Ugnayan ng 'Pinas sa ASEAN at Japan, may magandang dulot

ni Angela Fernando - Trainee @News | December 17, 2023

Nagpahayag si Pangulong Ferdinand "Bongbong" Marcos Jr. nitong Linggo ng paniniwalang magkakaroon ng mas malinaw na kinabukasan dahil sa 50 taong maayos na relasyon sa bansang Japan at  Association of Southeast Asian Nations (ASEAN).

Nagpasalamat si Marcos sa pamahalaan ng Japan, sa kanyang partisipasyon sa ikalawang sesyon ng ASEAN-Japan Commemorative Summit, sa kanilang dedikasyon at suporta para sa mga inisyatibong nagtataguyod ng maayos na relasyon at pagkakaibigan sa mga mamamayan ng ASEAN at Japan.

Saad n’ya, “We look forward to ASEAN’s and Japan’s continued partnership beyond the 50th year of ASEAN-Japan Friendship and Cooperation. We have done much in the previous 50 years. I believe the future can even be brighter.”

Umaasa din ang Presidente na  magpapatuloy ang Japan-East Asia Network of Exchange for Students and Youths (JENESYS), sa programang naging pangunahing bahagi sa pagtataguyod ng panghabambuhay na kaugnayan ng pagkakaibigan at pagkakaisa sa pagitan ng mga kabataan sa ASEAN at Japan.

'Pinas at pandaigdigang komunidad, dapat igiit ang responsableng pagkilos ng China

ni Angela Fernando - Trainee @News | December 15, 2023

Binigyang-diin ni Defense Secretary Gilberto Teodoro Jr. nitong Biyernes na dapat igiit sa China ng 'Pinas at ng pandaigdigang komunidad na kumilos ng responsable sa gitna ng patuloy at tumataas na tensyon sa West Philippine Sea.

Ayon kay Teodoro, patuloy na gumagamit ang China ng mga "swarming tactics" sa loob ng exclusive economic zone (EEZ) ng 'Pinas. 

Dagdag niya, ang bansa ay dapat na tuluyang alisin ang mga barko ng China ngunit mas madali itong sabihin kaysa gawin.

Aniya, "It is a question for the whole world to [be] worried about, because if the South China Sea is constricted by China, then your supply chains are affected, international maritime order is affected, and for us in the Philippines, if we are not able to secure our EEZ, our existences as an archipelagic country under UNCLOS is in peril."

 Dapat ding ipagpatuloy ng bansa ang kanyang impetus ng 'proactive diplomacy' at pakikipag-ugnayan sa iba pang mga bansa na may parehong pananaw sa rehiyon at sa labas ng rehiyon, saad ng defense chief.

Ito ay matapos na matanong si Teodoro tungkol sa presensya ng mga barkong militar ng China sa Ayungin Shoal.

Patakaran sa pangingisda sa WPS, dapat hingin ng 'Pinas sa int'l tribunal — Carpio

ni Angela Fernando - Trainee @News | December 13, 2023

Inirekomenda ni Retired Supreme Court Senior Associate Justice Antonio Carpio nitong Miyerkules na humingi ang gobyerno ng 'Pinas ng tulong mula sa pandaigdigang tribunal na magtakda ng mga patakaran sa pangingisda para sa mangingisda ng bansa, China, at Vietnam sa Scarborough Shoal.

Saad niya, "What we should do is to lay the ground rules because we must determine how many tons per year can each side catch at their end. We also have to allow the fish to recover. There will be a fishing season and an off season for fishing."

Aniya, dapat daw itong i-propose sa China at Vietnam at lumapit na sa tribunal kung hindi papayag ang dalawang bansa upang ang tribunal na mismo ang magtakda ng mga patakaran na batay sa rekomendasyon ng 'Pinas.

Ayon pa sa kanya, dapat na magkaroon ng aktibong pagmumungkahi ng mga patakaran sa teritoryo ng bansa.