasahan na tatanggalin na ng Philippine National Police (PNP) ang kanilang "full alert status" ngayong Huwebes, ika-2 ng Nobyembre, matapos ang matagumpay na barangay elections at pagdaraos ng Undas.

Sinabi ni PNP chief Gen. Benjamin Acorda, Jr. na binibigyan niya ng awtoridad ang mga lokal na komandante na magpasya kung mananatili o tatanggalin ang "full alert status", depende sa kalagayan ng mga itinalagang "areas of responsibility."

“Our full alert status will be until Undas, our uniformed personnel also deserve a rest, they also need to be their family,” sabi ni Acorda.

Sa ilalim ng "full alert status", kanselado ang mga leave upang matiyak ang 100 porsyentong pagdalo ng mga pulis para sa mga gawain kaugnay ng kapayapaan at kaayusan.

Higit sa 187,000 na mga pulis ang ipinadala upang tiyakin ang seguridad sa Barangay at Sangguniang Kabataan Elections (BSKE). Na-deploy sila ilang araw bago ang Oct. 30 elections upang palakasin ang mga checkpoint at police visibility patrols.

Sa kabilang dako, higit sa 22,000 na mga pulis ang ipinadala upang ipatupad ang mga hakbang sa seguridad para sa Undas.

Sa ngayon, sinabi ni Acorda na wala silang natukoy na anumang banta sa kapayapaan at kaayusan sa anumang bahagi ng bansa, lalo na't natapos na ang halalan.

Gayunpaman, sinabi niya na sapat na bilang ng personnel ang mananatiling naka-deploy upang tiyakin ang seguridad ng milyun-milyong Pilipino na inaasahang babalik sa mga lungsod matapos ang mahabang bakasyon.

4,500 pulis, bantay sa Eastern Visayas para sa Undas

ni Eli San Miguel - Trainee @News | November 1, 2023

Nag-deploy ng mahigit 4,500 pulis ang Police Regional Office-8 upang mapanatili ang kapayapaan at kaayusan sa mga sementeryo at iba pang lugar ng pagtitipon sa Eastern Visayas para sa Undas o All Saints' Day.

Nagsagawa si Police Brig. Gen. Reynaldo Pawid, PRO-8 director, ng inspeksyon sa mga lugar sa rehiyon upang tingnan ang kalagayan ng mga pulis na naka-assign sa mga sementeryo at mga checkpoint.

Sinabi ni Pawid na bagamat karaniwan nang tahimik ang mga barangay election, hindi pa rin nai-pullout ang mga pulis na nakaatas sa “areas of concern” sa halalan para magbantay sa mga sementeryo.

Ipinag-utos niya sa mga pulis na tiyakin na walang kontrabando ang maipapasok sa mga sementeryo.

"Intoxicating liquors are not allowed in cemeteries even if the liquor ban has been lifted after the barangay and Sangguniang Kabataan elections 2023," sabi ni Pawid.

Pinaalala niya sa mga tao na ipinagbabawal ang pagdadala ng mapanganib na mga kagamitan pati na rin ang mga pang-sugal, dahil sapat na oras na ang ibinigay sa kanila para linisin ang mga puntod ng kanilang mga mahal sa buhay bago ang Undas.