Mga mangingisdang Pinoy sa BDM, nadaragdagan na — BFAR

ni Angela Fernando - Trainee @News | February 25, 2024

Nagpahayag ang Bureau of Fisheries and Aquatic Resources (BFAR) kamakailan na 44 na bangka ng mga mangingisda sa Bajo de Masinloc (BDM) o Scarborough Shoal ang binigyan ng tulong sa gasolina ng mga otoridad, na nagpapakitang dumarami na ang mga Pilipino ngayon ang nangingisda sa West Philippine Sea (WPS).

Sinabi ni BFAR Spokesperson Nazario Briguera na 44,900 litro ng diesel, 217 litro ng inumin na tubig, at 20 galon ng malinis na tubig ang ibinigay sa mga mangingisda ng 'Pinas sa rotational deployment ng mga barko ng BFAR at Philippine Coast Guard (PCG) sa shoal.

Saad niya, "Ang maganda nito, kumpara sa nakaraan nating misyon, mas nadagdagan ang mga Filipino fishing boats na nabigyan ng ayuda. From 21 nung nakaraan, ngayon ay nasa 44."

Dagdag ni Briguera, magandang senyales daw ito dahil nagpapakita lang na nadadagdagan na ang mga mangingisda natin sa BDM.

2 mangingisda, na-stranded sa dagat sa Palawan

ni Eli San Miguel - Trainee @News | February 16, 2024

Nasagip ang dalawang mangingisda na na-stranded sa dagat habang nanghuhuli ng isda malapit sa Rizal, Palawan, ayon sa Philippine Coast Guard (PCG) ngayong Biyernes.

Nagkaroon ng problema sa makina ng bangka sina Regie Nalang at Reymond Talaver at na-stranded sa dagat ng isang araw bago nailigtas ng mga tauhan ng Coast Guard Station Western Palawan at Bantay Dagat Rizal malapit sa Sitio Ariringon sa Brgy. Iraan noong Pebrero 14.

Humingi sila ng tulong sa PCG, na nagresulta sa search and rescue operation.

"Upon arrival, the SAR team [provided] them water and food. Fortunately, both fishermen were all in good physical condition," pahayag ng PCG.

Hinila ng SAR team ang nasirang bangka patungo sa pinakamalapit na baybayin sa Brgy. Iraan upang maiwasan ang posibleng aksidente sa dagat.

Pinayuhan ng PCG ang mga lokal na mangingisda na siguruhing nasa maayos na kondisyon ang kanilang mga bangka bago mangisda upang manatiling ligtas.

PCG, sumuporta sa higit sa 100 mangingisdang Pinoy sa BDM

ni Angela Fernando - Trainee @News | February 11, 2024

Sumuporta ang Philippine Coast Guard (PCG) sa mahigit 100 mangingisda na kumumpleto sa kanilang mga operasyon sa seguridad at patrol sa Bajo de Masinloc (BDM) ngayong linggo.

Nag-utos ang Commandant ng Coast Guard na si Admiral Ronnie Gil Gavan nu'ng Pebrero 1 ng pagpapadala ng BRP Teresa Magbanua (MRRV-9701) sa BDM para sa kanilang regular na misyon na bantayan at protektahan ang mga mangingisdang Pinoy sa loob ng exclusive economic zones (EEZ) ng bansa.

Sa loob ng 9 na araw na pagpapatrol, nakipag-ugnayan ang PCG sa mga mangingisda upang alamin ang kanilang mga paraan sa pangingisda at namahagi ng mga food pack at inumin upang suportahan ang kanilang mga pangunahing pangangailangan sa mahabang operasyon sa BDM.

Binantayan ng Magbanua na may timbang na 2,260 tonelada sa kanilang misyon ang apat na barko ng Chinese Coast Guard (CCG) na may mga bow number na 3105, 3302, 3063, at 3064 kasama nito ang apat na barko ng Chinese Maritime Militia.