5,325 OFWs, binigyan ng ayuda

ni Eli San Miguel @News | October 26, 2023

Nakatanggap ng tulong ang 5,325 overseas Filipino workers (OFWs) mula sa Department of Migrant Workers (DMW).

Sa hearing ng Committee on Overseas Workers Affairs sa House of Representatives nitong Huwebes, sinabi ni DMW Acting Secretary Hans Leo Cacdac na ginamit ang P414 milyon mula sa P1.2 bilyong pondo ng kagawaran upang magbigay tulong sa mga repatriated na OFW mula sa lindol sa Turkey, kaguluhan sa Sudan, mga kalamidad sa Middle East, at Israel-Hamas war sa Israel, Gaza, at Lebanon.

Sinabi ni Cacdac na ginamit ang budget para sa legal, medikal, at humanitarian assistance para sa mga OFW. Dagdag pa niya, nakatanggap ang mga repatriated ng P30,000 na tulong-pinansiyal pag-uwi, at nakatanggap naman ang mga repatriated na galing sa mga lugar ng digmaan ng P50,000.

“May balanse pa tayong around P780 million. Meron po tayong catch-up plan na sinasagawa for the last two months of the year. Most of these funds will be rolled over to 2024 anyway, at plano naman po natin na gugulin ito sa 2024,” sabi ni Cacdac.

Sinabi rin ni Cacdac na tinutulungan ang pamilya ng 746 OFWs sa Israel at Gaza na hanapin ang kanilang mga kamag-anak sa ibang bansa.

Sa kabuuang bilang, 744 ang natagpuan na, may apat na iniulat na patay, at dalawa pa ang hinahanap.

Noong Miyerkules, kinilala ng pamahalaang Israeli ang dalawang Pilipino sa mga bihag ng Hamas.

“Ayon na din sa utos ng ating mahal na pangulo, gawin lahat ng makakaya natin para tulungan ang mga nanumbalik at yung pamilyang naiwan ng apat na nasawi. Kaya nakatutok po tayo together with administrator Arnell Ignacio at ang OWWA sa pagtulong sa pamilya ng apat na nasawi,” pahayag ni Cacdac.

Labi ng Pinay caregiver na pinatay sa Jordan, naiuwi na

ni Eli San Miguel - Trainee @News | October 22, 2023

Naiuwi na sa Pilipinas ang mga labi ng Pinay caregiver na pinaslang ng anak ng kanyang katrabaho sa Amman, Jordan.

Inabangan sa airport ng mga nagdadalamhating kamag-anak mula sa Macabebe, Pampanga ang pagdating ng mga labi ni Mary Grace Santos. Kasama rin ang mga opisyal at kinatawan mula sa Department of Migrant Workers (DMW), Overseas Workers Welfare Administration (OWWA), at Department of Foreign Affairs (DFA).

Unang naiulat ang pagkawala ni Santos noong Oktubre 11. Kinabukasan, natagpuan ang kanyang bangkay sa tangke ng diesel sa bahay ng kanyang amo.

Tinukoy ang suspek na isang 16-anyos na Egyptian.

Kinumpirma ni DFA Undersecretary Eduardo De Vega na inamin ng suspek ang krimen.

Ayon sa awtopsiya, pinatay ang OFW sa pamamagitan ng pagsakal.

Iniimbestigahan din ng mga awtoridad kung na-rape ang biktima.

“Hindi po maliwanag kung ginahasa pero meron pong alegasyon na merong sexual offense,” ani DMW Undersecretary Bernard Olalia.

Nangako naman ang OWWA na tutulungan ang pamilya, lalo na ang dalawang anak ni Mary Grace.

"Magpo-provide po kami ng financial bereavement assistance bukod po sa pagpapauwi, OWWA na rin ang sumagot niyan hanggang makarating sa Macabebe, Pampanga," pahayag ni OWWA Deputy Administrator for Operations Atty. Mary Melanie Quiño.

Nagpapasalamat ang pamilya ni Mary Grace sa tulong na ibinigay ng OWWA, DFA, at DMW.

Pinangako ni Maria Lisa, nanay ni Mary Grace, na magpapatuloy siya sa paghahanap ng katarungan para sa kanyang anak.

“Mahal na mahal ko siya ipaglalaban ko siya at aalagaan ko ang mga anak niya hindi ko sila pababayaan,” sabi ni Maria Lisa.

16 OFWs sa Gaza, nakauwi na

ni Angela Fernando - Trainee @News | October 19, 2023

Ginunita ng ilan sa 16 overseas Filipino workers (OFW) mula sa Gaza sa kanilang pag-uwi nitong Oktubre 18 sa bansa ang nakakapanlumong dinanas magmula nu'ng Oktubre 7 matapos umatake ang Hamas sa Israel na nagresulta sa isang madugong giyera.

Saad ng isa sa mga OFWs na nakauwi sa bansa na kinilalang si Catherine Tolentino, dahil sa takot para sa kanyang buhay ay nagpaalam na rin siya sa kanyang pamilya at mga mahal sa buhay.

Pero nitong Miyerkules, dahil sa tulong ng gobyerno ay nakalapag ang labing-anim na Pilipino at naiuwi sa kani-kanilang pamilya.

May umaabot sa 100 Filipinos sa Gaza ang makakauwi ng bansa kapag matagumpay na nakatawid sa Egypt.

Ayon naman sa officer in charge na si Undersecretary Hans Leo Cacdac ng Department of Migrant Workers (DMW), tiyak na ang kaligtasan ng umaabot sa 30,500 OFWs sa Israel.