Bebot na nandukot ng sanggol, kalaboso

ni Angela Fernando - Trainee @News | October 14, 2023

Nakuhanan sa CCTV ang isang hindi pinangalanang babae na pumasok sa ospital na walang dala at paglabas ay buhat-buhat na ang isang sanggol sa Davao City.

Ayon sa ulat ng mga pulis, inalok daw ng suspek ang ina ng sanggol na tutulungan ito sa pag-aayos ng mga papeles at nu'ng nalingat ay tinangay na ang anak nito.

Mabilis namang nahanap ng mga awtoridad ang babae sa Brgy. Mintal at agad itong inaresto.

Nagawa lang umano ito ng suspek matapos niyang mawalan ng anak at 'di nito itinanggi ang ginawang pagnanakaw sa sanggol.

Nahaharap ngayon sa kasong kidnapping ang naturang suspek.

Anibersaryo ng EDSA People Power, tinanggal bilang holiday ni PBBM, inalmahan

ni Angela Fernando - Trainee @News | October 14, 2023

Pinalagan ng marami ang desisyon ni Presidente Bongbong Marcos na tuluyang alisin bilang holiday ang anibersaryo ng EDSA People Power kahapon, Biyernes, Oktubre 13.

Mabilis na nagbigay ng sari-saring komento at puna ang mga kritiko at “survivors” mula sa dating administrasyong Ferdinand Marcos, Sr. na nakaranas ng diktadurya.

Ayon kay Gabriela Rep. Arlene Brosas, ang ginawang ito ng presidente ay malinaw na kaso ng “historical revisionism”, dahil pagbabalewala ito sa sinapit ng mga Pilipino sa kamay ng diktador at sa naganap sa kasaysayan.

“The EDSA People Power Revolution is a symbol of our resilience and our unwavering commitment to fight authoritarian rule,” ani ng Philippines Alliance of Human Rights Advocate (PAHRA).

Ipinaliwanag agad ng Office of the President ang dahilan sa pag-alis sa araw ng anibersaryo ng EDSA bilang holiday at sinabing natapat ito sa Linggo sa susunod na taon.

Inalmahan naman agad ni Brosas ang pahayag ng Office of the President at sinabing ang paggunita sa People Power ay hindi lang tungkol sa araw ng pahinga para sa mga manggagawa, bagkus ay pagpapahalaga sa kasaysayan.

Lalaki, todas sa away-trapiko

ni Jenny Rose Albason @News | October 13, 2023

Patay ang isang lalaki matapos makaalitan ang isang truck driver sa Maynila.

Nagkagitgitan umano ang suspek na nagmamaneho ng trailer truck at ang biktimang driver ng aluminum van sa C-3, Navotas.

Ayon sa Manila Police District, nang makarating sa Smokey Mountain, bumaba umano ang biktima upang kausapin sana ang truck driver.

Gayunman, imbes na bumaba ang truck driver, sinagasaan umano nito ang biktima na naisugod pa sa ospital ngunit binawian din ng buhay.

Mahaharap sa kasong murder ang driver at hawak na ng MPD Homicide Division.