Tanda na susuwertehin sa abroad

ni Maestra Estrellia de Luna @Panaginip Gabay ng Buhay | August 15, 2024

Analisahin natin ang panaginip na ipinadala ni Rico ng Ormoc.

Dear Maestra,

Madalas kong mapanaginipan ang mapa at magic. Ano ang ibig sabihin nito? May kaugnayan kaya ito sa balak kong pangingibang-bansa?

Naghihintay,

Rico

---

Sa iyo, Rico,

Kung madalas kang managinip ng mapa, may kaugnayan nga ito sa balak mong pangingibang-bansa. Ito ay tanda na makakapagtrabaho ka roon sa loob ng maraming taon. 

Kung colored ang mapa, ito ay senyales na susuwertehin ka roon at kapag umuwi ka sa ‘Pinas, tiyak na super-yaman mo na. 

Samantala, ang magic ay nangangahulugan ng pagbabago sa iyong kalagayan tungo sa pag-unlad. Aangat na ang kabuhayan mo hanggang sa tuluyan kang yumaman. Ngunit, ito rin ay babala na dapat kang mag-ingat sa mga kaibigan mong mapagkunwari, dahil peke lang lahat ng magandang pakikitungo nila sa iyo, at may binabalak silang masama laban sa iyo na maaaring humantong sa puntong ikakasakit mo. 

Matapat na sumasaiyo,

Maestra Estrellia de Luna

Kahulugan ng mani at oats

ni Maestra Estrellia de Luna @Panaginip Gabay ng Buhay | August 14, 2024

Analisahin natin ang panaginip na ipinadala ni Leonardo ng Camarines Sur.

Dear Maestra,

Napanaginipan ko na ang dami kong biniling mani. Pero hindi ko naman ito makain, dahil ang tigas-tigas. Dinidikdik ko pa ito para lamang matikman at makain.

Samantala, napanaginipan ko rin na naglalakad ako sa bukid na maraming tanim na oats na oks nang anihin.

Ano ang ibig sabihin ng panaginip ko?

Naghihintay,

Leonardo

---

Sa iyo, Leonardo,

Ang ibig sabihin ng mani sa panaginip mo ay kaligayahan at pag-unlad sa buhay.

Ang dinikdik mo ito dahil matigas ay nagpapahiwatig ng pansamantalang kabiguan. Mabibigo ka sa mga binabalak mo, pero pansamantala lang ito, dahil malalampasan mo rin ito. Samantala, ang naglalakad ka sa taniman ng oats, at oks na itong anihin ay nagpapahiwatig na malapit ka nang ikasal sa babaeng napupusuan mo. May mabuti siyang kalooban at maaasahan sa mga gawaing bahay. Ito rin ay nangangahulugang susuwertehin ka sa paglalakbay. Madaragdagan pa ang kita mo, at hindi ka na mamomroblema sa pera.

Matapat na sumasaiyo,

Maestra Estrellia de Luna

Kahulugan ng buwan at karagatan

ni Maestra Estrellia de Luna @Panaginip Gabay ng Buhay | August 13, 2024

Analisahin natin ang panaginip na ipinadala ni Rowena ng Cavite.

Dear Maestra,

Madalas kong mapanaginipan ang buwan at karagatan. Ano ang ibig sabihin ng mga panaginip ko?

Naghihintay,

Rowena

---

Sa iyo, Rowena,

Ang buwan na nakita mo sa iyong panaginip ay nangangahulugan ng tagumpay at kaligayahan sa pag-aasawa. Pero kung nagbabalak pa lang kayong magpakasal, tiyak na liligaya at magiging maayos na ang pagsasama n’yo ng lalaking napupusuan mo. 

Samantala, ang karagatan naman ay sumisimbolo ng pag-unlad sa negosyo, magtatagumpay ka sa kalakalan, at magiging masagana ang ani n’yo lalo na pagdating sa larangan ng agrikultura.

Matapat na sumasaiyo,

Maestra Estrellia de Luna