Kahulugan ng ininsulto at binantaan ng kapitbahay

ni Maestra Estrellia de Luna @Panaginip Gabay ng Buhay | Sep. 19, 2024

Analisahin natin ang panaginip na ipinadala ni Norma ng Masbate.

Dear Maestra,

Hindi ko ka-vibes ang kapitbahay namin, at mainit ang dugo namin sa isa't isa.

Napanaginipan ko na ininsulto niya ang pagkatao ko, at pinagbantaan pa niya ako na may mangyayaring ‘di maganda sa akin. Takot na takot umano ako.

Ano ang ibig sabihin ng panaginip ko? 

Naghihintay,

Norma

---

Sa iyo, Norma,

Ang ibig sabihin ng panaginip mo na ininsulto ka ng kapitbahay mo, at binantaan ka niya ay kamalasan. Mag-aaway kayo ng dyowa mo hanggang sa tuluyan itong mauwi sa hiwalayan. Magtatagal ang hiwalayan n’yo lalo na kung hindi mo babaguhin ang ugali mo na hindi niya gusto.

Samantala, ang takot na takot ka ay babala na may nagbabalak na pabagsakin ka. Mag-ingat ka at talasan mo ang iyong pakiramdam, dahil nandyan lang sa tabi-tabi ang lihim mong kaaway.

Matapat na sumasaiyo,

Maestra Estrellia de Luna

Kahulugan ng sobrang daming langaw

ni Maestra Estrellia de Luna @Panaginip Gabay ng Buhay | September 18, 2024

Analisahin natin ang panaginip na ipinadala ni Lourdes ng Tondo, Manila.

Dear Maestra,

Napanaginipan ko na ang daming langaw sa kusina namin. Kahit ano’ng iwas ang gawin ko, hinahabol at dumadapo pa rin sila sa balat ko. Nangati tuloy ang buong balat ko. 

Ano ang ibig sabihin ng panaginip ko?

Naghihintay,

Lourdes

---

Sa iyo, Lourdes,

Ang ibig sabihin ng panaginip mo na ang daming langaw sa kusina n’yo, kahit ano’ng iwas mo ay hinahabol ka pa rin ay makakaranas ka ng mga nakakainis na pangyayari na halos mawalan ka na ng pasensiya. Ilan sa mga ito ay hindi mo inaasahan, at bigla na lang darating sa buhay mo.  

Samantala, ang kumati ang balat mo dahil dumapo ang mga langaw ay babala ng kalungkutan at hindi magandang kalagayan sa iyong kapaligiran. Mas makabubuti kung pananatilihin mo ang kalinisan sa inyong lugar upang maging matiwasay ang iyong isipan at makaiwas ka rin sa nagbabantang karamdaman.

 Matapat na sumasaiyo,

Maestra Estrellia de Luna

Iba’t ibang kahulugan ng jam

ni Maestra Estrellia de Luna @Panaginip Gabay ng Buhay | September 17, 2024

Analisahin natin ang panaginip na ipinadala ni Rowena ng Naic, Cavite.

Dear Maestra,

Ano ang ibig sabihin kapag madalas kang managinip tungkol sa jam at tea?

Naghihintay,

Rowena 

---

Sa iyo, Rowena,

Maraming kahulugan ang jam. Kung sa panaginip mo ay kumakain ka ng jam, ito ay nangangahulugan ng kabiguan.

Kung binigyan mo naman ng jam ang kasambahay n’yo, ito ay paalala na mag-ingat ka sa mga taong mapagkunwari. Huwag na huwag ka magtitiwala sa mga admirers mo, dahil karamihan sa kanila ay nambobola lang.

Gayundin, hindi ka dapat magtiwala sa mga kaibigan mo, dahil malamang sa malamang sinisiraan ka lang nila. 

Kung kumakain naman kayo ng jam kasama ang mga kaibigan mo, ito ay senyales na may mga kaibigan ka na handang dumamay sa iyo sa lahat ng sandali, lalo na sa oras ng kagipitan. 

Kung ikaw naman mismo ang gumawa ng jam, ito ay nagpapahiwatig na may dadaluhan kang kasal. Isa ka sa aanyayahang sumali sa katuwaang inihanda para sa bagong kasal.

Samantala, ang tea naman ay babala na may paparating na problema sa buhay mo na labis mong ikakabahala at hindi ka mapapalagay hangga’t ‘di nalulutas ito.

Subalit, kung gagamitin mo ang iyong isip, lilipas din agad ito. 

Matapat na sumasaiyo,

Maestra Estrellia de Luna