Hepe ng NBI, natagpuang patay sa opisina

ni Ronalyn Seminiano Reonico | December 8, 2020

Natagpuang may tama ng bala ng baril ang Counter-Terrorism Division chief ng National Bureau of Investigation na si Raoul Manguerra sa loob ng kanyang opisina at idineklarang dead-on-arrival sa ospital noong Lunes nang gabi, ayon sa spokesperson ng naturang ahensiya.

Pahayag ni NBI Spokesperson Deputy Director Ferdinand Lavin, "The NBI is in a deep state of mourning. We condole with the family, relatives and friends of Chief Manguerra."

Ayon sa Manila Police District Homicide Department, nakatanggap umano ng phone call ang live-in partner ni Manguerra na si Maria Rosario Bernardo mula sa NBI's Counter-Terrorism Division at ipinaalam dito na isinugod sa ospital ang opisyal dahil sa gunshot wound ngunit idineklara ring dead-on-arrival.

Ang driver umano ng biktima at isang empleyado ng NBI ang nagsugod kay Manguerra sa ospital.

Pahayag ni MPD Homicide Chief Police Captain Henry Navarro, “Nu’ng nagpunta kami sa NBI, hindi kami pinapasok kasi they are doing their internal investigation. They are allowed naman. “Whatever reason, kung ano ang nangyari, kung suicide ba ‘yan, nag-accidental firing o binaril ba ‘yan, wala pa kaming alam.”

Samantala, ipinag-utos na rin umano ni NBI Director Eric Distor ang imbestigasyon sa pagkamatay ni Manguerra at isinailalim sa lockdown ang buong lugar dahil sa insidente.

Pagpatay sa judge sa Maynila, pinaiimbestigahan ng DOJ

ni Twincle Esquierdo | November 14, 2020

Inatasan ni Justice Secretary Menardo Guevarra ang National Bureau of Investigation (NBI) na alamin ang nangyaring pagbaril at pagpatay sa isang hukom sa Maynila nitong Miyerkules.

Pinaghihinalaan nilang pinatay si Judge Maria Teresa Abadilla ng kanyang sariling clerk of court na si Atty. Amador Rebato,Jr. sa kanyang sariling opisina sa Manila Regional Trial Court Branch 45 at pagkatapos ay binaril din ng suspek ang sarili.

"Though Judge Abadilla's death appears to have arisen from an internal issue with her clerk of court, I have nonetheless directed the NBI to conduct a parallel probe, considering that the incident has implications on the personal security of our judges and justices," sabi ni Guevarra.

Inutusan naman ni Supreme Court Chief Justice Diosdado Peralta si Court Administrator Jose Midas Marquez na higpitan ang seguridad upang hindi na maulit ang nangyaring insidente.

"The passing of Judge Abadilla is indeed a big loss to the Judiciary because I personally know her to be an upright and highly competent magistrate," sabi ni Peralta.