Pangingibang-bansa at muling pagnenegosyo, daan para tuluyang yumaman

ni Maestro Honorio Ong @Kapalaran Ayon Sa Palad | September 7, 2024

KATANUNGAN 

1. May negosyo kaming internet café. Noong una ay malakas ang kita rito. Kaya lang mula nang pumasok ang taong 2023, hindi na ganu’n kalakas ang benta, at feeling ko nalulugi na rin kami. 

2. Kung sakaling tuluyan nang malugi ang aming negosyo, gusto ko sanang muling mangibang-bansa. Dati na akong OFW at puwede pa naman ako bumalik doon, dahil nangako dati ‘yung employer ko na tatanggapin umano nila ako, kung sakaling maisipan kong mag-abroad muli.

3. Gayunman, naisipan kong sumangguni sa inyo upang itanong kung ano ba talaga ang dapat naming gawin? Dapat ko na ba talagang isara ang aming negosyo at mag-abroad na lang o dapat ba akong kumuha ng puhunan, dahil baka ganito lang talaga ang negosyo, humihina at muling lalakas lalo na papalapit na ang Kapaskuhan?

KASAGUTAN

1. Kung pagkain ang iyong produkto o ‘di kaya mga bagay na swak ngayong Pasko, tiyak na lalakas nga ang inyong negosyo pagdating ng Kapaskuhan. Pero dahil internet café ang inyong negosyo na ang karaniwang kliyente ay mga estudyante, malamang kahit na dumating pa ang Pasko at Bagong Taon, hindi na talaga lalakas o makaka-recover pa ang nalulugi n’yong negosyo, lalo na lahat ng tao ngayon ay may kani-kanyang ng cellphone at internet connection.

2. Kaya ang pinakamabuti mong gawin ay ‘wag n’yo nang hintayin pang dumating ang Pasko. Kung hindi sapat ang inyong kinikita at nababaon lang kayo sa utang, tuluyan n’yo nang isara ang inyong negosyo. Ito ang nais sabihin ng Guhit ng Negosyo (Drawing A. at B. N-N arrow a.) na agad na nahulog sa pagitan ng palasingsingan at hinlalato (arrow a.) sa kaliwa at kanan mong palad. Pero may isa pang guhit ng negosyo na medyo nag-stay at maayos ang pagkakalinya (N-N arrow b.) sa kaliwa at kanan mong palad. Ibig sabihin, kung mag-iiba ka ng produkto, may pag-asa pang maayos ang nalulugi n’yong kabuhayan.

3. Samantala, kung mag-i-stay ka sa kasalukuyan mong negosyo na hindi naman talaga kumikita, darating ang takdang panahon na tuluyan na kayong malulugi hanggang sa lalo pa kayong mabaon at malubog sa pagkakautang. Gayunman, kung gusto mong ituloy ang pagnenegosyo habang wala pang offer sa abroad o nag-aayos ka pa ng mga papeles, mag-isip ka ng negosyong may kaugnayan sa online selling o kaya pagkain, dahil d’yan kayo aangat at mas kikita ng malaki. 

4. Tungkol naman sa pangingibang-bansa, rito ka mas higit na papalarin kaysa sa negosyo, maliban na lang kung may kaugnayan ito sa pagkain at online business, na madaling kinumpirma ng malinaw at malawak na Travel Line (Drawing A. at B. t-t arrow d.) sa kaliwa at kanan mong palad. Ibig sabihin, tama ang iniisip mong isara ang internet café at bumalik sa ibayong-dagat. Sa nasabing pagbabalik sa abroad upang magtrabaho, ang napakagandang Fate Line (Drawing A. at B. F-F arrow c.) sa kaliwa at kanan mong palad ang nagsasabi na sa muling pamamasukan sa ibayong-dagat, mas madali kang uunlad, makakapag-ipon ng maraming pera hanggang sa muli kayong sumagana at umasenso sa kabuhayan.

MGA DAPAT GAWIN

1. Ayon sa iyong mga datos, Ravena, tulad ng nasabi na sa itaas, bago ka tuluyang malugi at malubog sa pagkakautang, isarado mo na ang iyong internet café at palitan ng negosyong may kaugnayan sa pagkain at online business. 

