Higit 3k patay sa Lebanon dulot ng hidwaang Israel-Hezbollah

ni Eli San Miguel @World News | Nov. 5, 2024

Photo: Makikita sa larawang ito ang mga nasirang gusali sa southern port city ng Sidon, Lebanon - Mohammed Zaatari / AP

Inihayag ng Health Ministry ng Lebanon ngayong Lunes, na nagdulot ang 13-buwang digmaan sa pagitan ng Israel at Hezbollah ng higit sa 3,000 pagkamatay sa Lebanon.

Walang mga senyales na magtatapos ang digmaan, habang nagsasagawa ang Israel ng mga bagong operasyon na nakatuon sa imprastruktura ng Hezbollah sa buong Lebanon at sa ilang bahagi ng Syria, kasabay ng patuloy na pagpapaputok ng dosenang rocket ng Hezbollah patungo sa hilagang Israel.

Nagsimula ang Hezbollah na magsagawa ng mga rocket launch patungong hilagang Israel isang araw matapos ang sorpresang atake ng Hamas noong Oktubre 7, 2023, na nagpasiklab ng digmaan sa Gaza. Kaalyado ng Iran ang parehong Hezbollah at Hamas.

Mabilis na tumindi ang hidwaan noong Setyembre 23, na minarkahan ng matinding pambomba ng Israel sa timog at silangang Lebanon, kabilang ang mga timog na suburb ng Beirut, na nagresulta sa daan-daang pagkamatay at nagpalikas ng halos 1.2 milyong tao.

Libu-libo nawalan ng kuryente, dulot ng mga bagyo sa Oklahoma

ni Eli San Miguel @Overseas News | Nov. 4, 2024

Photo: Oklahoma / @VALLY_BELL - X

Malalakas na bagyo at buhawi ang tumama sa Oklahoma nitong madaling-araw ng Linggo, na nag-iwan ng libu-libong tahanan at negosyo na walang kuryente.

Ayon sa mga otoridad, 11 tao ang kailangang dalhin sa ospital dahil sa mga natamong sugat. Karamihan sa pinsala ay naitala sa paligid ng Oklahoma City, ngunit may iba pang apektadong lugar sa estado.

Nagdulot ang mga bagyo noong umaga, ng mga tornado warning hanggang sa hangganan ng Arkansas. Nagdala ng malakas na ulan ang mga bagyo, na nagresulta sa rumaragasang mga pagbaha at isang sunog na dulot ng kidlat.

Mahigit 99,000 tahanan at negosyo ang nawalan ng kuryente, ngunit bumaba ito sa humigit-kumulang 24,000 sa hapon ng Linggo. Walang naitalang nasawi.

200 patay sa baha sa Spain, 10K pulis at sundalo sasaklolo

ni Eli San Miguel @Overseas News | Nov. 3, 2024

Photo: Reuters / Circulated

Ipinadadala ng Spain ang karagdagang 5,000 sundalo at 5,000 pulis sa Valencia matapos ang malalang pagbaha na pumatay ng mahigit 200 katao, ayon kay Punong Ministro Pedro Sánchez nitong Sabado.

Kabuuang 205 na bangkay ang narekober, na may 202 sa Valencia, dalawa sa Castilla La Mancha, at isa sa Andalusia, na itinuturing na pinakamatinding natural na sakuna sa kasaysayan ng Spain kamakailan.

Patuloy ang mga rescuer sa paghahanap ng mga bangkay sa mga sasakyan at gusali apat na araw matapos ang biglaang pagbaha. Hindi pa rin tiyak ang bilang ng mga nawawala.

Libu-libong boluntaryo ang tumutulong sa paglilinis ng makapal na putik na tumakip sa mga kalsada, bahay, at negosyo sa mga lubhang apektadong lugar.

Sa kasalukuyan, may humigit-kumulang 2,000 sundalo, 2,500 Civil Guard gendarmes na nakapagsagawa ng 4,500 rescues, at 1,800 na pambansang pulis na kasali sa mga emergency operations.