Alamin: Mga Dos and Don’ts ng mag-asawang gustong umunlad

ni Maestro Honorio Ong @Kapalaran ayon sa Palad | October 14, 2023

KATANUNGAN

1. Matagal na akong sumusubaybay sa kolum n’yo, kaya naisipan ko ngayong magpaanalisa.

2. May sloping Head Line ako, o medyo nakakurbang pabilog ang dulo ng guhit ng aking palad. Sabi n’yo kasi dati, dapat straight ang Head Line dahil sila ang mga taong yumayaman. Kung hindi yayaman ang may sloping o pakurbang pabilog na Head Line, ano’ng mangyayari sa kanyang kapalaran, lalo na pagdating sa career?

3. Sa ngayon, nag-a-apply ako sa abroad. Ang pinoproblema ko, kapag natuloy ako, sino ang mag-aasikaso sa mga bata? Ngayon kasi, nagtatrabaho rin ang misis ko bilang guro at sabi niya, kahit nasa abroad na ako, hindi pa rin siya magre-resign sa pagtuturo dahil sayang ang benepisyo na matatanggap niya kapag nasa retirement age na siya.

4. Kaya ngayon, kahit may aplikasyon ako sa abroad, nagdadawalang-isip pa rin ako kung tutuloy ako o hindi?

5. Sa palagay n’yo, may maganda bang pag-a-abroad ang nakalaan para sa akin? At kahit sloping ang aking Head Line, puwede rin ba kaming yumaman?

KASAGUTAN

1. Tulad ng kasalukuyan mong attitude sa buhay ang nais ihayag ng sloping Head Line (Drawing A. at B. H-H arrow a.) sa kaliwa at kanan mong palad. Mas nauuna ang negatibong pag-iisip kaysa ang magandang mangyayari sa hinaharap.

2. Isang kongkretong halimbawa ang iniisip mong pag-a-abroad dahil hindi ka pa man natutuloy, sari-saring negatibong bagay at pag-aalinlangan na agad ang pumapasok sa iyong isipan kung saan dahil sloping ang iyong Head Line (H-H arrow a.), na ang ibig sabihin ay imbes na lumawak ay unti-unting dumidikit o lumalapit sa Life Line (arrow b.) ay nangangahulugang malayo na sana ang narating at naabot mo kundi lamang masyado kang “self-conscious” sa mga binabalak, iniisip at ginagawa mo.

3. Dagdag pa rito, hindi lang masyadong “self-conscious”, bagkus, ang mas masaklap pa nito ay katitingin at kapapansin mo sa maaaring mangyari, mas nauuna mong nakikita at pumapasok sa isipan mo ay mga negatibong senaryo. At ang pagiging metikolosong ito ay pinalala pa ng zodiac sign mong Virgo. Tanda na dahil sa pagiging perpeksiyonista, mas nakikita nila ang maliit na mantsa sa kulay puting damit kaysa ang kabuuang kulay at ganda ng nasabing kasuotan.

4. Sa madaling salita, kapag hindi ka nagbago ng pananaw o attitude sa buhay, tulad ng nasabi na, malayo na ang nararating ng mga kasabayan mo at mga kaibigan mo, kayo naman ni misis ay isang kahig at isang tuka pa rin o kaya naman mayayaman na ang mga kasabayan mo. Pero, kahit dalawa pa kayo ni misis na nagtatrabaho mahirap pa rin kayo at maraming utang. Paano nga kasi, masyadong negatibo ang pananaw mo sa halos lahat ng sitwasyon at pangyayaring dumarating sa inyo.

MGA DAPAT GAWIN

1. Habang, ayon sa iyong mga datos, Allan, kapag hindi mo naiwaksi sa iyong isipan ang pag-aalala at alinlangan sa iyong sariling kakayahan kahit patuloy na magturo sa public school si misis at makapag-abroad ka rin, hindi pa rin kayo yayaman.

2. Sa kabilang banda, tandaan mo na magsisimula lamang kayong yumaman sa sandaling naging positibo at praktikal ang laman ng iyong isipan at kapag mas tinitingnan mo nang mas maganda ang bawat pangyayari sa inyong buhay, unti-unti na ring dumiretso ang sloping Head Line (Drawing A. at B. H-H arrow a.) sa kaliwa at kanan mong palad, hanggang sa unti-unting magbalik sa tamang direksyon — ang pagiging tuwid na Head Line (arrow c.) na nagbabadya ng walang dudang pag-unlad hanggang sa tuluyan na ring yumaman ang inyong pamilya na nakatakdang mangyari at maganap sa taong 2025 sa edad mong 32 pataas.

Palad ng bebot na si bf pa rin ang makakatuluyan kahit suko na

ni Maestro Honorio Ong @Kapalaran ayon sa Palad | October 12, 2023

KATANUNGAN

1. Ang gara ng boyfriend ko dahil noong hindi niya pa ako nagagalaw ay mahal na mahal niya ako. Hindi niya raw ako iiwanan at pakakasalan niya umano ako. Pero ngayon, kahit loadan ko siya hindi man lang siya nagte-text o tumatawag sa akin. Naiisip ko tuloy sa ngayon, Maestro, na hindi niya na ako mahal.

2. Kasalukuyang nagtatrabaho ang boyfriend ko at siya ay supervisor at nasa sales department siya, kaya madalas siyang madestino kung saan-saang lugar. Kapag bumabalik siya sa Maynila, saka ko lang siya nakakausap at ang dahilan kaya hindi siya nakakapag-reply sa mga text ko ay dahil wala umano siyang signal.

