Sinehan at convention halls, gagawing vaccination site

ni Mary Gutierrez Almirañez | April 19, 2021

Pansamantalang gagawing COVID-19 vaccination site ang mga sinehan at convention hall ng SM Supermalls bilang tulong sa pamahalaan para malabanan ang lumalaganap na pandemya sa bansa, ayon kay SM Group President Steven Tan ngayong araw, Abril 19.

Aniya, "We have 30 vaccination sites already across the country from Tuguegarao all the way down to Butuan City in Mindanao… We offered areas like the cinemas, the activity centers, the convention centers. We repurposed them and made them as vaccination sites."

Kaugnay nito, mahigit 600,000 doses ng bakuna ang iniulat na bibilhin ng kumpanya para sa SM employees. Inaasahan namang darating sa ikatlong quarter ang suplay ng AstraZeneca, Sinovac at Moderna, kung saan halos kalahati sa mga empleyado nila ang pumapayag mabakunahan.

"As soon as it is available for us, we will start rolling it out," sabi pa ni Tan.

Matatandaang pinayagan na ni Pangulong Rodrigo Duterte ang mga pribadong kumpanya upang direktang bumili sa manufacturers ng COVID-19 vaccines matapos makalabas ang draft ng Administrative Order mula sa National Task Force (NTF) na pinagbabawalan silang bumili.

Mahigit 50-K petisyon para mapatalsik si Pangulong Duterte

ni Mary Gutierrez Almirañez | April 19, 2021

Halos limampung libo ang pumirma sa inilunsad na online petition upang patalsikin sa puwesto si Pangulong Rodrigo Duterte dahil sa hindi maayos na pamamahala sa lumalaganap na COVID-19 pandemic at sa pakikipag-ugnayan umano nito sa China, batay sa lumabas na resulta ng isinagawang petition ngayong Lunes, Abril 19.

Ayon kay Health Alliance for Democracy Chairperson Dr. Edelina De La Paz, "This statement will attest that people are no longer satisfied. If he doesn’t step down, then at least, the positive effect of this is it has made more people aware, made more people to be able to stand up and speak up." Kabilang sa mga pumirma sa Change.org petition na may titulong ‘Save the Nation! Duterte Resign!’ ay halos 500 medical workers, abogado, negosyante, miyembro ng academe, media workers at civic leaders.

Nilinaw naman ni De La Paz na walang halong pamumulitika ang isinagawang petition.

Aniya, "The situation is already too much. You have the pandemic, which is worsening. One year na tayong naka-lockdown, wala namang nangyayari. Tapos ang sitwasyon sa West Philippine Sea is so volatile that really a policy has to be imposed. Those islands are ours. Ang nakakabahala pa, payag siyang ipalit ang soberanya natin para lang sa bakuna."

Matatandaang sinabi ni Pangulong Duterte sa kanyang public address nitong Huwebes na hindi naman nagkulang sa pagresponde ang gobyerno.

Paliwanag niya, "I'd like to just disabuse the mind of nagkulang tayo. Wala na kayong tiningnan kundi ‘yung kagaguhan n’yo. Hindi tayo nagkulang.

“Baka sabihin n'yo wala naman talagang solusyon ito. Meron po, itong kaharap n’yo, ‘wag na ako, palaos na ako," pagbibida pa niya sa kanyang mga aides o itinalaga sa position.

“Harap ka sa panel, ‘yan… Puro bright ‘yan, puro valedictorian. Alam nila kung anong gawin nila. ‘Wag kayong mag-alala, we chose the right people to run the government,” dagdag pa ng Pangulo.

Sa ngayon ay patuloy pa ring mataas ang kaso ng COVID-19 sa bansa, sa kabila ng ipinatutupad na quarantine restrictions at health protocols.

‘Pinas, gagawa na ng sariling bakuna kontra COVID-19

ni Mary Gutierrez Almirañez | April 16, 2021

Nakahandang sumuporta si Pangulong Rodrigo Duterte sa bawat local companies na interesadong gumawa ng sariling bakuna kontra COVID-19, batay sa naging briefing kagabi.

Aniya, “Itong government procurement of locally produced subject to standard specs and prices, madali lang man ito kung trabahuhin mo ito. I don’t think it would take about one hour or trabahuhin mo sa opisina."

Sa ngayon ay nakikipagtulungan na ang ilang ahensiya ng pamahalaan sa mga eksperto hinggil sa paggawa ng bakuna.

Sabi pa ni Department of Trade Industry (DTI) Secretary Ramon Lopez, “So sa DTI po, inumpisahan ho natin together with DOST at kasama ng ating ibang mga ahensiya, FDA, DOH, ang pakikipag-usap sa mga companies who can possibly start a commercializing and manufacturing of vaccines in the country para hindi tayo totally dependent sa pag-import ng vaccine."

Ipinaliwanag din ni Lopez na kailangan ng mga kumpanya ang suporta ng pamahalaan upang mapabilis ang proseso ng kanilang mga dokumento at makatiyak na uunahin ng gobyernong bilhin ang kanilang maipo-produce na bakuna, sa halip na imported vaccines.

Ayon kay Lopez, “Green lane on getting government permits. They will subscribe to all requirements and submit all the documents. Kailangan lang ma-prioritize para ho mapabilis ang proseso ng pag-put up ng planta dito."

"Second, of course, lahat po ng pumapasok dito, may risk involved din lalo na kung papasok sila, tapos ang gobyerno ay bibili rin abroad. So dito po ay ine-encourage po sana na may government procurement of locally produced vaccines, subject to standards, specs and prices," dagdag pa niya.

Aminado naman ang gobyerno na isa sa mga dahilan kung bakit sila dumepende sa international manufacturers ay dahil wala pang kakayahan noon ang pamahalaan na makagawa ng sariling bakuna kontra COVID-19.