2. Gayundin, simulan mo na mag-apply sa abroad at habang hindi ka pa tinatawagan, tulad ng nasabi na, unti-unti mong palakasin ang negosyong nabanggit. Kapag nagawa mo ‘yan, sa susunod na taong 2025 hanggang 2026, itatala ang ikalawang mas mabunga at mas mabiyayang pangingibang-bansa sa iyong kapalaran na malinaw na hudyat ng isang panibagong hamon na magreresulta sa iyong pag-asenso at pag-unlad hanggang sa tuluyan kang yumaman.  

Kahit pa torpe at mahiyain... Kelot, ngayong taon papalarin sa lablayp at career

ni Maestro Honorio Ong @Kapalaran Ayon Sa Palad | September 5, 2024

KATANUNGAN

1. Paano ba mawawala ang pagiging mahiyain at mahina ang loob? 27-anyos na ako ngayon, pero wala pa rin akong girlfriend. Maestro, kailan kaya ako magkaka-girlfriend at magkakaroon ng regular na trabaho?

2. Tambay lang kasi ako ngayon, at minsan naman ay nagda-drive ako ng tricycle.

KASAGUTAN

1. Kapansin-pansing may malinaw at mahaba kang Marriage Line (Drawing A. at B. 1-M arrow a.) sa kaliwa at kanan mong palad. Ibig sabihin, maging torpe ka man o hindi, may babae pa rin na mahuhumaling sa iyong kaguwapuhan. Sa sandaling ginusto at minahal mo siya, tiyak na siya na ang iyong mapapangasawa at makakasama habambuhay. 

2. Ang pag-aanalisang magkaka-girlfriend ka at tuluyang makakapag-asawa ay madali namang kinumpirma ng may lower loop mong pirma, na nagsasabing buo at buhay ang iyong libido. Sa sandaling magtuluy-tuloy ito, ang nasabing sexual energy na nabanggit ang siya ring magtutulak sa iyo upang manligaw ng kusa at mag-asawa sa takdang panahong inilaan ng kapalaran.

3. Ang dapat mo lang gawin ngayon, Lawrence, ay maghanap muna ng regular na pagkakakitaan o matinong trabaho para kapag nagka-girlfriend ka na at nagplano na kayong magpakasal, mayroon kayong sapat na salaping madudukot o magagamit para sa itatayo at bubuuin n’yong pamilya.

4. Ayon sa iyong Career Calendar, mas mainam at mas makakabuti kung maghahanap ka ng matatag na mapagkakakitaan sa pamamagitan ng pag-a-apply sa mga factory at iba pang kumpanya na tugma sa skill at kakayahan mo.

DAPAT GAWIN

Sa ganyang paraan at sa pagsunod sa mga binanggit ng paraan sa itaas, sa sariling diskarte at pagsisikap, ayon sa zodiac sign mong Capricorn, na kinumpirma ng matayog na Fate Line (Drawing A . at B. F-F arrow b.). Sa takdang panahong inilaan ng kapalaran, sa taong ding ito ng 2024 – makakatagpo ka ng isang disente, regular, matatag na trabaho at sa trabaho mo rin makikilala ang isang babaeng magiging first and last girlfriend mo.

Kelot, takot mabuking sa ginawang kalokohan

ni Maestro Honorio Ong @Kapalaran Ayon Sa Palad | September 3, 2024

KATANUNGAN

1. May ex-girlfriend ako sa aming probinsya. Pero sa kasamaang palad, hindi kami ang nagkatuluyan. Mga bata pa kasi kami noon at inosente pa. Siya talaga ang gusto kong mapangasawa. Kaya lang, wala kaming nagawa nang paglayuin kami ng tadhana at nu’ng panahong kailangan niyang mag-abroad. Mula noon, itinuring ko na lang na hindi kami talaga ang para sa isa't isa.

2. Makalipas ang maraming taon, bigla akong nakatanggap ng friend request sa FB at nang tingnan ko ang pangalan, nagulat ako dahil pangalan 'yun ng ex-girlfriend ko.