3. Pero alam mo, Maestro, sa totoo lang ay nayayamot na ako sa ganitong sitwasyon namin. Ano’ng dapat kong gawin, dapat na ba akong makipag-break sa kanya kahit na siya ang nakauna sa akin?

4. Base sa palad ko, kami na ba ang magkakatuluyan o mas mainam na makipag-break na lang ako at humanap ng ibang lalaking magpapahalaga, seseryoso at magmamahal sa akin?

KASAGUTAN

1. Tandaang kaya nakikipag-boyfriend o girlfriend ang isang tao ay para mawala ang pangungulila, para sumaya, may makausap at may makaramay sa mga problema. Kaya kung imbes na saya ay lungkot ang nangyayari sa pakikipag-boyfriend mo at siya pa ang nagiging dahilan ng iyong problema, tama lang kung didispatsahin mo na siya at humanap ka ng ibang lalaking totoong magpapaligaya sa iyo.

2. Marahil, tama lang na makipag-break ka sa kasalukuyan mong boyfriend, upang minsan pa, sa sandaling nawala ka sa buhay niya at nagkataong mahal ka pala talaga niya, sa puntong ‘yun ay maramdaman man lang niya ang tunay mong halaga sa kanyang buhay.

3. Kaya lang, ang nais sabihin ng guhit ng iyong palad, ay hindi na kayo maghihiwalay ng boyfriend mo. Ito ang nais sabihin ng maganda at matatag na kaisa-isang Marriage Line (Drawing A. at B. 1-M arrow a.), na sinuportahan din ng maayos at magandang Heart Line (Drawing A. at B. h-h arrow b.) sa kaliwa at kanan mong palad.

4. Tanda na sa sandaling muli kayong nagkausap nang seryoso at puso sa puso, tiyak ang magaganap. Hindi matatapos ang buwang ito ng Oktubre, walang duda na muli kayong magkakasundo at magiging maligaya.

MGA DAPAT GAWIN

1. Habang, ayon sa iyong mga datos, Jeanelle, sa sandaling naramdaman ng iyong boyfriend na nayayamot at naiinis ka na sa kanya at balak mo nang makipag-break, kusa siyang hihingi sa iyo ng paumanhin at isa pang pabor upang magkausap kayong dalawa.

2. Sa inyong masinsinang pag-uusap, isa lang ang inyong mapagkakasunduan at ito ay ang pasiglahing muli at pag-ibayuhin pa lalo ang inyong relasyon. At sa bandang huli, sa ayaw at sa gusto n’yo, ang takdang kapalaran pa rin ang masusunod kung saan kayo na nga ang magkakatuluyan at masasama sa pagbuo ng isang maunlad at masayang pamilya habambuhay (Drawing A. at B. 1-M arrow a. at h-h arrow b.).

Usap-usapan ang pagiging cheater ni seaman, bebot si bf pa rin ang mapapangasawa

ni Maestro Honorio Ong @Kapalaran ayon sa Palad | October 08, 2023

KATANUNGAN

1. May boyfriend ako, at kasalukuyan siyang nasa barko. Usap-usapan dito sa amin na marami siyang babae. Pero, ‘pag nandito naman siya sa ‘Pinas, wala naman akong napapansin na kakaiba sa kanya.

2. Regular naman ang aming pag-uusap at sabi niya kaunting tiis na lang dahil pagbaba niya sa susunod na taon ay aayusin na raw namin ang aming kasal.

3. Siya na kaya ang mapapangasawa ko? At totoo kaya na marami siyang babae o sinisiraan lang siya ng mga tao rito dahil nakikita nilang masaya ang aming relasyon?

KASAGUTAN

1. Tama ka, Desiree, ikaw ang nobya ng boyfriend mo, at hindi ang mga tsismosa at dalahira sa inyong lugar. Tama ka, ikaw ang unang nakakaramdam kung bukod sa iyo ay may iba pa ngang babae ang boyfriend mo. At dahil feel mo namang tapat siya sa iyo, wala ka na dapat ipag-alala, dahil maaaring naiinggit lang sila sa masayang relasyon n’yo.

2. Anu't anuman ang mangyari, ang kaisa-isa, maganda, makapal at malinaw na Marriage Line (Drawing A. at B. 1-M arrow a.) sa kaliwa at kanan mong palad, ang matibay na datos na dapat mong panghawakan. Kung saan, dahil iisa lang ang malinaw at mahabang Marriage Line (arrow a.) sa kaliwa at kanan mong palad, tulad ng nasabi na, napakalaking posibilidad na kayo na nga ng seaman na boyfriend mo ang magkatuluyan na madali namang kinumpirma at pinatunayan nang maayos, hindi nalatid, at nakatuntong na Heart Line (Drawing A. at B. h-h arrow b.) sa Bundok ng Jupiter (arrow c.) sa kaliwa at kanan mong palad. Ito ay tanda at pangako ng isang panghabambuhay at maligayang pag-aasawa sa takdang panahong inilaan ng kapalaran.

MGA DAPAT GAWIN

1. Sadyang marami talagang nakikisawsaw sa isang relasyon higit lalo kung sikat o kilala ang magkasintahan.

2. Subalit, anu't anuman ang mangyari, mas mainam na ‘wag mo na lang pansinin ang mga naninira sa inyo. Sapagkat, ayon sa iyong mga datos, Desiree, sa unang hati or first quarter ng taong 2025, tiyak ang magaganap, matutupad ang pangako sa iyo ng iyong boyfriend. Magaganap ang inyong pag-iisang-dibdib na magreresulta ng isang maunlad, masayang at panghabambuhay na pagpapamilya.