Kahulugan ng nagkikislapang bituin at gagamba

ni Maestra Estrellia de Luna @Panaginip Gabay ng Buhay | July 31, 2024

Analisahin natin ang panaginip na ipinadala ni Cristy ng Bataan.

Dear Maestra,

Napanaginipan ko na nakatingin ako sa langit, at sa mga bituin na nagniningningan. 

Ilang saglit lang, pumasok ako sa aking kuwarto, at may nakita akong malaking gagamba. 

Ano ang ibig sabihin ng panaginip ko?

Naghihintay,

Cristy

---

Sa iyo, Cristy,

Napakaganda ng ibig sabihin ng panaginip mo na nakatingin ka sa langit, lalo na dahil nagniningning ang mga bituin sa langit, ito ay nangangahulugan ng kaligayahan. Mas magniningning ang mga mararanasan mo sa darating na mga araw.

Samantala, ang malaking gagamba na nakita mo sa iyong kuwarto ay nagpapahiwatig ng suwerte. Susuwertehin ka sa lahat ng bagay, at labis-labis na kaligayahan ang mararanasan mo dahil sa sunud-sunod na magagandang pangyayari na darating sa buhay mo.

Matapat na sumasaiyo,

Maestra Estrellia de Luna

Kahulugan ng suka at tsaa

ni Maestra Estrellia de Luna @Panaginip Gabay ng Buhay | July 30, 2024

Analisahin natin ang panaginip na ipinadala ni Rene ng Catanduanes.

Dear Maestra,

Napanaginipan ko na pumunta ako sa kusina nang bigla kong mapansin ang bote ng suka sa ibabaw ng lamesa. Kung titingnan parang napakaasim nito, at maitim na ang kulay. Samantala, napansin ko rin ‘yung tsaa. Ano ang ibig sabihin ng panaginip ko? 

Naghihintay,

Rene

---

Sa iyo, Rene,

Ang ibig sabihin ng panaginip mo na pumunta ka sa kusina, at bigla mong napansin ang bote ng suka na parang napakaasim ay makakarinig ka ng maaasim at maaanghang na salita mula sa taong nakapaligid sa iyo. Mas makakabuting huwag mo na lang sila pansinin kung ayaw mong mauwi sa matinding argumento ang usapan n’yo. Maliban na lang kung gusto mo talagang makipag-debate sa kanila upang mapatunayan na mali sila sa panghuhusga sa iyo.

Samantala, ang ibig sabihin ng tsaa ay makakaranas ka ng mga pangyayari na magdudulot sa iyo ng labis na pag-aalala at  pagkabalisa, subalit kung mag-iingat at magiging alerto ka, maiiwasan mo ito. Maging mapagmatyag at mahinahon upang maiwasan ang mga pangyayaring magdudulot sa iyo ng negatibong epekto.

Matapat na sumasaiyo,

Maestra Estrellia de Luna

Iba’t ibang kahulugan ng sikat ng araw

ni Maestra Estrellia de Luna @Panaginip Gabay ng Buhay | July 29, 2024

Analisahin natin ang panaginip na ipinadala ni George ng Masbate.

Dear Maestra,

Napanaginipan ko na inaabangan ko ang sikat ng araw. Gustung-gusto ko rin ang mag-swimming sa clubhouse namin, at enjoy na enjoy ako. 

Ano ang ibig sabihin ng mga panaginip ko?

Naghihintay,

George

---

Sa iyo, George,

Ang ibig ipahiwatig ng panaginip mo na palagi mong inaabangan ang sikat ng araw ay depende kung ano ang nakikita mo sa sikat ng araw. 

Kung sa panaginip mo ang ganda ng sikat ng araw, ito ay nagpapahiwatig ng tagumpay sa larangan ng pananalapi. Wala kang magiging problema sa pera. Tuluy-tuloy kang susuwertehin pagdating sa pampinansyal, gayundin sa pag-ibig, at magiging mapalad ka pa sa magiging karelasyon mo. 

Kung ang araw naman sa panaginip mo ay patindi nang patindi, at painit nang painit ang sinag, ito ay senyales na makakatanggap ka ng magandang balita. 

Kung papalubog, at madilim naman ang sikat ng araw, ito ay babala ng kaguluhan at hindi magandang pagbabago sa buhay.  

Samantala, ang enjoy na enjoy ka sa swimming pool ay depende rin ang ibig sabihin nito. 

Kung ang ulo mo ay nakalitaw habang nagsu-swimming, ito ay nangangahulugan na magtatagumpay ka sa lahat ng iyong plano sa buhay. 

Subalit, kung nakalubog naman sa tubig ang ulo mo habang nagsu-swimming, ito ay paalala na masasangkot ka sa kaguluhan. 

Matapat na sumasaiyo,

Maestra Estrellia de Luna