Todo-bigay ng katawan… Bebot na gusto nang magbago, takot gantihan ng kapalaran

ni Maestro Honorio Ong @Kapalaran Ayon Sa Palad | Oct. 5, 2024

KATANUNGAN

1. Seventeen years old ako nang mawala ang aking pagkababae sanhi ng pagiging mapusok namin ng boyfriend ko, pero nang lumaon ay nagkahiwalay din kami. Mula noon, nawalan na ako ng tiwala sa mga lalaki, pero kahit na ganu’n, nagka-boyfriend pa rin ako. Hindi na para umibig, kundi para maghiganti. 

2. Maraming beses ko ring naibigay ang aking pagkababae, at pagtapos nu’n ay agad ko silang nilalayuan, hinahabol nila ako, at may iba pa na umiiyak talaga dahil sobra nila akong minahal.

3. Sa ngayon, dalawa ang boyfriend ko. Naisipan kong sumangguni sa inyo upang malaman kung sino sa kanilang dalawa ang dapat kong seryosohin. Sa edad kong 23, sawa na ako sa pagkadalaga at gusto ko nang mag-asawa at magkaroon ng pamilya.

4. Subalit ang pangamba ko ay baka hindi rin ako seryosohin ng dalawa kong bf dahil hindi na ako virgin nang makuha nila ako. Sa inyong palagay, Maestro, sa panahon ngayon, may mga lalaki pa bang nagpapahalaga sa virginity ng isang babae?

5. Sa nakikita n’yo sa aking mga palad, may maligaya bang pag-aasawa na mangyayari kahit na maraming lalaki akong pinaluha at pinaglaruan?

KASAGUTAN

1. Sa totoo lang, hindi rin masasabing pinaglaruan, pinaasa at pinatikim mo ang mga lalaking nakarelasyon mo. Sa halip, hindi lang ikaw ang naglaro dahil pati sila ay ganundin. 

2. Samantala, kapansin-pansing matapos mawasak at masira nang tuluyan ang Venus Line (Drawing A. at B. V-V) na tinatawag ding Guhit ng Kamunduhan (arrow a.), kasabay nitong nagkabilog at nagkalagut-lagot ang ilang mahahalagang bahagi ng Heart Line (Drawing A. at B. h-h arrow b.) sa kaliwa at kanan mong palad.

3. Tanda na matapos mawala ang iyong virginity, tulad ng iyong ginawa at hinayaang mangyari, kasunod ng pagkasira ng puri, ang puso at damdamin mo naman ang hinayaan mong malunod sa mundo nang ka-immoralan at kawalan ng pagpapahalaga sa iyong pagkababae. 

4. Sa bandang huli, tulad ng iyong inaasahan, ang nagulo at nabiyak na kaisa-isang Marriage Line (Drawing A. at B. 1-M arrow c.) sa kaliwa at kanan mong palad ang nagsasabing may lalaki mang magpakasal at umibig sa iyo, sa pagkawasak ng pamilya at paghihiwalay din hahantong ang lahat. Ang magiging bunga ng inyong pagmamahalan o ang iyong mga magiging anak ay makararanas ng wasak o broken family.

DAPAT GAWIN

Samantala, mabuti na lang may ikalawang Marriage Line (Drawing A. at B. 2- M arrow d.) na umusbong, at namataan sa kaliwa at kanan mong palad, na nagsasabing sa bandang huli, matapos kang pagsawaan at anakan ng kung sinu-sinong lalaki, sa taong 2028, makakatagpo at makakasumpong ka rin ng isang tapat at mapa-mahal na lalaki na nagtataglay ng zodiac sign na Gemini.  Kung saan,  sa kabila ng may mga anak ka na sa pagkadalaga, mamahalin ka niya nang tapat at lubusan, upang sa nasabing panahon, sa edad mong 27 pa taas, siya na rin ang mapapangasawa at makakasama mo sa pagbuo ng isang maligaya at panghabambuhay na pagpapamilya.

