Pag-ulan, mararanasan sa ilang lugar sa Mindanao —PAGASA

ni Eli San Miguel - Trainee @News | December 4, 2023

Maaaring magkaroon ng pag-ulan sa ilang bahagi ng Mindanao ngayong Lunes dahil sa easterlies, ayon sa Philippine Atmospheric, Geophysical and Astronomical Services Administration (PAGASA).

Sa isang public weather report, sinabi ni PAGASA specialist Benison Estareja na inaasahan ang pag-ulan sa Dinagat Islands at mga lalawigan ng Surigao dahil sa easterlies.

“Sa ating mga kababayan sa Mindanao, pinaka-uulanin ang Dinagat Islands and Surigao provinces dahil sa easterlies. May mga kalat-kalat na thunderstorms sa umaga pero mababawasan ito pagsapit ng hapon hanggang sa gabi,” aniya.

Pinayuhan ni Estareja ang mga residente sa Caraga tungkol sa posibleng pagguho ng lupa dulot ng pag-ulan at sunud-sunod na lindol noong Linggo.

Sa mga natitirang bahagi ng Mindanao, binanggit ni Estareja na maaaring asahan ng Zamboanga Peninsula at ng rehiyon ng Bangsamoro ang maulap na kalangitan na may mataas na tsansang magkaroon ng thunderstorms sa hapon.

Magiging maulan din sa Eastern Visayas ngayong Lunes dahil sa easterlies.

Samantalang inaasahan na magpapatuloy ang northeast monsoon o amihan, na magdadala ng pag-ulan sa mga lalawigan ng Batanes at Cagayan.

2 bagyo, hahataw ngayong Disyembre — PAGASA

ni Angela Fernando - Trainee @News | December 1, 2023

Ayon pa sa PAGASA, may maaaring mamuong dalawang tropikal na bagyo sa loob o pumasok sa Philippine Area of Responsibility ngayong Disyembre.

Matatandaang may tumamang bagyon nu'ng nagdaang Disyembre, sa bandang Eastern Visayas at Caraga.

Maaari namang maranasan sa Batangas, Cavite, at Oriental Mindoro ang tagtuyot bago matapos ang taon dahil sa El Niño, batay sa ulan na natanggap nu'ng Hulyo hanggang Nobyembre.

Magkakaroon ng maayos na panahon ngayong weekend sa bansa, ayon sa forecaster ng PAGASA na si Robert Badrina nitong umaga ng Biyernes.

Magdadala ang Amihan ng maulap na kalangitan na may pag-ulan sa Batanes, Cagayan, Apayao, Isabela, at Aurora.

Maari namang magkaroon ng ilang magaan na pag-ulan sa Ilocos Region at sa iba pang bahagi ng Cordillera, Cagayan Valley, at Central Luzon.

Pinagbawalang lumayag ang malilit na bangka sa karagatan ng Batanes, Babuyan Islands, at Ilocos Norte dahil sa malalaking alon dahil sa Amihan.

Sa Metro Manila at sa iba pang bahagi ng bansa, magiging mainit at maalinsangan na may posibleng mga pag-ulan na may kasamang kidlat, at pag-ulan naman sa hapon at gabi.

Sa pagdating ng weekend, inaasahan na ang limitadong epekto ng Amihan sa Northern Luzon at magpapatuloy sa pagdala ng pag-ulan sa ilang bahagi ng Cagayan Valley.

Samantala, magiging maalinsangan at may mga pag-ulan na may kasamang kidlat at pag-ulan sa hapon o gabi sa ibang bahagi ng bansa sa weekend na ito.

Mas matinding El Niño, ibinabala ng PAGASA

ni Eli San Miguel - Trainee @News | November 30, 2023

Malaking epekto ng El Niño ang paglitaw ng mga tropical cyclone sa area of responsibility ng bansa, ayon sa isang eksperto ng Philippine Atmospheric, Geophysical and Astronomical Services Administration (PAGASA) ngayong Huwebes.

“Ito ang isa sa pinakaepekto ng El Niño dahil 'yung bagyo ay more in the east nabubuo so kapag malayo, hindi na umaabot sa Philippine area of responsibility at mayroong reduction sa frequency na nagla-landfall or cross sa PAR,” sabi ni PAGASA weather specialist Joey Figuracion.

Ayon kay Figuracion, nagdudulot ang El Niño ng mas mataas na humidity at sporadic cloud formation na nakakaapekto sa dalas ng mga bagyo sa bansa.

"Ang bagyo ay isang driver ng tubig-ulan so kung may reduction sa bagyo ay may reduction din sa tubig-ulan dahil 70 percent ng tubig-ulan ay mula sa bagyo,” dagdag niya.

Sa isang climate outlook forum noong ika-22 ng Nobyembre, kinumpirma ng PAGASA na lumala ang El Niño.

Ibig sabihin, mas maaaring maging mas matindi at mas tumagal ang epekto nito sa bansa.