Kalayaang magprotesta, 'di pinipigilan... Apela ng PNP sa mga raliyista: 'Du'n kayo sa tamang lugar'

ni Zel Fernandez | May 11, 2022

Kasunod ng naging pag-aaklas ng ilang mga kabataan at manggagawa sa harap ng opisina ng Comelec bunsod ng kasalukuyang resulta ng halalan, nakiusap ang Philippine National Police (PNP) sa mga raliyista na gawin ang kanilang kilos-protesta sa tamang lugar.

Ani PNP Director for Operations at Deputy Commander ng Security Task Force for National and Local Elections, P/MGen. Valeriano de Leon, hindi anila pipigilan ang anumang uri ng pagkilos lalo na kung bahagi ito ng malayang paghahayag ng saloobin na naaayon sa pagiging demokratikong bansa ng Pilipinas.

Paliwanag pa ng PNP, iginagalang ng ahensiya ang karapatang maghayag ng saloobin ng bawat Pilipino, salig sa itinatadhana ng Saligang Batas.

Ngunit, apela ni De Leon sa mga nais masagawa ng mga kilos-protesta, maging mahinahon at tiyaking hindi ito magdudulot ng abala sa mas nakararami, lalo pa ngayon na halos normal na muli ang sitwasyon pagkaraan ng eleksiyon.

Kaugnay nito, nauna nang nagbabala si PNP Officer-In-Charge, P/LtG. Vicente Danao, Jr. na sakaling mayroong umanong magmatigas o magpumilit pa ring ipagsawalambahala at labagin ang batas ay gagamitin nito ang buong puwersa upang managot ang mga nasa likod ng anumang uri ng marahas na pamamaraan ng protesta.

Duterte, tiwala sa mga pulis at militar... Mga manggugulo sa proklamasyon ng bagong pangulo, lagot!

ni Zel Fernandez | May 10, 2022

Buo ang tiwala ni Pangulong Rodrigo Duterte sa mga pulis at militar ng bansa na tatalima ang mga ito sa kanilang mandato at hindi umano magpapagamit sa sinumang magtatangkang mapigilan ang pag-upo ng maihahalal na bagong pangulo ng Pilipinas.

Pahayag ng Punong Ehekutibo, kumpiyansa umano siya at walang halong pagdududa na hindi hahayaan ng Armed Forces of the Philippines at Philippine National Police na mamayani ang kaguluhan sa nalalapit na post-election, kasabay ng pananatiling matapat ang bawat isa sa kanilang sinumpaang tungkulin sa pagpapanatili ng kapayapaan at kaayusan sa bansa.

Giit ng pangulo, huwag aniya sanang malimutan ng mga nagpaplanong manggulo sa maihahalal na susunod na lider na siya pa rin ang kasalukuyang pangulo ng bansa at hindi niya hahayaang umusbong ang anumang uri ng kaguluhan sa proklamasyon ng papalit na pinuno ng Pilipinas.

Mga pasaway, nagkalat ngayong eleksiyon... Higit 3K gun ban violators, naitala ng PNP

ni Zel Fernandez | May 9, 2022

Kasunod ng pagpapatupad ng gun ban kaugnay ng 2022 national at local elections, naitala ng Philippine National Police (PNP) ang patuloy pang pagtaas ng bilang ng mga lumalabag sa inilabas na kautusan ng Commission on Elections (Comelec).

Batay sa pinakahuling datos ng PNP, pumalo na umano sa 3,128 ang kabuuang bilang ng mga gun ban violators mula sa 2,975 sa ikinasang operasyon mula Enero 9 hanggang alas-12 ng tanghali ngayong araw ng Mayo 9.

Ayon sa ulat ng PNP, karamihan sa mga nahuli ay pawang mga sibilyan na nasa 3,008; mga security guards na nasa 53; mga tauhan ng PNP na nasa 22; Armed Forces of the Philippines (AFP) personnel na nasa 19; at iba pang mga nahuli na umabot sa 26.

Tinataya namang aabot sa 2,416 na mga armas ang nakumpiska ng PNP sa kanilang mga operasyon kung saan ang mga deadly weapon ay nasa 1,143, kabilang na ang 123 mga pampasabog, kasama ang 14,094 na balang nasabat sa mga isinagawang operasyon.

Samantala, nananatiling may pinakamaraming naitalang gun ban violators sa National Capital Region (NCR) na may 1,142; sinundan ng CALABARZON na may 340; Central Visayas na nasa 332; ang Central Luzon na mayroong 280; at Western Visayas na umabot sa 187.

Gayunman, hindi pa umano kabilang dito ang mga armas na ginamit sa mga pag-atake sa Lanao del Sur at Maguindanao, na kapwa may naitalang mga sugatan at nasawi sa mga insidente.