Aminadong nasasaktan pa rin… Ginang, ‘di dapat mawalan ng pag-asa, dahil ikalawang pag-aasawa, sure na sure!

ni Maestro Honorio Ong @Kapalaran Ayon Sa Palad | Oct. 1, 2024

KATANUNGAN

1. Wala akong ibang mapaglibangan ngayon kundi ang Facebook, at kapag may free-time naman ako nagti-TikTok din ako. Hiwalay na kami ng asawa ko, pero aaminin ko hanggang ngayon ay mahal na mahal ko pa rin siya. Kaya lang, ano pa ang magagawa ko? Mula nang mag-abroad siya, umuwi lang siya ng isang beses sa amin, at simula nu’n ay ‘di na siya nagparamdam. Ang huli kong balita sa kanya ay nasa ibang bansa pa siya kasama ang kanyang babae.

2. Noong una, masakit talaga pero katagalan ay unti-unti ko ring natanggap na minalas ako sa pag-aasawa. Isa pa, naisip ko rin na kung hindi na talaga siya maligaya sa akin, at hindi na niya ako mahal, wala naman akong magagawa.

3. May trabaho naman ako ngayon, kaya wala na akong pakialam sa kanya dahil kaya ko namang buhayin ang sarili ko at ang dalawa naming anak. Kumbaga, tanggap ko na ang nangyari sa aking kapalaran, at isa na lang talaga ang pinoproblema ko, kung paano ko titiisin ang kalungkutan sa tuwing sumasagi sa isip ko ang pangungulila o pag-iisa.

4. Sa edad kong 33, alam kong kaya ko pang mag-asawa at makatagpo ng lalaking magmamahal sa akin. Pero sa pagkakataong ito, hindi na ako dapat pang magkamali. Kaya Maestro, naisip kong ikaw lang ang makakatulong sa akin upang malaman kung ano ba talaga ang aking magiging kapalaran at paano ko matatagpuan ang lalaking magmamahal sa akin nang tapat at makakasama ko habambuhay? Sana ay matulungan mo ako upang magkaroon din ako ng isang maligaya at panghabambuhay na pamilya. 

KASAGUTAN

1. Tama lang na buksan mong muli ang iyong puso, umibig kang muli at magmahal. Sa ganyang paraan lamang, muli mong mapipitas ang ligayang hindi naipalasap sa iyo ng mister mong nasa piling na ngayon ng ibang kandungan.

2. Sapagkat ayon sa guhit ng iyong palad, tiyak ang magaganap – makakasumpong ka pa rin ng karapat-dapat na lalaki na inilaan sa iyo ng kapalaran, na siya rin namang nais sabihin ng ikalawa at mas malinaw na Marriage Line (Drawing A. at B. 2-M arrow a.) sa kaliwa at kanan mong palad.

3. Ito ay tanda na ang dating kabiguan sa pag-aasawa ay hindi na mauulit, upang sa ikalawang pakikipagrelasyon, mapatunayan ang tunay at talagang dapat mangyari sa mga katulad mong lumalaban at nakatanggap ng reyalidad ng buhay. 

MGA DAPAT GAWIN

1. Tunay ngang may rason, Janna, upang muling magmahal at umibig dahil hindi ka nilikha para malungkot, gayundin, hindi ka nabubuhay ngayon para mangulila at manghinayang sa mga nagdaang kabiguan at pagkakamali sa una mong pag-aasawa, bagkus, nilikha ka upang lumigaya.

2. Gawin mo na ngayon at magagawa mo naman talaga— muli kang umibig at magmahal kung saan ayon sa iyong mga datos, nakatakda mong matagpuan ang ikalawang lalaking makakasama mo isang maligaya at panghabambuhay na pamilya sa susunod na taong 2025, sa buwan ng Mayo o Oktubre, sa edad mong 34 pataas, muli kang magmamahal at habambuhay nang liligaya, hatid ng lalaking isinilang sa zodiac sign na Libra.

