Tuloy-tuloy na paglaki ng benepisyo, tiniyak ng PhilHealth

by Info @Brand Zone | September 9, 2024

Ito ang mariing tiniyak ni PhilHealth President and CEO Emmanuel R. Ledesma, Jr. bunsod ng sunod-sunod na anunsiyo ng paglawak at paglaki ng mga benefit package ng ahensiya na nagsimula pa noong nakaraang taon. 

"Hindi maikakaila na nakikita at nararamdaman na ng mga miyembro ang mas pinagbuting benepisyo nila sa PhilHealth. Sinimulan natin ito sa dialysis kung saan sinagot na natin ang lahat ng sesyon sa isang taon at itinaas pa ang bayad sa bawat sesyon," giit ni Ledesma.

Matatandaang mula sa 90 ay ginawang 156 sesyon na ang sakop ng PhilHealth, at mula P2,600 ay itinaas sa P4,000 ang kada sesyon, na papalo sa P624,000 kada taon mula sa dating P405,600. Idagdag pa na permanente na at ginawa pang "no balance billing" ito ng ahensiya para masigurong mararamdaman ito ng mga pasyente. 

"Naririnig namin ang hinaing ng mga kababayan natin na matulungan sila sa magastos na pagpapagamot. Nakikita at nararamdaman natin iyan sa ating pakikipag-panayam sa mga pasyente. Minamadali namin ang pagpapabuti ng mga benepisyo. Sinimulan lamang namin ito sa mga malulubhang sakit dahil talagang nakakabutas ng bulsa ang gamutan gaya ng breast cancer, pulmunya, stroke, asthma at iba pa,” paliwanag ng hepe ng PhilHealth. 

“Kami po ay humihingi ng kaunting pag-unawa sa ating mga kababayan, sapagka’t ang pagpapalawak ng mga serbisyo ay nagmumula sa masinsin at maigting na proseso ng pag-aaral, hindi lamang upang maisaayos ito, ngunit para mailunsad ito sa paraang makabubuti sa nakararami. Walang pagod ang mga kasamahan namin para itaas at palawakin ang mga benepisyong ito upang ipadama sa mga pasyente ang kalinga ng ating pambansang kaseguruhan,” aniya.

Ayon sa health insurance agency, higit-dobleng umento ang ipinatupad nito sa hemorrhagic stroke (P80,000 mula P38,000), ischemic stroke (P76,000 mula P28,000), bronchial asthma (P22,488 mula P9,000), neonatal sepsis (P25,793 mula P11,700), at iba pa.

Ibinida rin nito ang 1,400 porsyentong pagtaas sa Z benefit package sa breast cancer, o hanggang P1.4 milyon mula sa dating P100,000. Idinagdag din ang ultrasound at mammogram sa Konsulta package na libreng mapapakinabangan ng mga kababaihan para maagapan ang breast cancer. Ito ay bukod pa sa 13 laboratoryo at 21 gamot na kasalukuyang makukuha nang libre mula sa higit 2,000 Konsulta providers sa bansa.         

Nitong Pebrero, lahat ng case rates ay itinaas ng 30 porsyento, at isa pang paghigit ng

30 porsyento ang ipatutupad ng PhilHealth bago matapos ang taong 2024. Sa isang panayam ay pinatotohanan ni Dr. Jose Rene de Grano, pangulo ng Private Hospitals Association of the Philippines (PHAPI) na, “there was an increase by 30 percent and I think another 30 percent, so magiging malaki na ‘yan, magiging 60 percent na ‘yan. Okay na ho ‘yan, basta walang babayaran halos ang pasyente,” wika niya.

Bukod dito, asahan din ang paglaki sa iba pang benepisyo bago matapos ang taon tulad ng chemotherapy para sa kanser sa baga, atay, cervical at prostate, kasama na rin ang emergency care, open-heart surgeries, ischemic heart disease with myocardial infarction, ST Elevation Myocardial Infarction (STEMI), cataract extraction, peritoneal dialysis, post-kidney transplant, physical and medical rehabilitation, at malubhang dengue.

Iginiit pa ni Ledesma na ang mga hakbanging ito ay para mapagaan ang gastusin ng pasyente sa pagpapagamot at mailaan ang kanilang pera sa iba pang mahalagang bagay.    

"Sa pinagbuting mga benepisyo ay hindi na kailangang mangutang o magsangla ang ating mga kababayan. Sasagutin ng PhilHealth ang malaking bahagi ng gastos sa mga admission sa ward accommodation ng mga ospital, pampubliko man o pribado. Higit sa lahat, mas mapagtutuunan nila ang pagpapagaling mula sa kanilang karamdaman," pagtatapos niya.

---

Benepisyong handog ng PhilHealth!

