P172M jackpot prize, kinukubra sa PCSO... Lalaki, kulong sa pekeng lotto

ni Gina Pleñago @News | April 29, 2026

Photo: PNP / NCRPO

Diretso sa kulungan ang isang lalaking nagtangkang kumolekta ng P172 milyong jackpot prize nang nameke ng lotto ticket sa Philippine Charity Sweepstakes Office sa Brgy. Wack-Wack, Mandaluyong City.

Ayon sa National Capital Region Police Office, nagtungo sa opisina ng PCSO ang lalaki at ipinakita ang kanya umanong winning ticket.

Subalit nang isalang ito sa beripikasyon sa official lotto database, lumitaw na na-claim na ng totoong nanalo ang jackpot prize na kinukuha ng suspek.

Nakita rin sa pagsusuri sa lotto ticket ang malinaw na senyales ng tampering kabilang ang handwritten entries gamit ang ballpen.

Agad pinosasan ang suspek na isinailalim muna sa medical examination bago i-turnover sa mga imbestigador para sa case buildup.

Sasalang sa inquest proceedings sa Mandaluyong City Prosecutor’s Office ang suspek para sa kasong falsification of public document.

Ani NCRPO Director Major Gen. Anthony Aberin, resulta ito ng Enhanced Managing Police Operations (EMPO) na mabilis makatukoy at makapigil ng anumang panloloko’t ilegal na gawain.

80 timbog sa fuel hoarding, profiteering — PNP

ni BRT @News | April 25, 2026

Halos 80 katao ang inaresto dahil sa iba’t ibang fuel violations gaya ng hoarding, profiteering at gas-and-go incidents.

Ayon kay Philippine National Police Spokesperson at Public Information Office Chef PBGen. Randulf Tuano, siyam katao ang naaresto dahil sa hoarding, isang kaso naman ang naitala dahil sa profiteering habang 21 mga paglabag naman ang naitala dahil sa illegal fuel pilferage scheme.

Kasalukuyan ding isinasagawa ang hot pursuit operations laban sa ikatlong suspek sa isang gas-and-go incident sa Payatas, Quezon City.

Napag-alaman na maliban sa naging paglabag nito, mayroon ding mga nakabinbing mga kaso laban sa suspek na mayroon namang kinalaman sa ilegal na droga noong 2017 at frustrated murder naman nu'ng 2020.

Samantala, nasa halos 287 na mga gasolinahan na ang naitalang pansamantalang nagsara dahil sa kakulangan ng supply.

Papuntang kulungan... Mobile sumalpok sa pader, 5 suspek patay, 4 pulis sugatan

ni Jeff Tumbado @News | April 25, 2026

Nasawi ang limang persons under police custody matapos bumangga sa pader ang sinasakyan nilang police mobile sa bahagi ng Payatas Road corner Group 5 sa Brgy. Payatas B, Quezon City, kahapon ng umaga.

Kinumpirma ng attending physician ng Rosario Maclang Bautista General Hospital ang pagkamatay ng mga biktima, kung saan sila unang dinala matapos ang insidente.

Napag-alaman sa ulat na bukod sa bilang ng mga nasawi, apat na pulis ang nasugatan at dinala sa magkahiwalay na pagamutan—ang PNP General Hospital at Veterans Memorial Medical Center.

Samantala, nananatiling kritikal ang isang Police Officer Under Cadetship (PUPC) at kasalukuyang inoobserbahan sa operating room bunsod ng tinamong mga sugat sa katawan.

Ayon kay Jennifer Ganaban, Chief ng Public Information Office (PIO) ng Quezon City Police DISTRICT (QCPD), naganap ang insidente pasado alas-11 ng umaga kung saan lulan ang mga biktima sa isang Toyota Hilux pickup ng QCPD.

Patungo sana sa BJMP facility ang police mobile upang ihatid ang mga PUPC nang bigla umanong nawalan ito ng preno dahilan upang sumalpok sa pader.

Patuloy ang imbestigasyon sa insidente.