Tips para makapag-adjust sa inuupahan na mas malapit sa trabaho

No Problem

Libu-libo ang nahirapan sa pagbibiyahe papunta sa kani-kanilang trabaho rito sa Kalakhang Maynila nang buksan ang general community quarantine o GCQ dahil lahat ng posibleng masakyan ay may social distancing tulad ng MRT, LRT at PNR train, gayundin ang bus.

Marami naman ang nagplano na gumising nang maaga at madaling-araw pa lamang ay bumiyahe na noong Lunes upang magkaroon ng pag-asa na makasakay kahit paano, pero marami pa rin ang nabigo at nauwi sa paglalakad at pakikisakay sa ibang napakiusapan na pribadong sasakyan.

Mas marami ang gumamit na lang ng motorsiklo at bisikleta upang makarating sa kani-kanilang mga pinagtatrabahuhan. May mga taksi at TNVS, pero para sa nakararami, mabigat sa bulsa ang pamasahe. Pahirapan ding lalo dahil hindi pa pinapayagang bumiyahe ang mga jeepney at UV Express na mas pinaka-kombinyenteng sakyan ng mamamayan.

At dahil sa unang ilang araw pa lamang ng GCQ ay pahirapan na sa mga empleyado at manggagawa ang biyahe papunta sa kanilang pinagtatrabahuhan, may mga nagpaplano nang umupa na lamang ng maliit na tirahan o kuwarto na mas malapit sa trabaho. Titiisin kahit malayo nang bahagya sa pamilya basta’t makapasok lamang sa trabaho nang hindi nahihirapan. ‘Yung iba naman ay madedestino sa bagong trabaho dahil hindi na nakabalik sa dating kumpanya na nagbawas ng mga tauhan o tuluyan nang nagsara.

Bagong pakikisama ang mangyayari sa iyong uupahan. Nakaka-pressure at nakakapanibago pero mas okey sa ‘yo dahil malapit lang sa iyong pinagtatrabahuhan.

Heto rin ang tips para unti-unting makasundo ang bagong kasambahay at katrabaho. Magpakatatag ka. Kailangan ‘yan sa panahon ngayon ng krisis.

1. MAGPASALAMAT. Oras na magsimula ka, pasalamatan ang mga taong naging daan para makarating ka r’yan. Kumustahin kahit paano ang mga taong nagrekomenda at maging sa nagbigay sa iyo ng pansamantalang tirahan. Huwag kang makakalimot, dapat mong ipakita ang respeto sa kanila.

2. MAKISAMA SA HEALTH PROTOCOL AT PAGKAIN. Kung mahigpit na pinaiiral ang health protocol at curfew sa inuupahan, dapat itong sundin. Kung may pagkakataon kang makapagluto ng sobra, bigyan mo rin ang bagong kakilala. Ipakita sa kanila na aktibo ka at may interes na makasama sila. Malalaman mo sa iyong pakikisama sa kanila kung sino ang maaaring lapitan sa oras na may problema. Pero mag-ingat sa mabilisang pagtitiwala o pakikipagkaibigan sa bagong kakilala maging sa trabaho. Baka kasi maapektuhan ka ng kanilang opinyon. Maaari ka nilang husgahan ayon sa panlabas na nakikita nila sa iyo. Huwag ka munang maglabas ng niloloob mo sa taong hindi mo pa masyadong kilala maging ang mabilis na pakikipagbarkada.

3. MAGPOKUS AGAD SA TRABAHO. ‘Yan ang importante ngayon upang kumita at makabawi sa dalawang buwan na walang suweldo. Pagbutihin mo ang iyong ginagawa at huwag mag-panic kung hindi alam kung paano i-operate ang makina, kalaunan ay matututunan mo rin na gamitin ang mga ‘yan.

4. HUWAG GAGAWA NG MALAKING PAGBABAGO SA TRABAHO. Maghintay ng sapat na panahon upang matutunan nang husto ang mga sistemang umiiral sa trabaho bago ka gumawa ng pagbabagong hindi pinapaboran ng ibang katrabaho. Halimbawa, mas konsentrahin mo ang pag-angat ng benta sa produkto kaysa ang baguhin ang sistema. Umayon ka muna sa agos ng sistema sa dalawang unang buwan mo.

5. MAKISALAMUHA. Palakasin ang ugnayan sa kumpanya. Lumahok sa anumang idinaraos na pagdiriwang. Habang higit kang sumasali, mas mainam. Kung may mga in-house seminars, ipakita mo ang iyong kakayahan sa ibang katrabaho. Lumahok sa professional organizations at laging ipagmalaki ang industriya. Manatili kang makipag-ugnayan sa mga contacts ng kumpanya.

Huwag kang basta malulungkot, madidismaya o maawa sa iyong sarili kung may nagawa kang pagkakamali. Kailangan mo nang lumabas sa sariling mundo mo.

