Inaresto sa Senate shooting, positive sa gunpowder... NBI driver, laya sa P116K piyansa

ni Gina Pleñago @News | May 19, 2026

Photo: PNP

Pansamantalang pinalaya ng Pasay City court matapos maglagak ng piyansang P116,000 ang volunteer driver ng National Bureau of Investigation (NBI) na hinuli dahil sa nangyaring shooting incident sa loob ng Senado noong Mayo 13.

Naglagak si Mel Oragon ng P80,000 sa kasong paglabag sa Republic Act 10591 (Comprehensive Firearms and Ammunition Regulation Act, at P36,000 naman sa direct assault.

Unang inihayag ni Southern Police District (SPD) spokesperson Lt. Margaret Panaga, na base sa paraffin test na isinagawa ng Scene of the Crime Operatives (SOCO), positibo si Oragon sa gunpowder residue.

Ang paghuli ay bunsod ng akusasyong nagpaputok siya sa loob ng Senado noong Miyerkules

Nakumpiska umano kay Oragon ang isang sling bag na naglalaman ng 30 rounds ng 5.56-caliber ammunition at isang maikling magazine na may 15 bala ng .9mm.

Bukod sa dalawang kasong nabanggit, ipinagharap siya ng Pasay City Police ng mga reklamong alarm and scandal, tumults and disturbance of authority, disturbance of public order, resistance and disobedience to a person in proceedings, trespass to property at violation sa Senate security rules.

Lumutang din kahapon sa NBI headquarter si Oragon matapos palayain. 

Kelot, kulong sa pagnanakaw ng petrolyo

ni Jeff Tumbado @News | May 19, 2026

Photo: Quezon City Police District (QCPD)

Kalaboso ang isang lalaki makaraang magnakaw ng diesel na nagkakahalaga ng P2,000 mula sa sasakyan sa Brgy. Payatas, Quezon City, Linggo ng gabi.

Sa ulat ng Quezon City Police District (QCPD), nagsasagawa ng mobile patrol ang mga pulis nang mapansin nila ang suspek na “kahina-hinalang lumalabas” mula sa garahe ng isang bahay sa Villa Gracia compound sa kahabaan ng Payatas Road, pasado alas-9 ng gabi.

Kinilala ng pulisya ang suspek sa alyas Bernard, 28, ng nasabing barangay.

Ayon sa imbestigasyon, may dala umanong galon at container ang suspek kaya agad siyang nilapitan ng mga otoridad at dinala sa barangay hall para kuwestyunin.

Sinabi umano ng suspek na inutusan siya ng pamangkin ng may-ari ng sasakyan na kumuha ng diesel mula sa tangke ng sasakyan para gamitin sa backhoe operations ng kanilang kumpanya.

Gayunman, nang beripikahin ng mga pulis ang pahayag ng suspek, kapwa itinanggi ng may-ari ng sasakyan at ng kanyang pamangkin na nagbigay sila ng utos.

Kinumpirma rin umano ng mga ito na wala nang koneksyon ang suspek sa kanilang kumpanya.

Hindi naman pinangalanan ng QCPD ang kumpanyang sangkot at hindi rin ipinaliwanag kung paano umano nakuha ng suspek ang diesel mula sa tangke ng sasakyan.

Narekober naman sa posesyon ang galon na naglalaman ng 20 litro ng diesel.

Kasalukuyang nasa kustodiya ng pulisya ang suspek habang hinihintay ang pagsasampa ng pormal na reklamo laban sa kanya.

Sa kontrobersyal na raid sa sabungan... ‘Paglilinis’ ng Napolcom at PNP sa mga tauhan, pinalagan

ni Mylene Alfonso @News | May 8, 2026

Photo: File / Coliseo De Manila - FB

Umalma ang Coliseo de Manila matapos ibasura ng National Police Commission (Napolcom) ang reklamo nito laban sa mga tauhan ng CIDG na sumalakay sa kanilang cockpit arena sa Vitas, Tondo, Maynila. 

Ayon sa pamunuan ng sabungan, walang warrant ang operasyon at inabuso umano ng mga pulis ang kanilang kapangyarihan sa isinagawang raid at pagpapasara sa kanilang negosyo nang mahigit 20 araw. 

Iginiit din ng kampo ng sabungan na dalawang beses nang tinanggihan ng Regional Trial Court ng Makati ang aplikasyon ng CIDG para sa cyber warrant na ginamit umano sa operasyon. 

Sa kabila nito, mabilis umanong ibinasura ng Napolcom ang reklamo sa loob lamang ng 16 araw dahil umano sa kakulangan ng probable cause. 

Ayon kay Atty. Carl Jon P. Mucho, kulang sa paliwanag ang resolusyon ng Napolcom at hindi nito nasunod ang requirements ng umiiral na rules sa pagresolba ng administrative cases laban sa mga pulis. 

Kinuwestiyon din ang pahayag ni PNP spokesperson Brig. Gen. Randulf Tuaño na kumuha lamang ng bet ticket bilang ebidensya ang isang pulis at hindi pera mula sa teller. Ayon sa Coliseo de Manila, taliwas dito ang CCTV footage dahil makikita umanong nagbulsa ng pera ang isang pulis habang isinasagawa ang raid. 

Nanindigan ang Coliseo de Manila na itutuloy nila ang mga legal na hakbang laban sa mga sangkot na pulis at sa naging desisyon ng Napolcom.