Mapalad na araw at buwan para sa magkasintahang balak magpakasal

ni Maestro Honorio Ong @Kapalaran ayon sa Palad | October 06, 2023

KATANUNGAN

Maestro, nais kong ipabasa ang guhit ng aking palad tungkol sa aking pag-aasawa. May boyfriend ako ngayon at balak na naming magpakasal sa susunod na taon. Kaya, nais kong malaman kung anong araw at buwan magandang ikasal? At kung halimbawang natuloy ang pag-iisang-dibdib namin, magiging maunlad, maligaya at panghabambuhay na kaya ang papasukin naming pagpapamilya?

KASAGUTAN

Kapansin-pansing maayos at maganda naman ang pagkakaguhit ng kaisa-isa at makapal na Marriage Line (Drawing A. at B. 1-M arrow a.) sa kaliwa at kanan mong palad, tanda na kung matagal na kayong mag-dyowa ng boyfriend mo, tunay ngang puwede na kayong magpakasal, sa susunod na taong 2024. Ang maligayang pag-aasawa na binabanggit ng kaisa-isa at makapal na Marriage Line (arrow a.) ay madali namang kinumpirma ng walang bilog, hindi nalatid at nakatuntong sa Bundok ng Jupiter na tinatawag ding Bundok ng Kaligayahan (arrow b.) na Heart Line (Drawing A. at B. h-h arrow c.) sa kaliwa at kanan mong palad. Tanda na ang papasukin mong buhay may-asawa ay sigurado namang uunlad at walang duda na maging matagumpay at habambuhay na magiging maligaya.

DAPAT GAWIN

Kaya nga, Kyle, ang zodiac sign mong Virgo at Taurus naman ang boyfriend mo ay nagsasabing mapalad at suweto kayong magsama at magpakasal sa susunod na taong 2024. Mas okey kung sa buwan ng Mayo o Oktubre, sa mga piling petsang 1, 10, 19, o 28 gaganapin ang nasabing pag-iisang-dibdib. Mas mainam din kung itapat ang kasal sa panahong papabilog o papalaki ang buwan sa kalangitan. Ito ang tinatawag na, first quarter or full moon ang buwan sa langit, upang tulad ng papabilog at papabulas na liwanag ng buwan sa kalangitan, magiging papabulas at papaunlad din ang itatayo n’yong pamilya, habambuhay, habang patuloy kayong nagsasama at nagmamahalan.

Pangarap na makasampa sa barko, ngayong taon magaganap

ni Maestro Honorio Ong @Kapalaran ayon sa Palad | October 04, 2023

KATANUNGAN

1. Maestro, matutuloy kaya ang pangingibang-bansa ng mister ko? Matagal na siyang nag-a-apply bilang seaman pero hanggang ngayon ay wala pa ring nangyayari.

2. Feeling ko tuloy niloloko lang kami ng kumpare niya na tumutulong sa kanya. Pero, kahit paano inaabut-abutan naman namin siya ng pamasahe at allowance para maayos niya ang mga papeles ng mister ko. Kung sakaling palarin siya, kailan kaya siya makakasampa sa barko?

KASAGUTAN

Walang magiging problema kung may malinaw na Travel Line (Drawing A. at B. t-t arrow a.) sa kaliwa at kanan palad ng mister mo. Samantala, may namataang malinaw na Travel line (arrow a.) sa kaliwa at kanang palad ng mister mo, isang malawak at malinaw na guhit ng pangingibang-bansa (arrow a.) na nangangahulugang sa hinaharap, makakapag-abroad ang iyong mister hanggang sa tuluyang maging masagana at maunlad ang inyong kabuhayan.

DAPAT GAWIN

Habang ayon sa datos ng iyong mister, Kaira, tiyak ang magaganap, hindi matatapos ang taong ito ng 2023 sa last quarter, sa unang linggo ng Oktubre matutupad na rin sa wakas ang malaon n’yong pangarap – makakasampa na sa barko ang iyong mister, at siya rin ang magiging daan upang tuluy-tuloy na umangat at umunlad ang kabuhayan n’yo.

Kelot na 3 babae ang pinagsabay-sabay ligawan, wa’ maski isa ang ka-compatible

ni Maestro Honorio Ong @Kapalaran ayon sa Palad | October 02, 2023

KATANUNGAN

1. Naisipan kong sumangguni sa inyo dahil hanggang ngayon ay ‘di pa rin ako nagkaka-girlfriend, samantalang 29-anyos na ako. Masipag naman akong manligaw, kaya lang, lagi akong naba-busted ng mga babaeng natitipuhan ko.

2. Pero, hindi pa naman ako nawawalan ng pag-asa. Kaya ngayon, tatlong babae ang sabay-sabay kong nililigawan. May mapapasagot kaya ako sa kanila? Ang mga birthday nila ay August 3, 1998, February 15, 1996 at December 12, 1997 habang September 16, 1994 naman ang birthday ko.

KASAGUTAN

1. Wala sa tatlong babaeng sinasabi mo ang magiging permanenteng mong girlfriend. Ibig sabihin, wala kang mapapasagot sa kanila, dahil hindi mo sila ka-compatible pagdating sa birth date at zodiac sign. Ganito rin naman ang nais sabihin ng pangit, may bilog at may mga putol na Heart Line (Drawing A. at B. h-h arrow a.) sa kaliwa at kanan mong palad. Pero, kapansin-pansin na naayos at gumanda naman ang dating pangit na Heart Line (Drawing A. at B. h-h) sa gitna hanggang sa dulong bahagi (arrow b.) sa kaliwa at kanan mong palad.

2. Ibig sabihin, hindi pa ngayon lulutang ang babaeng hinihintay mong maging girlfriend. Sa halip, approximately o humigit-kumulang sa edad mo pang 30 hanggang 31 siya mami-meet na pinatunayan naman ng kaisa-isang Marriage Line (Drawing A. at B. 1-M arrow c.) na luminya ng lagpas sa kalagitnaang bahagi ng kaliwa at kanan mong palad.

3. Kaya tulad ng nasabi na, ang mas maganda mong gawin ngayon ay mag-ipon ka ng maraming pera, sapagkat sa susunod na taon, kusang darating ang isang babae na magiging girlfriend at makakasama mo habambuhay, darating siya sa isang pagkakataon at sa lugar na hindi mo inaasahan. At dahil sa panahon ngang ‘yun ay magkaka-girlfriend ka na, mas okey kung marami kang budget upang lalong maging masaya at mapanatili mo ang maligaya at panghabambuhay na relasyon.

MGA DAPAT GAWIN

1. Habang, ayon sa iyong mga datos, Luciano, mas makakabuting itigil mo na ang panliligaw sa tatlong babaeng ito dahil malaki ang posibilidad na maba-busted ka na naman.

2. Sa halip, hintayin mong tumuntong ang edad mo sa 30, matapos ang birthday mo sa Setyembre. Sa ganyang paraan, makikita mo na sa panahong tinuran, kusang darating ang babaeng inilaan sa iyo ng kapalaran, na isinilang sa zodiac sign na Taurus, na may birth date na 2, 20, 13, 19 o 29. Siya ang magiging girlfriend at siya na rin ang tuluyan mong mapapangasawa at makakasama sa pagbuo ng maligaya at panghabambuhay na pagpapamilya sa taong 2025 sa edad mong 31 pataas.