Tips para mapanatiling maganda ang buhok kahit tag-init

No Problem

Sa nararanasan natin ngayon, lahat tayo ay abala sa ating ikabubuhay. Hindi natin namamalayan na humahaba na pala ang ating mga kuko sa paa at kamay at ang ating buhok.

Para sa kalalakihan, madali lang solusyunan ang paghaba ng kanilang buhok dahil kahit walang barbero ay puwede silang makapagpagupit ng buhok, pero sa kababaihan, kailangan ng hairstylist para gumupit ng kanilang buhok. Subalit dahil sa lockdown, tiis-tiis muna na sa paghaba nito, kaya naman narito ang ilang tips para manatiling maganda ang long hair ngayong tag-init:

1. Iwasang i-overwash ang buhok. Sa tuwing maliligo, iwasan na ibabad ang buhok sa tubig at shampoo. Ang mga hair strands ay numinipis at madaling napuputol dahil nawawala ang natural oil nito kapag nasosobrahan o nakababad sa tubig at magiging dry ito.

2. Gumamit ng conditioner. Kahit nagtataglay ka ng oily hair, mas magandang gumagamit pa rin ng conditioner sa tuwing maliligo dahil nagiging makintab, tuwid at mabango ang buhok lalo na na ngayong summer.

3. Protektahan ang buhok sa init ng araw. Kung lalabas ng bahay at tirik ang araw, ugaliing magpayong dahil nagiging dry ang buhok at nawawala ang ganda nito. Nanunuyot ang mga strand sat naglalaho ang natural oil.

4. Bawasan ang heat-styling. Bawasan ang paggamit ng blower, hair iron, hair dryer at iba pa sa buhok. Hayaan na matuyo nang kusa ang buhok pagkatapos maligo, para manatili ang sariling ganda at ayos nito.

5. Kumain ng prutas at gulay. Ugaliin ang pagkain ng prutas at gulay dahil nakapagpapaganda ito ng kutis at buhok. Nagbibigay din ito ng sustansiya na kailangan ng katawan para maging malusog.

Habang nasa bahay lang tayo at naghihintay na matapos ang lockdown, kailangang maging maayos at malusog ang ating pangangatawan, kasama na rito ang pagkakaroon ng magandang buhok dahil ito ang sumasalamin sa kalinisan ng isang tao. Okie?

‘Di sapat na naghuhugas lang ng kamay… Alamin: Tips para iwas-virus

No Problem

Mula nang makumpirma na meron nang local transmission ng Coronavirus Disease 2019 (COVID-19), lalong dumami ang mga Pinoy na nagpa-panic. Marami nang ayaw lumabas ng bahay, pumasok sa trabaho o paaralan dahil sa takot na mahawahan.

Dahil dito, mas pinaigting ng mga local government units (LGUs) ang mga hakbang upang maiwasan ang pagkalat ng virus sa bansa. Kaya naman, narito ang ilang tips para mapanatiling virus-free ang ating bahay:

1. DISINFECT. Ayon sa mga eksperto, kapag bumahing o umubo ang taong infected ng COVID-19 at napunta sa surface tulad ng mesa at nahawakan ito ng ibang tao saka humawak ito sa ilong o bibig, maaari itong ma-infect kaya ipinapayo na mag-disinfect ng mga area sa silid at gamit na palaging hinahawakan tulad ng cellphone, laptop, countertop, lababo, lamesa, electronic switches at staircase railings. Dapat ding linisin nang mabuti ang sponge na ginagamit na panghugas ng pinggan.

2. ISARA ANG TOILET LID. Bago mag-flush, siguraduhing nakasarado ang toilet lid para hindi lumabas ang tubig na ipina-flush, gayundin, ang mga dumi at mikrobyo. Ugaliin ding punasan o gumamit ng antibacterial wipes sa toilet seat pagkatapos gamitin.

3. MAGHUGAS NG MGA PAA AT KAMAY. Kapag galing sa labas, make sure na maghuhugas ng mga kamay at paa. Gayundin, ugaliing maghugas ng mga kamay pagkatapos gumawa ng gawaing- bahay, lalo na pagkatapos magluto o maglinis, ganundin pagkatapos mag-CR.

4. PATUYUIN NANG MABUTI ANG LABADA. Siguraduhing natuyo nang mabuti ang mga nilabhang damit, bed sheet o tuwalya para hindi mamalagi ang mga mikrobyo rito. Dagdag pa rito, kapag galing sa labas, huwag hihiga sa kama nang hindi nagpapalit ng damit.

Mga besh, nakakatakot talagang mahawa ng sakit kaya dapat ay maging malinis tayo sa ating katawan, gayundin sa ating tahanan. Make sure na sasabayan natin ng proper hygiene ang tips na ito para iwas-sakit. Ingat, ka-BULGAR! Kuha mo?