Emmanuel Peralta, OIC ng PNP

ni Angela Fernando - Trainee @News | April 1, 2024

Itinalaga ni Pangulong Ferdinand "Bongbong" Marcos Jr. si Police Lieutenant General Emmanuel Baloloy Peralta bilang opisyal na tagapamahala ng Philippine National Police (PNP) kasabay ng pagtatapos ng termino ni General Benjamin Acorda bilang PNP Chief nu'ng Linggo, ayon sa Presidential Communications Office (PCO).

Si Peralta ang Acting Deputy Chief for Administration ng PNP, isang posisyong kinatawan niya nu'ng Pebrero 5, 2024.

Matatandaang ang termino ni Acorda ay dapat sanang natapos nu'ng Disyembre 3, 2023, nang siya ay umabot sa mandatory retirement age na 56 ngunit pinahaba pa ni Marcos ang serbisyo nito hanggang Marso 2024.

Patay sa pagkalunod nitong Holy Week, 29 na — PNP

ni Eli San Miguel - Trainee @News | March 31, 2024

Umabot na sa 29 katao ang namatay sa kasagsagan ng Holy Week dahil sa pagkalunod, habang tatlo ang hindi pa natatagpuan, ayon sa Philippine National Police (PNP) nitong Linggo.

Sinabi ni PNP spokesperson Police Colonel Jean Fajardo na may kabuuang 56 insidente na kaugnay ng Holy Week ang naitala hanggang ngayong araw, at 34 dito ang dulot ng pagkalunod.

Mayroon ding dalawang insidente ng pagkalunod na hindi humantong sa pagkasawi dahil nagawa ng mga otoridad na isalba ang dalawang biktima.

Ayon kay Fajardo, nagsimula ang PNP sa pagtanggap ng mga ulat ng insidente ng pagkalunod noong Marso 27, nang magsimula ang mga tao na pumunta sa mga probinsya para sa mahabang weekend. Karamihan sa mga nasabing insidente ang naganap sa mga beach, pribadong resorts, at mga ilog.

Sa kasalukuyan, patuloy pa rin ang PNP sa mataas na antas ng pag-iingat at mananatili pa ring nakatalaga ang mga pulis sa mga pangunahing kalsada, lugar ng turismo, terminal ng mga bus, pantalan, at mga paliparan hanggang sa Abril 1.

34K pulis, ide-deploy sa Holy Week

ni Eli San Miguel - Trainee @News | March 17, 2024

Magde-deploy ang Philippine National Police (PNP) ng 34,000 na police officers sa mga mataong lugar para tiyakin ang seguridad ng publiko sa pagdaraos ng Holy Week.

Sinabi ni PNP spokesperson Police Colonel Jean Fajardo na pananatilihin ng pulisya ang kanilang presensya sa mga simbahan, mga tourist spots, at mga pangunahing kalsada, kabilang ang mga terminal ng bus, paliparan, at pantalan. Maglalagay din ng mga help desks ng pulisya sa mga lugar na ito.

Magsisimula ang Holy Week o Semana Santa ngayong taon sa susunod na linggo, Marso 24, sa Palm Sunday. Magtatagal ito hanggang Marso 30, Black Saturday, at susundan ng Easter Sunday, kung kailan ipinagdiriwang ng mga Katolikong mananampalataya ang muling pagkabuhay ni Hesus.