Kahulugan ng sanla

ni Estrellia de Luna @Panaginip gabay ng buhay | Pebrero 20, 2024

Analisahin natin ang panaginip na ipinadala ni Judith ng Pampanga.

Dear Maestra,

Napanaginipan ko na kausap ko ang mother ko. Sinisisi niya ako dahil sinanla ko ‘yung mga alahas niya. Sa inis ko, pinunit ko ‘yung resibo. Ano ang ibig sabihin ng panaginip ko?

Naghihintay,

Judith

Sa iyo, Judith,

Ang ibig sabihin ng panaginip mo na nakausap mo ang mother mo ay gaganda na ang buhay mo. Magugulat ka na lang dahil hindi mo inaasahan na may pag-asa pa palang umunlad ang buhay mo at makamit ang iyong inaasam. 

Ang sinisisi ka ng mother mo dahil sinanla mo ang mga alahas niya ay nagpapahiwatig na magtatagumpay ka sa binabalak mong negosyo.

Samantala,ang pinunit mo ang resibo ay tanda na matatapos na ang mga pasanin mo sa buhay. Hindi ka na gaanong mag-aalala sa susunod na mga araw. Liligaya at giginhawa ka na rin.

Matapat na sumasaiyo,

Maestra Estrellia de Luna

Senyales na sasagutin na ng babaeng natitipuhan

ni Estrellia de Luna @Panaginip gabay ng buhay | Pebrero 19, 2024

Analisahin natin ang panaginip na ipinadala ni Jonathan ng Naic, Cavite. 

Dear Maestra,

Napanaginipan ko na sumali ako sa fun run, nang biglang umulan pero hindi naman ito malakas, kumbaga ambon lang. At kalaunan, may lumitaw na bahaghari sa langit. 

Ano ang ibig sabihin ng panaginip ko?

Naghihintay,

Jonathan

Sa iyo, Jonathan,

Ang ibig sabihin ng panaginip mo na sumali ka sa fun run ay magtatagumpay ka sa inumpisahan mong negosyo. Ito rin ay nagpapahiwatig na tatanggapin na ng nililigawan mo ang pag-ibig na inaalay mo sa kanya. 

Samantala, ang umabon habang kayo ay tumatakbo, ito ay sign ng kasaganahan at kaligayahan. Sasagana at yayaman ka na. 

Ang paglitaw ng bahaghari sa langit ay nangangahulugan ng mabilis na pagbabago sa kalagayan mo ngayon. Mas gaganda ang buhay mo ngayon kesa dati.

Matapat na sumasaiyo,

Maestra Estrellia de Luna

Babala na makakatanggap ng masamang balita

ni Estrellia de Luna @Panaginip gabay ng buhay | Pebrero 18, 2024

Analisahin natin ang panaginip na ipinadala ni Armando ng Taguig.

Dear Maestra,

Napanaginipan ko na nasa liblib na pook ako, at nakarinig ako ng malakas na tunog ng kanyon. Sa takot ko, tumakbo ako para iligtas ang aking sarili, nang bigla kong nahulog sa kumunoy. 

Ano ang ibig sabihin ng panaginip ko?

Naghihintay,

Armando

Sa iyo, Armando,

Ang ibig sabihin ng panaginip mo na nasa liblib na pook ka, at nakarinig ka ng malakas na tunog ng kanyon ay magkakaroon kayo ng hindi pagkakaunawaan ng mahal mo sa buhay. Magtatalo at magsisigawan kayo hanggang sa tuluyang mag-away. 

Ito rin ay nangangahulugan na may matatanggap kang masamang balita mula sa kaibigan mo na nagtatrabaho sa militar. 

Samantantala, ang tumakbo ka para iligtas ang iyong sarili at bigla kang nahulog sa kumunoy ay nagpapahiwatig na malalagay ka sa panganib dahil sa hindi magandang pag-uugali at pagsasalita mo sa iyong kapwa. Mag-ingat ka sa pagsasalita, iwasan mong maging mapagmataas, at alalahanin mo na ang mapagmataas ay ibinababa habang ang mga taong nagpapakababa ay itinataas.

Matapat na sumasaiyo,

Maestra Estrellia de Luna