Hearing ng Kongreso sa barilan ng PNP at PDEA, suspendido

ni Mary Gutierrez Almirañez | February 27, 2021

Suspendido ang nakatakdang imbestigasyon sa Lunes (Marso 1) sa naganap na ‘misencounter’ sa pagitan ng PDEA at PNP, ayon kay House Committee on Dangerous Drugs Chairman at Surigao del Norte Rep. Robert Ace Barbers, alinsunod na rin sa kahilingan ni Pangulong Rodrigo Duterte.

Aniya, "Please be advised that in light of Pres. DU30's instruction to the NBI to conduct an impartial investigation on the PNP and PDEA incident, our scheduled Committee hearing/investigation in aid of legislation on Monday, March 1, 2021, is temporarily suspended as a courtesy to and in order not to hinder the ongoing investigation. We'll keep you all posted on the developments."

Sa unang pahayag ng Presidente kahapon, iginiit niyang tanging NBI lamang ang inatasan niyang magsagawa ng imbestigasyon sa barilan ng PNP at PDEA sa naganap na buy-bust operation noong Miyerkules nang gabi sa parking lot ng isang fast food establishment sa Commonwealth Avenue, Quezon City, kung saan apat ang naitalang namatay.

"Gusto ng Presidente na magkaroon ng impartial investigation para maiwasan ang mga malilikot na pag-iisip at para rin sa peace of mind ng mga biktima na patas ang imbestigasyon," paliwanag ni Spokesperson Harry Roque sa Palace briefing kanina.

Barilan ng PNP at PDEA, iimbestigahan ng Senado

ni Ronalyn Seminiano Reonico | February 25, 2021

Umakyat na sa apat ang kumpirmadong patay sa naganap na barilan sa pagitan ng Philippine National Police (PNP) at Philippine Drug Enforcement Agency (PDEA) noong Miyerkules nang gabi sa parking lot ng isang fast food restaurant sa Commonwealth Avenue, Quezon City, ayon kay PDEA Chief Wilkins Villanueva.

Dalawang pulis, isang PDEA agent at isang informant ang nasawi sa insidente.

Ayon din kay Villanueva, stable na ang kondisyon ng 3 PDEA agents na naiulat na critically injured.

“Out of danger na ang tatlo,” aniya.

Magtutulungan din ang dalawang sangay ng pamahalaan sa pagsasagawa ng imbestigasyon sa diumano’y misencounter sa pagitan ng kapulisan at PDEA.

Siniguro rin ni PNP Spokesman Police Brigadier General Ildebrandi Usana na hindi makaaapekto sa operational relationship ng dalawang ahensiya ang insidente.

Ayon sa ulat, isa sa hanay ng dalawang grupo ang nagsagawa ng buy-bust operation at ayon kay Villanueva, “‘Yun nga, what we are trying to find out, sino rito ang buy-bust? But right not we cannot tell whether both of us or one of us are doing the buy-bust and one of us are not doing the same buy-bust.

“But we cannot tell that. Because we do not have the evidence that will prove that right now.”

Pahayag naman ni PNP Chief Police General Debold Sinas, “Very unfortunate incident na talagang it happened. That’s why we have to investigate properly.

“Ayaw naming magbigay kaagad ng report only to find out mali pala and masaktan na ‘yung sa kabila… without first going with the available facts and available evidence na nakikita.”

Samantala, nakatakdang magsagawa ng imbestigasyon ang Senate Dangerous Drugs Committee sa insidente sa susunod na linggo, ayon kay Senator Ronald Dela Rosa.

Aniya, "My committee on public order and dangerous drugs is going to conduct an inquiry in aid of legislation relative to that incident this coming Tuesday.”

2 patay, 4 sugatan sa barilan ng QCPD at PDEA

ni Lolet Abania | February 24, 2021

Patay ang dalawang pulis matapos ang barilan sa pagitan ng mga miyembro ng Quezon City Police District (QCPD) at mga tauhan ng Philippine Drug Enforcement Agency (PDEA) ngayong Miyerkules nang gabi.

Ayon kay National Capital Region Police Office chief Police Brig. Gen. Vicente Danao, Jr., dalawang pulis ang namatay sa insidente habang isa pa ang kritikal ang kondisyon.

Sinabi pa ni Danao, tatlong PDEA operatives naman ang nasugatan sa insidente. Sa ulat, nagsasagawa ang mga members ng QCPD District Special Operations Unit (DSOU) ng isang buy-bust operation sa isang fast food sa tabi ng Ever Gotesco Mall sa Commonwealth Avenue.

Agad na isinugod sa ospital ang team leader ng grupo ng QCPD-DSOU makaraang masugatan sa insidente. Ayon sa QCPD public information office, nagsimula ang engkuwentro bandang alas-6:08 ng gabi na nagpatuloy hanggang alas-7:00 ng gabi, kung saan ang mga ahente ng PDEA ay naroon din sa lugar.

Sa pahayag ng Metropolitan Manila Development Authority (MMDA), nagkaroon ng barilan sa labas ng Ever Gotesco Mall kaya pansamantalang itinigil ang daloy ng trapiko sa eastbound lane ng Commonwealth Avenue.

Agad ding nagtungo sina PDEA Director General Wilkins Villanueva, PNP Chief Police General Debold Sinas, at QCPD Chief Police Brigadier General Danilo Macerin sa pinangyarihang insidente.

Ayon kay Sen. Richard Gordon, head ng Philippine Red Cross, ang shooting incident ay nangyari malapit sa overpass sa harapan ng nasabing mall. “Several gunshots were heard near the overpass at Ever Gotesco Mall at around 6:00 PM. Two PNP officers were reportedly wounded.

We already coordinated with QC Police Stations 5 & 6 and dispatched medic team to provide immediate assistance. Keep safe everyone,” pahayag sa tweet ni Gordon.

Naglabas naman ng isang statement ang pamunuan ng Ever Gotesco Commonwealth na sinasabing ligtas ang mga mamimili sa loob ng mall habang patuloy ang nagaganap na barilan.

"We have confirmed reports of a shootout that happened earlier outside of Ever Commonwealth. We have secured all access to the mall so all shoppers are safe inside," ayon sa pahayag ng pamunuan ng mall.

"Our priority right now is to ensure the safety of the employees and the public. The management is closely coordinating with the PNP of the current situation. Please bear with us as we allow the authorities to handle the situation.

For now, we hope for everyone’s cooperation to exercise caution in sharing unconfirmed information online," dagdag na pahayag.

Sa interview kay PDEA spokesperson Derrick Carreon, nagsasagawa ang kanilang mga agents ng lehitimong buy-bust sa Ever Gotesco Mall compound sa Commonwealth Avenue sa Quezon City nang maganap ang shootout.

“Hindi pa po malinaw ‘yung detalye base du'n sa mga pangyayari kanina except for the fact na ang alam po natin ay nag-coordinate ang ating mga tropa for a legitimate buy-bust operation in that area,” sabi ni Carreon.