Public Address ni Pangulong Duterte, tuloy sa Lunes

ni Mary Gutierrez Almirañez | April 10, 2021

Kinumpirma ni Presidential Spokesperson Harry Roque sa ipinadalang text message na matutuloy sa Lunes ang ‘Talk to the People Address’ ni Pangulong Rodrigo Duterte, matapos mabahala ang ilang mamamayan sa kalusugan niya dahil sa hindi pagpapakita nitong mga nakaraang araw at mga na-postpone niyang public address.

“Monday,” iyan ang reply ni Roque bilang kumpirmasyon sa muling appearance ng Pangulo sa publiko.

Pinatotohanan naman ng video at mga larawan na in-upload ni Senator Bong Go ang aktibong pagdya-jogging ng Pangulo, taliwas sa mga espekulasyong mahina na siya dahil umano sa sakit na Barrett’s esophagus.

Ipinaliwanag din ng Palasyo na nag-iingat lamang ang Pangulo, matapos magpositibo sa COVID-19 ang mahigit 120 na miyembro ng Presidential Security Group (PSG).

Sa ngayon ay kumpirmadong nagpositibo muli sa COVID-19 si Spokesperson Harry Roque at kasalukuyang naka-admit sa Philippine General Hospital (PGH). Gayunman, tiniyak niyang siya pa rin ang mag-aanunsiyo ng bagong quarantine classification sa NCR Plus Bubble, katuwang ang Inter-Agency Task Force (IATF).

"I am now admitted in a hospital for Covid treatment. This is to say that COVID-19 is more transmissible now so we have to do extra precaution," sabi pa ni Roque.

Cash ayuda, 15 days lang ipamimigay

ni Mary Gutierrez Almirañez | April 6, 2021

Binalaan ng Department of the Interior and Local Government (DILG) ang mga opisyal na mamimigay ng maling ayuda sa bawat barangay.

Ayon kay DILG Undersecretary Martin Diño ngayong Abril 6, “Hindi lang po namin kayo ipatatanggal, ang gusto ni Presidente ipakulong na kayo, 'yung mga gagawa ng pamimili. 'Yung iba, kokotongan pa ‘yung mga nabigyan. ‘Yung iba, hahati-hatiin. ‘Wag na dahil nasubukan na natin ito nu’ng first tranche.”

Dagdag pa niya, “Nakita n’yo naman na kahit sa social distancing ay nagsususpinde na kami ng mga tao kaya ayusin n’yo, lalo na roon sa mamimigay ng ayuda. Huwag n’yong pakialaman ‘yan. Inuulit namin dahil baka iyan pa ang ikatanggal ninyo sa puwesto o baka ikakulong n’yo na ngayon... Magmula sa mayor hanggang sa mga barangay captain."

Ipinaliwanag niya na mayroon lamang 15 araw ang mga mayor para ipamahagi ang cash na ayuda, habang 30 araw naman kung in-kind goods.

Nilinaw din ni DILG Undersecretary Jonathan Malaya ang ipinagkaiba ng cash at in-kind goods na maaaring matanggap ng mga residente sa NCR Plus Bubble.

Aniya, “Ito pong ipinamigay na relief goods ay mula po iyan sa local government... Ito pong unang wave ng ayuda na mga food items, ito po ay mula sa inyong local government unit. At ‘yun namang paparating na cash ay galing naman po sa national government… May isang ayuda from local, may isang ayuda from the national. 'Yung local ay nagsisimula na at namimigay na. ‘Yung national, magsisimula ngayong linggo. So itong mga ayudang ito, ito ‘yung ipamimigay ng pamahalaan sa panahon ng ECQ, whether may extension o wala.”

ECQ, wala nang extension — Roque

ni Mary Gutierrez Almirañez | April 5, 2021

Itinanggi ni Presidential Spokesperson Harry Roque ang posibilidad na i-extend hanggang tatlong linggo ang enhanced community quarantine (ECQ) sa NCR Plus Bubble, batay sa pahayag niya ngayong umaga, Abril 5.

Aniya, “Considering the statement of Secretary Avisado and that Congress is in recess so we will have to request for a special session for a supplemental budget, I don’t think we will have an ECQ for a third week. The model that the DOH is looking at is two weeks of ECQ and another week of MECQ.”

Nilinaw din niyang isang beses lamang maaaring matanggap ang financial assistance na P4,000 kada pamilya at ang P1,000 cash o in-kind goods para sa low-income individuals. Paliwanag pa niya, “Traditional naman po na ang pasok lang naman talaga ay Monday to Tuesday, kaya dalawang araw lang po talaga ang nawala na kita sa ating mamamayan. The P4,000 per family… that will never be enough, but the nature of ayuda is to help pass this period na hindi makakapagtrabaho. ‘Yun na po ‘yun.”

Pinatotohanan naman iyon ni Department of the Interior and Local Government (DILG) Undersecretary Bernardo Florece, "Tinanong din natin 'yan kay Secretary Wendel Avisado ng DBM, ang sabi niya, one-time lang ito kasi parang emergency relief assistance lang."

Ngayong araw ay inaasahang matatanggap na ng mga alkalde ang relief funds na inilaan sa kanilang lungsod para ipamahagi sa mga empleyadong naapektuhan ng lockdown.

Sa pagpapatuloy ng ECQ ay inaasahang mababawasan ng mahigit 4,000 ang mga nagpopositibo sa COVID-19 kada araw.

Ayon pa kay Roque, “We expect to reduce the COVID-19 cases by 4,000 a day by May 15.”