3. Nang makita ko 'yun, tuwang-tuwa ako at wala akong sinayang na pagkakataon. Kinamusta ko siya at nagkausap kami. Mula noon, muling nabuhay ang sigla ko sa bawat araw dahil naging magkaibigan ulit kami. Hanggang sa magpasya kaming magkita at nang magkita kami, alam ko sa puso ko na may gusto pa rin ako sa kanya at ganundin siya sa akin. Kaya lang, ang masakit ngayon ay pareho na kaming may sariling pamilya. Gayunman, paminsan-misan ay palihim pa rin kaming nagkikita.

4. Ang gusto kong malaman, Maestro, kung sadya bang nakaguhit sa palad namin na muli kaming pagtatagpuin ng tadhana? Minsan, natatakot din akong mabisto ng asawa niya o asawa ko ang aming ginagawa. 

5. Sa ngayon, some sort of advice lang ang kailangan ko para magkaroon ako ng peace of mind at sana ay magkita tayo nang personal para matingnan mo ang guhit ng aking palad.

6. Masasabi ko ring masaya naman kami ng legal wife ko dahil mabait naman siya at maasikaso.

---

KASAGUTAN 

1. Hindi ka dapat kabahan at wala kang dapat ipag-alala dahil anuman ang namamagitan sa inyong dalawa ng teenage sweetheart mo, hindi masisira ang inyong pamilya, sapagkat kung noong panahong pinaglayo kayo ng tadhana ay wala kayong nagawa, mauulit lang ang mga pangyayari — muli kayong pagtatagpuin at wala rin kayong magagawa para tanggihan ito.

2. Nangyaring ganyan ang kinalabasan ng pag-aanalisa dahil kapansin-pansing nanatiling matino, buo, tuwid at maganda ang kaisa-isang Marriage Line (Drawing A. at B. 1-M arrow a.) sa kaliwa at kanan mong palad. Tanda na kahit magkatikiman pa kayo nang magkatikiman at paulit-ulit na magparaos ng sarap at ligaya, walang duda, mananatili pa rin ang dati mong ugali na mabait at tapat sa iyong asawa, kaya anuman ang mangyari, makakaya mo pa rin siyang iwasan.

3. Ang ikinaganda pa nga nito, ganundin siya, mananatili ang pagiging mabait niyang ina ng tahanan at ulirang misis sa kanyang mister, kaya kapag nagpaalam na kayo sa isa't isa, kapwa kayo masayang babalik sa inyong pamilya.

4. Tulad ng inaasahan, dahil 'yun naman talaga ang nakatakda – ang saglit na ugnayan sa kasalukuyan upang mairaos n'yo ang nausyaming suyuan at pagmamahalan n'yo sa isa’t isa. At kapag nairaos na ulit nang nairaos nang palihim ang sarap at romansa na hindi n'yo naman nagawa nang kayo’y mga bata pa, tulad ng nasabi na, parehong babalik ang katinuan ng isip n'yo, kaya pipiliin n'yong manatili sa orihinal n'yong mga pamilya habambuhay.

MGA DAPAT GAWIN 

1. Habang, ayon sa iyong mga datos, Jack, matapos ang isa, dalawa, tatlo o mahigit pa na palihim n'yong pagkikita at pagde-date ng teenage sweetheart mo, at matapos n'yong mairaos nang paulit-ulit ang nausyaming pagmamahalan at init ng katawan, darating ang eksaktong panahon na maglulubay din kayo upang muling magbalik sa katinuan ang inyong isipan.

2. Minsan, kapag ganu'n na nga ang nangyari, magpapasya na rin kayo na pigilan na muna ang inyong sarili, alang-alang sa inyong pamilya, ibabalik n'yo ang sitwasyon sa isang “ideal family” na tinitingnan ng lipunang inyong ginagalawan, na ang tingin sa inyo ay kapwa kayo mayroong isang simple, maligaya at panghabambuhay na pamilya.

3. At kapag nangyari na 'yun, balik ulit ang inyong buhay sa masayang pamilya. Sa inyong pag-iisa, isang umaga habang nagkakape, sa terahe ng inyong bahay, minamasdan ang mga lantang tangkay ng mga bulaklak sa hardin, sasagi na lamang sa inyong alaala ang minsang kasalanan na inyong nagawa, subalit batid n'yong kailanma’y hinding-hindi na mauulit pa, sapagkat ang mga nakaw na sandali na masarap at maligaya ay sadyang lilipas at matatapos din (Drawing A. at B. h-h arrow b.).