Opisina ni Pres. Yoon ng SK, sinalakay ng pulisya dahil sa martial law

ni Angela Fernando @Overseas News | Dec. 11, 2024

Photo: Hawak ng mga nag-protesta ang larawan nina South Korean President Yoon Suk-yeol at dating Defence Minister Kim Yong-hyun, Dec. 5, 2024 - Disyembre 5, 2024. ( Ahn Young-Joon / AP Photo )

Sinalakay ng South Korean police ang opisina ni Pres. Yoon Suk Yeol, ayon sa isang opisyal ng presidential security ngayong Miyerkules, bilang bahagi ng pinalawak na imbestigasyon kaugnay ng nabigong plano nito na magpatupad ng martial law.

Samantala, si Kim Yong-hyun, dating defense minister at malapit na kaalyado ni Yoon, ay nagtangkang magpakamatay sa detention center kung saan siya nakakulong matapos maaresto.

Ayon sa isang opisyal ng Justice Ministry sa pagdinig ng parliyamento, patuloy na binabantayan ang kanyang kalagayan.

Ang pagsalakay sa opisina ni Yoon ay hakbang sa pinalawak na imbestigasyon laban kay Yoon at mga mataas na opisyal ng pulisya at militar kaugnay ng hindi inaasahang deklarasyon ng martial law nu'ng Disyembre 3.

Nagdulot din ang nasabing insidente ng constitutional crisis sa ika-apat na pinakamalaking ekonomiya sa Asya at isa sa mga mahahalagang kaalyado ng United States.

Google, tagumpay sa quantum computing gamit ang bagong chip

ni Angela Fernando @Tech News | Dec. 10, 2024

Photo: Quantum computing willow chip / Google

Inihayag ng Google kamakailan ang isang mahalagang tagumpay sa larangan ng quantum computing matapos nitong malutas ang isang komplikadong problema sa loob lamang ng limang minuto gamit ang kanilang bagong chip.

Ito ay nakamit sa quantum laboratory sa Santa Barbara, California.

Tulad ng Microsoft at International Business Machines, ang Google ay patuloy na namumuhunan sa quantum computing dahil sa potensyal nitong magbigay ng pinakamabilis na computer system sa kasalukuyan.

Bagama’t walang agarang application ang matematikal na problemang nalutas ng quantum system ng Google, umaasa ang kumpanya na magagamit ito sa hinaharap upang resolbahin ang mga hamon sa medisina, battery chemistry, at artificial intelligence—mga problemang hindi kayang tugunan ng mga tradisyunal na computer.

Mga Pinoy sa Syria, dapat panatilihin ang ugnayan sa embahada ng 'Pinas — DFA

ni Eli San Miguel @Overseas News | Dec. 8, 2024

Photo: OFWs sa Syria - Philippine Embassy in Syria

Hinimok ang mga Pilipino sa Syria na panatilihin ang ugnayan sa Embahada ng Pilipinas sa Damascus dahil sa kasalukuyang sitwasyon sa bansa.

"We express concern regarding the situation of our Filipinos in Syria and advise them to take the necessary precautions and stay in contact with the Philippine Embassy in Damascus," pahayag ng Department of Foreign Affairs (DFA) ngayong Linggo.

"The Department of Foreign Affairs continues to monitor, with concern, ongoing developments in Syria," dagdag pa nito.

Sa ngalan ng Pilipinas, nanawagan din ito sa mga kinauukulang panig na maging mahinahon at umiwas sa karagdagang karahasan upang mapigilan ang mas maraming biktima at pagkamatay ng mga sibilyan.