Bigtime rollback... P9.26 diesel, P4.76 gasoline, P10.86 kerosene

ni Mai Acnheta @News | June 2, 2026

Photo: File

Makakaasa ang mga motorista ng ginhawa ngayong unang linggo ng Hunyo dahil sa malakihang rollback sa presyo ng produktong petrolyo.

Inanunsyo ng Department of Energy ang malaking rollback sa presyo ng langis sa press conference nitong Lunes.

Ayon kay Energy Secretary Sharon Garin, ang rollback ay ang mga sumusunod:

Gasoline - P4.76 kada litro

Diesel - P9.26 per liter

Kerosene- P10.86 per liter

Ang bigtime rollback ay magiging epektibo ngayong Martes.

Ang pagluwag sa presyo ng langis ay dahil sa inaasahang pagbubukas ng Strait of Hormuz, na pangunahing dinadaanan ng mga barkong may kargang langis para makatawid sa kanilang destinasyon.

Isinara ang Strait of Hormuz nang atakihin ng Amerika at Israel ang Iran.

Ayaw mag-minority, kinasuhan ng plunder... Jinggoy inaresto, ‘di sumuko — Jonvic

ni Mylene Alfonso @News | June 2, 2026

Photo: Kumaway si Senador Jinggoy Estrada sa Senate media habang nasa sasakyan makaraang sumama sa mga tauhan ng Philippine National Police-Criminal Investigation and Detection Group (PNP-CIDG) kaugnay ng kanyang arrest warrant sa plunder, sa umano’y flood control fund scandal. (Mylene Alfonso)

Nilinaw ni Interior Sec. Jonvic Remulla na inaresto at hindi boluntaryong sumuko si Sen. Jinggoy Estrada matapos itong personal na silbihan ng warrant at basahan ng Miranda rights ng PNP-Criminal Investigation and Detection Group.

"We arrested him. I went there personally together with the CIDG. He was read his Miranda rights, and from there, he was brought here to Crame to be processed." 

Una nang naglabas ang Sandiganbayan Fifth Division ng ikalawang warrant of arrest laban sa senador, sa pagkakataong ito ay may kaugnayan sa kasong pandarambong.

Samantala, sa kanyang biglaang press conference, sinabi ni Estrada na hindi siya humiling ng protective custody mula sa Senado at handa niyang harapin ang mga kasong isinampa laban sa kanya.

“Kung ito ang kabayarang kailangan kong harapin dahil sa mga desisyong aking ginawa at sa mga prinsipyong pinili kong panindigan, handa akong tanggapin ang mga kahihinatnan nito, gaano man ito kahirap, lalo na para sa aking pamilya,” ani Estrada.

Ibinunyag ni Estrada na makailang beses umano siyang inalok na lumipat sa minority bloc kapalit ng pagbasura sa kanyang mga kaso, subalit tinanggihan niya ito.

“Maraming beses po akong inalok na talikuran ang independent majority bloc, kapalit ng pagbabasura sa aking kaso. Ngunit hindi ko po ito tinanggap. Mas nanaig ang paninindigan ko, na ako'y manatili sa hanay ng mga kasamahan ko sa independent majority bloc,” ani Estrada.

Paliwanag pa niya, “I stand my ground ngayon; kung tatanungin n'yo kung sino sila, abangan ninyo ang susunod na kabanata.”

Muli namang itinanggi ng senador ang mga paratang laban sa kanya.

“Paano ako masasampahan ng plunder kung hindi naman ako kabilang o itinuturong mastermind ng sinasabing operasyon? Wala akong kinalaman diyan,” dagdag niya.

1,400 kalansay ng tao, naiahon sa Taal Lake

ni Jeff Tumbado @News | June 2, 2026

Photo: File

Nasa 1,400 mula sa mahigit 2,000 buto at kalansay na narekober mula sa Taal Lake ay natukoy na mga labi ng tao.

Ito ang kinumpirma ng Philippine National Police-Forensic Group habang nagpapatuloy ang imbestigasyon sa pagkawala ng mga sabungero.

Sa pulong-balitaan sa Camp Crame nitong Lunes, sinabi ni FG Director Police Col. Pierre Carpio na sumailalim sa iba’t ibang pagsusuri ang mga nakuhang buto, kabilang ang medico-legal, anthropological, radiographic imaging, dental, at DNA examinations.

Gayunman, nilinaw niya na hindi pa tapos ang proseso at patuloy pa ring sinusuri ng mga eksperto ang mga labi upang matukoy kung may tugma ang mga DNA profile sa mga biktima ng kaso ng mga nawawalang sabungero.