Department of OFWs, aprub sa Senado

ni Jasmin Joy Evangelista | December 15, 2021

Aprubado na ng Senado sa ikatlo at huling pagbasa ang panukalang batas na magtatatag ng ahensya para sa mga overseas Filipino worker (OFW). 

Ito ay isang hiwalay na ahensya na tututok sa kalagayan ng mga Pilipinong nagtatrabaho sa ibang bansa.

Aprubado para sa mga senador ang Senate Bill No. 2234 o ang pagkakaroon ng Department of Migrant Workers and Overseas Filipinos Act, ito ay nakakuha ng botong 20-0.

Ayon sa sponsor ng panukalang batas na si Sen. Joel Villanueva, chairman ng Senate Labor Committee, ang panukalang departamentong ito ay isang “dedicated service arm” para sa 10 milyong Pilipino na nasa ibang bansa sapagkat sila ay kabilang sa pinagmumulan ng national income ng bansa kung saan 12% ang kanilang contribution. 

“This moment is for every Filipino abroad who has sacrificed so much for their family and our beloved country,” ani Villanueva.

Nilinaw din ni Villanueva na ang bagong departamento ay hindi manghihikayat ng trabaho sa ibang bansa bilang bahagi ng state policy.

“Naniniwala po tayo na balang-araw hindi po tayo mawawalan ng pag-asa na darating ang panahong hindi na kailangang mag-abroad ng Pilipino at mawalay sa kanyang pamilya para lang mabuhay," paliwanag niya.

Dahil sa Omicron variant.. Halos 100 Pinoy stranded sa Europe at South Africa — DFA

ni Lolet Abania | December 4, 2021

Halos 100 na mga Pilipino ang stranded sa Europe at Africa matapos na 14 bansa mula sa naturang rehiyon ang isinailalim sa red list ng Pilipinas sa gitna ng banta ng Omicron COVID-19 variant.

Ayon kay Department of Foreign Affairs (DFA) Undersecretary for Migrant Workers’ Affairs Sarah Lou Arriola, tinatayang 50 Pinoy ang stranded sa Europe, kung saan pitong bansa ang nasa red list hanggang Disyembre 15. Ito ay ang Austria, Czech Republic, Hungary, The Netherlands, Switzerland, Belgium, at Italy.

“So far we have more or less 50 Filipinos stranded in Europe,” ani Arriola at the Laging Handa public briefing ngayong Sabado. Sa South Africa naman, tinatayang 49 Pilipino ang stranded, kung saan ang South Africa, Botswana, Namibia, Zimbabwe, Lesotho, Eswatini, at Mozambique ay una nang inilagay sa red list matapos na ang Omicron variant ay unang mai-report sa naturang rehiyon.

“We just received word this morning from our post in South Africa that there are around 49 [stranded OFWs],” dagdag ni Arriola. Ang mga pasahero na nagmula o nanggaling sa mga bansa na inilagay sa red list ng bansa sa loob ng huling 14-araw ay hindi papayagang pumasok sa Pilipinas.

Sinabi naman ni Arriola na nag-organisa na ang gobyerno ng repatriation flights mula sa Europe na nakatakda sa Disyembre 10 at 13.

Subalit aniya, nahihirapan itong isagawa sa South Africa dahil sa karamihan sa mga transit countries ay ayaw tumanggap ng mga flights mula roon, kung saan ang Omicron ay unang na-detect sa naturang bansa.

“Ang kailangan po namin talaga at the moment, nakikiusap po kami, makipag-ugnayan po tayo sa ating mga embahada so that we can help you,” sabi pa ni Arriola.

Payo ni Arriola sa mga stranded overseas Filipinos hinggil sa kanilang repatriation, maaaring bisitahin ang DFA’s official OFW Help Facebook Page para sila ay kanilang matulungan.

“We stand ready in DFA, all our posts are prepared. We pray that other countries will no longer be added under the red list, but should it happen, all our embassies and consulates around the world, we stand ready to assist,” saad pa ni Arriola.

Deployment ng healthcare workers sa ibang bansa, stop muna — POEA

ni Jasmin Joy Evangelista | November 6, 2021

Pansamantalang ititigil ng Philippine Overseas Employment Administration (POEA) ang pagpoproseso ng mga papeles ng mga nurses at iba pang mga healthcare workers na nagnanais na magtrabaho sa ibang bansa.

Ito ay dahil naabot na ang itinakdang deployment cap ng Inter-Agency Task Force (IATF) o bilang ng mga health care workers na maaaring magtrabaho abroad.

Dahil dito ay hindi muna mag-i-issue ng Overseas Employment Certificate (OEC) sa mga healthcare workers na nagbabalak na mag-abroad.

Matatandaang 6,500 lamang ang bilang ng mga healthcare workers na papayagang mangibang-bansa sa taong ito batay sa patakaran ng IATF.

“Pursuant to POEA Governing Board Resolution No. 17, Series of 2020 and POEA Advisory No. 79, Series of 2021 on the lifting of the moratorium or temporary suspension on the deployment of nurses, nursing aides and nursing assistants, and increasing the annual deployment cap from 5,000 to 6,500, the Administration hereby announces that the said ceiling has been reached as of date,” ani POEA head Bernard Olalia sa Advisory No. 144.

Magpapatuloy ang pagpapatupad sa nasabing suspensiyon hanggang wala pang panibagong inilalabas na anunsyo ang Inter-Agency Task Force.

Samantala, nilinaw naman ng POEA na papayagang makabiyahe ang mga nakakuha na at nakapagproseso na ng kanilang mga papeles bago pa man ilabas ng ahensiya ang nasabing kautusan.