10K lumikas dahil sa wildfire sa California

ni Eli San Miguel @Overseas News | Nov. 9, 2024

Photo: Wildfire sa California / Courtney Davis via Reuters

Napalikas ng mga wildfires ang libu-libong Californian at sinira rin nito ang mahigit 100 istruktura.

Kahit kumalma na ang malakas na hangin, patuloy pa rin ang pagsisikap ng mga bumbero na mapatay ang apoy na kumalat na sa mahigit 20,000 ektarya sa Ventura County.

Sinabi pa ng Cal Fire na nananatiling banta ang sunog sa mga kritikal na imprastruktura at patuloy na masusunog ang mga nakapaligid na lugar.

Noong Huwebes, mahigit 10,000 katao ang inutusang lumikas mula sa mga kapitbahayan malapit sa Camarillo, mga 45 milya pababa ng Pacific Coast mula sa Santa Barbara.

Pagkatapos nito, ilang bahay ang sinilaban ng mga uling na dinala ng hangin na umabot sa bilis na 80 mph (130 kph). Mahigit 130 na istruktura ang nawasak sa sunog, ayon sa ulat ng Los Angeles Times.

Mga ilegal na imigranteng Pinoy sa US, dapat nang umuwi sa bansa

ni Angela Fernando @News | Nov. 8, 2024

Photo: Philippine Ambassador to the us Jose Manuel Romualdez - OWWA / PCO

Pinayuhan na ni Philippine Ambassador to the US Jose Manuel Romualdez, bago pa man manalo si Donald Trump sa pagkapangulo sa naganap na eleksyon kamakailan sa United States (US), ang tinatayang 250K hanggang 300K na ilegal na imigranteng Pinoy sa nasabing bansa na boluntaryong umuwi upang maiwasan ang posibilidad na mapasali sa blacklist.

“Some of them have already filed and so therefore they are here in limbo, meaning to say they are waiting for their papers to pass through. My advice to many of our fellowmen who are actually still here but cannot get any kind of status, my advice is for them not to wait to be deported,” saad ni Romualdez sa Foreign Correspondents Association of the Philippines (FOCAP) nitong Biyernes.

Ayon pa kay Romualdez, magiging isang pangunahing operasyon ang deportasyon at malaki ang posibilidad na maipatupad ni Trump ang bagong batas sa imigrasyon dahil kontrolado ng mga Republican ang parehong House at Senate.

Binigyang-diin din ni Romualdez na ang mga ilegal na imigrante ang maaaring isa sa mga dahilan kung bakit mas pinili ng karamihan sa mga Filipino-American si Trump kaysa kay Vice President Kamala Harris sa nagdaang eleksyon.

Trump, pinangalanan si Susie Wiles bilang chief of staff

ni Eli San Miguel @Overseas News | Nov. 8, 2024

Photo: Susie Wiles at Donald Trump - Alex Brandon / AP Photo

Inanunsiyo ng President-elect ng United States na si Donald Trump nitong Huwebes, na ang kanyang campaign manager na si Susie Wiles ang magsisilbing chief of staff ng White House.

Sa isang pahayag, sinabi ni Trump na si Wiles ang tumulong sa kanya na makamit ang isa sa pinakadakilang tagumpay sa kasaysayan ng pulitika sa Amerika. Inilarawan pa niya si Wiles bilang matatag, matalino, kinikilala at nirerespeto ng lahat.

Si Wiles, 67, ang kauna-unahang babaeng itinalaga bilang chief of staff ng White House.