Mahigit 30, ‘di pa nakikita... Mga nawawalang sabungero, posibleng sinunog na – Duterte

ni Zel Fernandez | May 2, 2022

Kasunod ng balitang may mahigit 30 nawawalang sabungero ang hindi pa nahahahanap matapos ang kontrobersiya sa E-Sabong, hinala ni Pangulong Duterte ay tuluyan na umanong ‘pinatahimik’ ang mga ito.

Kasabay ng naging pagbisita ng pangulo sa San Fernando, Pampanga, para sa pagbubukas ng kauna-unahang OFW Hospital sa bansa, ibinahagi nito ang kanyang suspetsa na posibleng sinunog na umano ang mga katawan ng mga nawawalang sabungero sa bansa.

Pahayag pa ni Pangulong Duterte, sadya umanong mayroong mga pulis na sangkot sa pagkawala ng mahigit 30 sabungero na tukoy na umano sa mga ganu’ng istilo.

Kabilang umano rito ang harap-harapang pagpasok sa isang bahay upang dukutin ang kanilang subject, na naging diskarte na aniya ng ilang tiwaling law enforcement agents tulad ng ilang kapulisan ng PNP.

Samantala, hindi pa rin umano nalilihis ang espekulasyon na ang pananabotahe ng ilang mga sabungero ay nadiskubre ng mga sindikato na maaaring naging sanhi upang dakpin ang mga ito na hanggang ngayon ay wala pa ring ulat sa kinaroroonan o kung buhay pa nga ba ang mga biktima.

Alegasyong pagbitbit ng private army ng isang congressional candidate sa QC, bineberipika na ng QCPD

ni Jeff Tumbado | May 1, 2022

Pinakilos na ni Quezon City Police District (QCPD) Director Brig. General Remus Medina ang kanyang mga tauhan para beripikahin ang impormasyong pagkakaroon ng private army ng isang congressional candidate sa Quezon City.

Ito ang inihayag ni General Medina kaugnay sa napaulat na pagdadala ni Rose Nono-Lin ng kanyang private army sa tuwing nangangampanya.

Si Lin ay kumakandidato bilang kongresista sa ikalimang distrito ng lungsod Quezon.

"We are validating reports regarding the information, we will take action, we will pursue them if it's true," wika ni Medina.

Sinabi pa ni Medina na kanilang aalamin kung sinu-sino ang mga indibidwal na kabilang sa private army ni Nono-Lin.

"As far as the PNP is concerned, possible na may kabilang na pulis sa kanila," pahayag ng opisyal.

Batay sa nakalap na report, hindi bababa sa walong bodyguards na pawang mga armado ng baril ang umano’y kasa-kasama ni Nono-Lin, bukod pa sa mga security personnel na nakatalaga sa mga headquarters nito.

Sa ilalim ng Omnibus Election Code ng Commission on Elections (Comelec), kasabay na rin ng kanilang paghihigpit ay ipinagbabawal ang maraming security escorts sa panahon ng campaign period at pinahihintulutan na dalawa lamang ang nakatokang security details sa bawat local candidate.

Siniguro naman ni General Medina na maipupursige ang kaso laban kay Nono-Lin kung mapatunayan na may private armed group ito.

Binalaan din ni Medina ang lahat ng kandidato sa Quezon City na mahigpit ang utos ni Pangulong Rodrigo Duterte laban sa escorts at private armed groups sa election period at handa aniya ang QCPD na ipatupad ang batas at buwagin ang nasabing mga grupo para sa matiwasay na halalan.

Nauna na ring nahaharap sa mga reklamong vote-buying si Nono-Lin na naipatawag na rin ng Comelec upang ibigay ang panig nito sa mga akusasyon.

Mula sa "change is coming"... Duterte Legacy: Caravan, salamin ng 'tunay na pagbabago' sa bansa

ni Zel Fernandez | May 1, 2022

Ngayong Mayo 1, kasabay ng paggunita sa Araw ng Paggawa ay pinangunahan ng Department of the Interior and Local Government (DILG) at ng Philippine National Police (PNP), sa pakikipagtulungan ng National Task Force to End Local Communist Armed Conflict (NTF-ELCAC), ang culminating activity ng ‘Duterte Legacy: Barangayanihan Caravan’ sa People Power Monument sa Quezon City.

Sa temang, ‘Pagkakaisa ng Mamamayan at Pamahalaan Tungo sa Pagbangon, Kapayapaan at Kaunlaran,’ ang Duterte Legacy Caravan ay naglalayon umanong maipabatid sa publiko ang mga landmark programs ng gobyerno tungo sa hinahangad na tunay na pagbabago at paghahatid ng mga pangunahing serbisyo sa bansa.

Kaugnay ito ng pagtalima sa Executive Order (EO) No. 137 na nagpapalawig ng ‘Aid and Humanitarian Operations Nationwide Convergence Program’ upang mapabuti ang agency coordination at collaboration sa pamamahagi ng mga tulong o suporta sa mga mamamayang Pilipino.

Ang naturang Caravan, na pinaigting katuwang ang Integrated Sustainable Assistance Recovery and Advancement Program (ISARAP), ay tinitiyak na tutulong at susuporta sa mga Pinoy sa panahon ng mga emergencies tulad ng kasalukuyang pandemya dulot ng Coronavirus Disease 2019 (COVID-19).