Gumana ang Never Say Die spirit ng Gins, swak sa semifinals

ni Anthony E. Servinio @Sports | December 28, 2025

Photo: Pinagtulungan sa mahigpit na depensa nila Jeremiah Gray at Japeth Aguilar kapwa ng Ginebra San Miguel ang ginawang pag basket ni Alec Stockton ng Converge FiberXers habang nasa kasagsagan ng kanilang tagpo sa PBA 50th Season Philippine Cup Quarterfinals do or die match sa Araneta Coliseum. REYMUNDO NILLAMA

Nagbunga muli ang "Never Say Die" ng Barangay Ginebra at umulit sa Converge FiberXers sa overtime, 99-98, sa 2025-26 PBA Philippine Cup quarterfinals kagabi sa Araneta Coliseum. Bumira ng three-points si Stephen Holt kasabay ng huling busina para sa tiket sa semifinals. Kahit siyam na puntos lang, napiling Best Player si Holt.

Nanguna sa opensa sina RJ Abarrientos na may 20 at tig-13 sina Scottie Thompson at Jayson David. Pinilit ng Ginebra ang dagdag na limang minuto nang ipasok ni Jeremiah Gray ang tatlong free throw, 86-86, buhat sa foul ni Alec Stockton na may tatlong segundo sa pang-apat na quarter.

Sa overtime, humabol ang Gin Kings mula sa 93-97 butas simula sa malayong tres ni Troy Rosario na may 20 segundo sa orasan. Winalis ng Gin Kings ang dalawang laro para burahin ang twice-to-beat bentahe ng FiberXers.

Susunod sa semifinals para sa Ginebra ang naghihintay na defending champion San Miguel Beermen na pinauwi agad ang NLEX Road Warriors, 101-94, noong Araw ng Pasko. Kinalimutan ng Ginebra ang malambot na pagtatapos ng pangalawang quarter kung saan sinayang nila ang 37-29 lamang at inagaw ng Converge ang bentahe, 40-39.

Bumawi ang Gin Kings at bumalik sa 68-60 ang agwat sa mga shoot nina Abarrientos, David at Ralph Cu. Nagtala ng 25 para sa FiberXers si Juan Gomez de Liano. Sumunod si reserba Archie Concepcion na may 18 at Justin Arana na may 15 at 13 rebound.

Sa Enero 4 magsisimula ang hiwalay na seryeng best-of-seven semifinals. Ang kabilang serye ay sa pagitan ng TNT Tropang 5G at ang mananaig sa Rain Or Shine Elasto Painters at Meralco Bolts.

Beermen kampeon uli sa All-Filipino Cup, sinipa sa grand slam ang Tropang 5G

ni Anthony E. Servinio @Sports | July 25, 2025

Photo by Reymundo Nillama / Bulgar Sports

Nanigurado ang San Miguel Beer at inuwi na ang 2025 PBA Philippine Cup matapos daigin ang TNT Tropang 5G, 107-96, sa Game Six kagabi sa Philsports Arena. Nagwakas ang seryeng best-of-seven, 4-2, at walang iniwan na duda ang Beermen.

Bumalik ang malupit na opensa at nagsama sina June Mar Fajardo at Jericho Cruz para itulak ang Beermen sa kanilang pinakamalaking lamang sa pangatlong quarter, 80-60.

Patuloy na pumalag ang TNT sa likod nina Jordan Heading, Kelly Williams at Almond Vosotros subalit may nakahandang sagot ang Beermen. Walang shoot sa unang tatlong quarter, biglang uminit si Marcio Lassiter para sa mga pandiin na puntos.

Kasama ang mga napapanahong buslo nina Fajardo at Cjay Perez ay sinigurado ang resulta. Parehong nagtapos na may tig-24 puntos sina Fajardo at Perez at humakot din ng 12 rebound si Fajardo.

Nagtapos si Cruz na may 13 at siya rin ang napiling Finals MVP ng PBA Press Corps. Nanguna sa TNT si Calvin Oftana na may 14 ng kanyang 19 sa unang quarter na kinuha ng Tropa, 25-23.

Sumunod sina Williams na may 17 at Brandon Ganuelas-Rosser na may 15. Nagwagi ang TNT sa Game One, 99-96. Bumangon ang Beermen at nagwagi ng tatlong sunod – 98-92, 108-88 at 105-91 – bago humabol ng isa pa ang Tropa sa Game Five, 86-78.

Magpapahinga muna ang mga koponan at magtitipon muli sa Oktubre para sa ika-50 season liga. Magsisimula ang taon sa Philippine Cup kaya ilang buwan malalasap ng Beermen ang tagumpay.

Ross at Fajardo bida sa Game 3 Finals, 2-1 na!

ni Anthony E. Servinio @Sports | July 19, 2025

Photo: PBA PH

Laro ngayong Linggo – MOA 7:30 PM

SMB vs. TNT           

Nakamit ng San Miguel Beer ang mahalagang 2-1 bentahe sa 2025 PBA Philippine Cup Finals matapos ang 108-88 tambakan sa TNT Tropang 5G kagabi sa Araneta Coliseum.  Lilipat ang serye sa MOA Arena para sa Game 4 ngayong Linggo.           

Namayagpag sa ilalim si June Mar Fajardo para magtapos na may 33 puntos at 11 rebound. Naramdaman ng TNT ang pagliban ni Poy Erram na napilay ang bukong-bukong noong Game 2 at nabawasan ng isang magbabantay kay Fajardo.          

Kahit kulang sa manlalaro, maganda ang simula ng Tropa at lumamang, 15-5.  Matiyagang humabol ang SMB hanggang naka-shoot ng magkasunod sina Fajardo at Marcio Lassiter, 52-49, at isang minuto ang nalalabi sa pangalawang quarter.         

Mula roon ay hindi na nakatikim ng bentahe ang TNT at lumayo ng todo ang Beermen.  Ang huling agwat ay siya ring pinakamalaki ng laro.           

Maliban kay Fajardo ay humugot ng lakas ang SMB kay Chris Ross na may 15 mula sa apat na tres. Nag-ambag ng 13 si Jericho Cruz at 12 kay Cjay Perez.         

Nanguna sa TNT si Roger Pogoy na may 16 habang may 15 si Calvin Oftana.  Gumawa ng 14 si Almond Vosotros mula sa apat na three-points habang 13 si Glenn Khobuntin.          

Bago ang Game 4 ay igagawad ang Best Player of the Conference.  Ang mga kandidato ay sina Oftana, Perez at Fajardo.          

Samantala, mukhang hindi aalis at lalahok ang Terrafirma Dyip sa parating na ika-50 taon ng PBA sa Oktubre. Inihayag ni Commissioner Willy Marcial sa mga mamamahayag na hindi nagkasundo ang bibili sana sa prangkisa.