Dalai Lama, pinabulaanan ang mga tsismis sa kanyang kalusugan

ni Eli San Miguel @Overseas | July 7, 2024

Photo: Olivier Adam / FB

Inihayag ng Dalai Lama nitong Sabado na kasalukuyan siyang nagpapagaling mula sa isang operasyon sa tuhod at nararamdaman niyang siya'y nasa mabuting kalagayan, na pinapabulaanan ang mga negatibong tsismis tungkol sa kanyang kalusugan.

"Recently I had surgery on my knee, which has given me some problem. However, I am recovering and have no problem at all now," pahayag ng pinatalsik na spiritual leader ng Tibetan Buddhism sa isang video message mula sa United States, kung saan siya'y nagpapagaling.

"There may be people trying to confuse you about my health, saying that the Dalai Lama has gone to a hospital and is undergoing treatments, and so on, making my condition sound grave. You don't need to trust such misinformation," aniya.

Tumanggap ng Nobel Peace Prize noong 1989 si Dalai Lama, na kilala sa pandaigdigang pagpapalaganap ng Buddhism, para sa pagtataguyod ng kapakanan ng mga Tibetan.

Sa pagtanda at mga hamon sa kanyang kalusugan, naging isang mahalagang isyu para sa mga Tibetan ang pagpili ng kanyang kahalili o kapalit.

"I am nearly 90 now but I don't feel unhealthy, except for the slight discomfort in my legs. I would like to thank all my fellow Tibetans in and outside Tibet for your prayers on my birthday," dagdag pa ng Dalai Lama.

Noong Sabado, libu-libong mga Buddhist at mga nagmamahal sa Dalai Lama mula sa iba't ibang panig ng mundo ang nagtipon upang ipagdiwang at manalangin para sa mahabang buhay ng kanilang lider.

Pope Francis, magkakaroon ng mahabang Asia trip

ni Eli San Miguel @Overseas | July 6, 2024

Photo: Circulations / FB

Magkakaroon ng abalang iskedyul si Pope Francis sa Setyembre, dahil bibisita siya sa Indonesia, Singapore, Papua New Guinea, at East Timor. Kasama sa kanyang plano ang pangunguna sa tatlong misa sa stadium.

Itinuturing ang pagbiyahe mula Setyembre 2 hanggang 13 bilang pinakamatagal na panahon na mawawala ang 87-anyos na Santo Papa mula sa Roma sa buong panunungkulan niya ng 11 taon.

Ito ang unang pagbiyahe niya sa ibang bansa mula Setyembre ng nakaraang taon nang bumisita siya sa Marseille.

Batay sa opisyal na iskedyul na inilathala ng Vatican noong Biyernes, naglalaman ang paglalakbay sa Asia ng 16 talumpati at tatlong mga misa na gaganapin sa mga stadium sa mga kabisera ng Jakarta, Singapore, at Port Moresby sa Papua New Guinea.

Sa Indonesia, na tahanan ng pinakamalaking populasyon ng mga Muslim sa mundo, makikilahok ang Santo Papa sa isang interreligious meeting sa Istiqlal Mosque, isa sa pinakamalalaking mosque sa mundo.

Sa Papua New Guinea, makikipagkita siya sa mga batang lansangan at magsasagawa ng day trip papuntang Vanimo sa hilagang bahagi ng bansa, kung saan makikipagtagpo siya sa mga misyonerong Katoliko.

Bagaman may matibay na etika sa trabaho si Francis at handang maglakbay, napilitan siya kamakailan na magbigay muna ng pansin sa kanyang edad at kalusugan, kabilang ang pagkansela ng isang biyahe noong nakaraang taon sa UN climate talks sa Dubai.

Sa ngayon, nasa bilang na 44 ang mga pagbiyahe sa ibang bansa na isinagawa ni Francis.

Military activity ng China, muling naobserbahan sa Taiwan

ni Eli San Miguel @Overseas News | July 5, 2024

Iniulat ng Taiwan nitong Biyernes ang bagong military activity ng China malapit sa kanilang teritoryo, kasama ang isa pang "combat patrol," habang nananawagan ang gobyerno sa Beijing na huwag paigtingin ang tensyon matapos ang pagkumpiska sa isang fishing boat ng Taiwan.

Sinabi ng Ministry of National Defense ng Taiwan na mula bandang alas-7 ng umaga (2300 GMT) nitong Biyernes, kanilang natukoy ang 26 na sasakyang militar ng China, kabilang ang mga J-16 fighter, na naglunsad ng "joint combat readiness patrol" kasama ang mga Chinese warships.

Mula sa umpisa ng buwan na ito, natukoy ng Taiwan ang hindi bababa sa 127 na sasakyang militar ng China na nag-o-operate malapit sa isla. Inihayag ng China na nag-uugat ang kanilang mga problema sa Taiwan dahil sa pagiging "separatist" ng pananaw ng bagong Pangulo ng isla na si Lai Ching-te.