Dahil sa pambobomba sa MSU Gym... Seguridad, pinaigting ng PCG

ni Angela Fernando - Trainee @News | December 5, 2023

Nagpahayag ang Philippine Coast Guard (PCG) ngayong Martes na kanilang pinalakas ang mga hakbang sa seguridad matapos ang kamakailang pagsabog ng bomba sa Mindanao State University (MSU) sa Marawi City.

Ayon kay PCG spokesperson Rear Admiral Armand Balilo sa isang Bagong Pilipinas Ngayon Public briefing, itinaas na ang antas ng babala sa ahensya dahil sa insidente sa MSU.

Aniya, nagdagdag sila ng tauhan sa mga nakikita nilang maaaring maapektuhan ng pambobomba lalo na sa mga port na involved sa bahagi ng Mindanao.

Saad ni Balilo, dinagdagan na rin nila ang mga naka-deploy na K9 units sa gitna ng pinaigting na inspeksyon at pagsusuri sa ports.

Merong mga floating assets na rin ang umiikot sa mga baybayin para sa mas mahigpit na seguridad.

Sinigurado naman ng PCG kasama ang Philippine Ports Authority, Philippine National Police (PNP), at ang Armed Forces of the Philippines (AFP) ang kaligtasan ng mga biyahe at ng mga pasahero.

17 Vietnamese sa lumubog na barko sa Palawan, nailigtas ng PCG

ni Angela Fernando - Trainee @News | November 22, 2023

Nailigtas ng Philippine Coast Guard (PCG) at Philippine National Police Maritime Group ang 17 Vietnamese mula sa lumubog na barko sa Palawan nitong Nobyembre 21.

Tumugon ang PCG sa tawag ng tulong mula sa Viet Hai Star, isang cargo ship mula sa Ho Chi Minh City na may dalang 4K toneladang bigas patungo sa Cagayan de Oro.

Ayon sa ulat, nakapasok ang tubig sa loob ng nasabing sasakyang pandagat at binaha ang loob nito na nauwi sa pagtigil ng barko 800 metro mula sa Balabac Port.

Inabandona nila ang barkong sinasakyan bandang 4:00 ng umaga, Miyerkules, at matagumpay silang nasagip ng mga coast guard at pulis.

Maayos namang narating ng 17 dayuhang miyembro ng tripulasyon ang Balabac Port.

PCG Palawan personnel, dedo sa training

ni Angela Fernando - Trainee @News | November 17, 2023

Patay ang isang kawani ng Philippine Coast Guard (PCG) sa distrito ng Palawan habang nasa gitna ng pagsasanay sa water search and rescue (WASAR) nu'ng Nobyembre 15, ayon sa PCG nitong Biyernes.

Pahayag ng PCG, nawalan ng malay ang isang 27-anyos na personnel sa kanilang 100-meter swim.

Agad namang umaksyon ang kanilang training staff nang mapansin ang pangyayari ngunit idineklara itong walang buhay bandang 9 p.m.

Napag-alamang "hypoxic ischemic encephalopathy secondary to a submersion injury (drowning) and subsequent arrest" ang naging sanhi ng pagkamatay nito.

Sinuspinde ni PCG chief Admiral Ronnie Gil Gavan nitong Huwebes ang kanilang mga pagsasanay na may kinalaman sa WASAR.