Utos ni P-Du30, sinunod... 9 na aktibista, patay, 6 arestado sa raid sa Calabarzon

ni Mary Gutierrez Almirañez | March 7, 2021

Siyam na aktibista ang namatay habang 6 ang arestado sa isinagawang raid ng Philippine National Police (PNP) at Armed Forces of the Philippines (AFP) sa Calabarzon kaninang umaga, Marso 7, ayon sa Police Regional Office 4A.

Batay kay PRO4A PIO Chief Police Lieutenant Colonel Chitadel Gaoiran, may dalang warrant of arrest mula sa Manila Regional Trial Court Branch 4 ang mga awtoridad nang isagawa ang operasyon kung saan nakuha ang mga pampasabog mula sa bahay ng ilang aktibista at umano’y nanlaban sila sa pulisya.

Kabilang sa mga namatay ang mag-asawang sina Chai at Ariel Evangelista na miyembro ng Ugnayan ng Mamamayan Laban sa Pagwawasak ng Kalikasan at Kalupaan, sina Makmak Bacasno at Michael "Greg" Dasigao ng SIKKAD-K3 Kdmay Montalban, at si Emmanuel "Manny" Asuncion, ang Secretary General ng Bagong Alyansang Makabayan-Cavite. Samantala, inaalam pa ang pagkakakilanlan ng iba.

Sa tala ng pulisya, isa ang namatay sa Cavite, 2 sa Batangas at 6 sa Rizal, habang tatlo ang arestado mula sa Laguna, gayundin sa Rizal.

Kaugnay nito, ang nangyaring operasyon ay alinsunod lamang sa ipinahayag ni Pangulong Duterte noong ika-5 ng Marso, "I've told the military and the police, that if they find themselves in an armed encounter with the communist rebels, kill them, make sure you really kill them, and finish them off if they are alive."

Mapatunayan lang na binentahan ng agent ang mga pulis…"Magre-resign ako!" — PDEA Chief Villanueva

ni Ronalyn Seminiano Reonico | March 2, 2021

Handang magbitiw sa puwesto si Philippine Drug Enforcement Agency (PDEA) Chief Wilkins Villanueva kung mapapatunayan diumano na isa sa kanilang tauhan ang nagbenta ng droga sa kapulisan sa madugong buy-bust operation malapit sa isang mall sa Quezon City noong nakaraang linggo.

Hinamon din ni Villanueva na maglabas ng CCTV footage ang sinumang nagsasabing nagbenta ng droga ang PDEA agents sa mga tauhan ng Philippine National Police (PNP).

Aniya, “Magsasalita ka kung may makikita kang ebidensiya na nandiyan. CCTV ang patunay. Magpalabas sila ng CCTV na nagbentahan ang PDEA at pulis. Magre-resign ako right now.

“Magpalabas kayo ng ebidensiya na CCTV na nagbenta ang PDEA at kayo ang bumili. Doon, kaso na ‘yun. I will resign immediately.”

Samantala, kasalukuyan pa ring nagsasagawa ng imbestigasyon ang National Bureau of Investigation (NBI) sa insidente.

Noong Lunes, ayon sa Philippine National Police (PNP), nai-turn over na nila ang ilang ebidensiya katulad ng cellphones, mga baril at umano'y boodle money.

Saad pa ni PNP Crime Laboratory Director Brigadier Steve Ludan, “That is all we have now and na-turn over na po ‘yung iba, and the rest we are waiting for the complete turnover of these evidence to the NBI.”

Pahayag naman ni PNP Chief Police General Debold Sinas, “As to the impact of those evidence, pabayaan na lang muna ang NBI ang magsalita.”

Hearing ng Kongreso sa barilan ng PNP at PDEA, suspendido

ni Mary Gutierrez Almirañez | February 27, 2021

Suspendido ang nakatakdang imbestigasyon sa Lunes (Marso 1) sa naganap na ‘misencounter’ sa pagitan ng PDEA at PNP, ayon kay House Committee on Dangerous Drugs Chairman at Surigao del Norte Rep. Robert Ace Barbers, alinsunod na rin sa kahilingan ni Pangulong Rodrigo Duterte.

Aniya, "Please be advised that in light of Pres. DU30's instruction to the NBI to conduct an impartial investigation on the PNP and PDEA incident, our scheduled Committee hearing/investigation in aid of legislation on Monday, March 1, 2021, is temporarily suspended as a courtesy to and in order not to hinder the ongoing investigation. We'll keep you all posted on the developments."

Sa unang pahayag ng Presidente kahapon, iginiit niyang tanging NBI lamang ang inatasan niyang magsagawa ng imbestigasyon sa barilan ng PNP at PDEA sa naganap na buy-bust operation noong Miyerkules nang gabi sa parking lot ng isang fast food establishment sa Commonwealth Avenue, Quezon City, kung saan apat ang naitalang namatay.

"Gusto ng Presidente na magkaroon ng impartial investigation para maiwasan ang mga malilikot na pag-iisip at para rin sa peace of mind ng mga biktima na patas ang imbestigasyon," paliwanag ni Spokesperson Harry Roque sa Palace briefing kanina.