Gobyerno nakikipag-ugnayan na sa Pfizer hinggil sa pagbili ng antiviral COVID-19 pill na Paxlovid

ni Jasmin Joy Evangelista | January 6, 2022

Nakikipag-ugnayan na ang gobyerno sa US drugmaker na Pfizer hinggil sa pagbili ng antiviral COVID-19 pill, ayon kay Health Secretary Francisco Duque nitong Miyerkules.

Ayon kay Duque, nakikipag-talakayan na ang team ng DOH kay Philippine Ambassador to the US Jose Romualdez at sa Pfizer representatives hinggil sa pagbili ng Paxlovid.

“Pinagusapan na ano ang pinakamabilis na pamamaraan na maka-secure tayo ng treatment course of Paxlovid,” ani DOH chief sa isang public briefing.

Sinabi rin ni Duque na inatasan na niya ang Food and Drug Administration (FDA) na pag-submit-in ang Pfizer ng emergency use authorization (EAU) sa paggamit ng Paxlovid sa sandaling pumirma na siya ng confidentiality agreement para sa pagbili ng naturang gamot.

“We are proactive, I reassure you that we are doing everything. And I’ve already instructed FDA to make sure that after I’ve signed the confidentiality disclosure agreement they should already prod Pfizer to already apply for an EUA. We need to go through the process,” ani Duque sa Go Negosyo forum.

Matatandaang sinabi ni Duque na mas mataas ang efficacy rate ng Paxlovid kumpara sa Molnupiravir.

Noong Disyembre 22, binigyan na ng authorization ng Estados Unidos ang Paxlovid para gamitin sa mga batang edad 12 pataas.

Ayon naman sa clinical trials ng Pfizer, ang Paxlovid ay may 90% efficacy rate para maiwasan ang pagkaka-ospital at pagkamatay ng pasyente na may COVID-19.

“There are other treatment options I believe where the report of effectiveness is relatively much higher, an example of which is Paxlovid,” ani Duque.

“We continue to assess and evaluate the data because bago kasi lahat ito eh, just as Omicron is new, there are also new treatment modalities or options that will need continuing assessment or evaluation because you also have to be mindful of the potential adverse effects or side effects of these untested drugs and medicines,” dagdag pa niya.

Karagdagang 300K doses ng Pfizer COVID-19 vaccines na binili ng pamahalaan, dumating na

ni Jasmin Joy Evangelista | December 29, 2021

Dumating na ang karagdagang 367,380 doses ng COVID-19 vaccines na binili ng gobyerno nitong Martes nang gabi.

Lumapag ang panibagong batch ng bakuna ganap na 9:05 p.m. lulan ng Hong Kong Air flight LD456 sa Ninoy Aquino International Airport Terminal 3.

Ito ay bahagi ng kabuuang 1,553,930 doses ng Pfizer COVID-19 vaccines na binili ng pamahalaan. Unang dumating noong Lunes ng gabi ang 1,187,550 doses ng bakuna.

Ayon kay National Task Forces Against COVID-19 special medical adviser Dr. Ted Herbosa, umaabot na sa 205 million doses ng bakuna ang dumating sa Pilipinas.

"To date, we have landed already 205 million doses of COVID-19 vaccines. We have landed over 59 million (Pfizer COVID-19 vaccines), 39 million procured by the government and another 20 million donated to us,” aniya. 

Sa ngayon ay nasa 48 milyon na ang fully vaccinated sa bansa at nasa mahigit 50 milyon naman ang naghihintay na ng kanilnh second dose.

Posible na ring masimulan ang pagbabakuna sa mga kabataan sa susunod na taon.

Halos 1M doses ng Pfizer vaccine, dumating na sa bansa

ni Jasmin Joy Evangelista | December 21, 2021

Dumating na sa NAIA Terminal 3 nitong Lunes (Dis. 20) ng gabi ang eroplanong may dala ng 976,950 doses ng government-procured Pfizer COVID-19 vaccine.

Ayon sa National Task Force Against COVID-19, ang 976,950 Pfizer doses ay binili ng gobyerno sa pamamagitan ng Asian Development Bank. Lumapag ang delivery sa Ninoy Aquino International Airport Terminal 3 bandang 9 p.m.

Kahapon din ay natanggap ng Pilipinas ang 1,776,060 doses ng Pfizer na donasyon ng United States.

Mula nang magsimula ang vaccine deliveries sa bansa noong Pebrero, umabot na sa 187,165,885 ang COVID-19 vaccines ng Pilipinas as of December 20, kung saan, 107,259,520 dito ay binili ng national government.

As of December 19, nakapag-administer na ang bansa ng 100,907,667 vaccine doses.

Nasa tinatayang 43.5 milyong Pilipino naman ang fully vaccinated na.