Protektahan natin ang kalusugan ng bawat Filipino.

Para sa detalye: Maaaring bisitahin ang official website ng PhilHealth sa www.philhealth.gov.ph. CALLBACK CHANNEL: 0917-8987442 (I-text ang "PHIC callback <space> mobile number o Metro Manila landline ninyo <space> tanong o concern" at kami ang tatawag sa inyo.)

PhilHealth Outpatient Benefits para sa Severe Acute Malnutrition, kasado na!

by Info @Brand Zone | August 23, 2024

Isang bagong benepisyo na naman ang inilabas ng PhilHealth. Ang Outpatient Therapeutic Care (OTC) Benefits Package for Severe Acute Malnutrition (SAM) na inanunsyo ng ahensya sa kanilang Circular No. 2024-0017. Talagang hindi tumitigil ang PhilHealth sa pagpapalawak ng mga benepisyo para sa mga Filipino, lalo na sa ating mga kabataan na higit na nangangailangan ng benepisyo.

Ayon sa datos ng World Health Organization (WHO), umabot na sa 1.5 milyong batang Filipino ang apektado ng malnutrisyon. Katunayan, ang Pilipinas ang isa sa may pinakamataas na kaso ng SAM sa buong Asya at patuloy na nakakaapekto sa ating mga kabataan sa kabila ng mga programang ipinatutupad ng ating pamahalaan.

Kaya naman ang bagong PhilHealth OTC-SAM benefit ay tiyak na makatutulong sa gamutan at tamang pag-alaga ng mga batang apektado ng SAM. Ang benefit package ay nakadepende sa edad ng bata – una para sa mga sanggol na mas bata sa 6 months at isa naman para sa edad 6 months hanggang 5 years old.

Para maka-avail ng benefit, ang bata ay kailangang ma-assess sa isang accredited health facility at makapasa sa criteriam ng PIMAM o Philippine Integrated Management for Acute Malnutrition tulad ng edad, sukat at proportion ng mga sanggol at bata, at iba pang clinical eligibility criteria.

Ang mga serbisyong pwedeng makuha sa package ay ang mismong assessment na gagawin sa mga PhilHealth-accredited facilities, kasama na ang counseling sa nutrisyon at tamang pagpapakain sa mga sanggol at bata, exclusive breastfeeding support, child development and nurturing care, at lingguhang follow-up visit ng duktor. Para sa mga 6 months hanggang 5 years old, kasama na rin ang pagbibigay ng ready-to-use therapeutic food o RUTF na rekomendado ng WHO.

Ang benefit package ay hanggang P7,500 ang para sa mga sanggol na less than 6 months old at P17,000 naman taun-taon para sa mga batang 6 months to 5 years old. Ito ay babayaran ng PhilHealth sa accredited-facilities nang dalawang hulog, paunang bayad matapos ang initial assessment (P1,500 para sa mga sanggol) at P2,000 (para sa mga batang hanggang limang taon) at ang susunod na natitirang halaga ay ibabayad matapos ang mga follow-up visits na aabot hanggang 15 visits.

Tandaan na walang dapat bayaran ang ang mga magulang ng pasyente. Hindi dapat singilin ng pasilidad ang anumang halagang sosobra sa benefit package ng PhilHealth. Sagot ng ahensya ang buong gamutan! Ang OTC Benefits Package for SAM ay maaaring gamitin sa mga rural health units, barangay health stations, at primary care providers.

Mag-antabay sa anunsyo ng PhilHealth para sa listahan ng OTC-SAM providers na maaari ninyong puntahan para sa mabuting kalusugan ng inyong mga anak!

ePhilHealth mo na yan!

by Info @Brand Zone | August 16, 2024

Ipinabatid kamakailan ng Philippine Health Insurance Corporation (PhilHealth)  na bahagi na ng eGovPH Super App ang sarili nitong Member Portal. Ito ay upang lalong mapadali ang access sa mga PhilHealth information ng mga miyembro alinsunod na rin sa panawagan ni Pangulong Ferdinand “Bongbong” Marcos Jr. na padaliin ang mga transaksyon sa gobyerno sa pamamagitan ng digitalization.

Ang eGovPH Super App ay isang one-stop-shop platform kung saan mabilis nang makakapag-transaksyon ang publiko sa iba’t-ibang ahensya ng gobyerno tulad ng PhilHealth, SSS, GSIS, PAG-IBIG, at mga lokal na pamahalaan.

---

Bumisita sa www.philhealth.gov.ph/ at i-follow ang Facebook page na @Philhealth Official at X account @teamphilhealth upang masubaybayan ang mga bagong impormasyon tungkol sa mga programa at serbisyo ng PhilHealth.