Pagiging ina at asawa, nakatakda sa bebot na ready nang tumandang dalaga

ni Maestro Honorio Ong @Kapalaran Ayon Sa Palad | Sep. 29, 2024

KATANUNGAN

1. Masaya na ako sa buhay dalaga. Kaya lang, pinag-aasawa na ako ng mga magulang ko. May kani-kanya na kasing asawa ang mga kapatid ko at ako na lang ang dalaga sa amin. Madalas din akong asarin ng mga officemate ko dahil may hitsura naman daw ako, pero bakit ko raw binuburo ang beauty ko?

2. May mga manliligaw naman ako, pero ‘di ko naman sila type. Mas gugustuhin ko pa ngang mag-isa kesa na may makasamang asungot na lalaki sa buhay ko.

3. Naisipan kong sumangguni sa inyo dahil kapag tiningnan mo ang reyalidad, mahirap din naman talagang tumandang dalaga. At isa pa, mukhang masaya kapag may baby kang kinakarga o inaalagaan.

4. Sa palagay n’yo, okey lang ba na ‘wag na akong mag-asawa o mas maganda na magka-baby na lang? Maestro, makapag-aasawa pa ba ako o dapat ko nang ihanda ang aking sarili sa pagtandang dalaga? Dapat na ba akong mag-ampon o manghiram na lang ako ng pamangkin ko para kung saka-sakaling tumanda akong dalaga, may mag-aalaga pa rin sa akin?

KASAGUTAN 

1. Siyempre, masarap magka-baby, higit lalo kung sa mismong sinapupunan mo nanggaling ang malusog na sanggol upang maranasan mo ang sinasabi nilang, “Joy of being a mom!”

2. Sa totoo lang, masarap maging isang ina— mag-alaga, kumarga, maghele at magpasuso ng isang sanggol, na kapag minamasdan mo habang siya ay yakap-yakap at natutulog ay masasabi mo sa iyong sarili na, “Sa akin talaga ito nanggaling at kamukhang-kamukha ko siya.” 

3. Samantala, kapansin-pansin ang medyo napadulo pero nanatili pa ring malinaw at matatag na kaisa-isang Marriage Line (Drawing A. at B. 1-M arrow a.) sa kaliwa at kanan mong palad.

4. Tanda na kahit ayaw mo pa, natatakot ka, at medyo hindi ka komportable kapag nagka-boyfriend at nag-asawa ka, wala ring magagawa ang kahinaan ng loob at pag-aalala mo. Dahil tulad ng nasabi na, sa takdang panahong inilaan ng kapalaran, isang lalaking balingkinitan ang pangangatawan, medyo kasing-edad mo rin ang darating, liligawan ka niya at dahil sa panahong ‘yun ay masyado ka na ring pine-pressure ng mga taong nasa paligid mo, sa maikling panahon ng kanyang panliligaw, sasagutin mo siya at tuluyan na ring mabubuo ang isang seryoso at maligayang pagmamahalan na hahantong sa isang mabilisan, pero pinaghandaang pagpapakasal.

MGA DAPAT GAWIN

1. Ayon sa iyong mga datos, Honey, bagama’t relaks at kampante na ang buhay mo kahit wala kang boyfriend dahil may trabaho ka naman at wala kang gaanong pinoproblema sa buhay, alalahanin mo pa rin na hindi nananatiling bata at malakas ang iyong pangangatawan. Darating ang panahong tatanda ka at kapag medyo nagkaka-edad ka na at may mga sakit nang nararamdaman, saka mo maiisip ang katotohanang mas okey mag-asawa para may makasama ka sa iyong pagtanda.

2. Base sa iyong mga datos, nakatakdang mangyari sa 2026, sa edad mong 36 pataas ang isang masaya at panghabambuhay na pag-aasawa na itatala sa iyong kapalaran. Lilipas ang isang taon pa at sa panahong isinilang na ang panganay n’yong anak at habang kalung-kalong mo siya, masasabi mong tama si Maestro Honorio Ong, dahil walang kasing sarap sa pakiramdam ang dulot na kaligayahan ang pagkakaroon ng unang anak at ang pakiramdam ng pagiging isang ganap na ina.