Mga awtoridad, may payo sa mga nakatatanggap ng scam messages

ni Jasmin Joy Evangelista | November 24, 2021

Mayroong payo ang ilang awtoridad para hindi mabiktima ng text message mula sa job hiring o pautang na natatanggap ng mga mobile phone user kamakailan.

“Kapag nag-reply ka, intended target ka na. Pagka naka-receive ka ng ganyan, talagang dapat i-ignore lang," ani National Bureau of Investigation (NBI) anti-cybercrime chief Victor Lorenzo

"Pagka naka-receive ka na qualified ka sa trabaho na inaaplayan mo, hindi ka naman nag-aaplay ng trabaho, scam na ho 'yun. Or kapag may nag-text sa 'yo may napanalunan ka, hindi ka naman sumasali sa contest or any raffle, kaduda-duda po 'yun," dagdag niya.

Aniya pa, duda siya na nakuha ng scammers sa contact tracing forms ang numero ng mga nakatatanggap ng mga mensahe dahil walang pangalan ng receiver ang mga spam message.

Ayon kay Lorenzo, hirap ang mga scammer na kumuha ng personal na impormasyon sa taong nangalap ng datos.

Bukod dito, may data privacy act din para protektahan ang datos ng lahat.

May payo rin si PNP Anti-Cybercrime Group Director Police Brig. Gen. Robert Rodriguez at aniya, dapat maging maingat ang publiko at huwag agad magtitiwala sa natatanggap na spam messages.

"You should always be very careful sa online, sa mga text message, huwag agad magtiwala at huwag kaagad magbigay ng personal information lalo na 'yung bank accounts, mga OTP (one-time pin) numbers na binibigay ng banks sa atin, mga credit card po, kailangan huwag mag-online, kasi napakadelikado po," ani Rodriguez.

Ayon naman kay NPC Commissioner Raymund Liboro, posibleng sa organisadong global syndicate ito nangyari.

"Kung kayo ay nakatatanggap nito i-block niyo na. Huwag niyo nang tatangkilikin," ani Liboro.

Tiniyak naman ng Malacañang na ito ay iimbestigahan at inataasan ang NTC na gawin ang kanilang trabaho.

Higit 50 kababaihan nasagip sa prostitusyon sa Metro Manila

ni Jasmin Joy Evangelista | October 30, 2021

Nasa mahigit 50 kababaihan ang ni-rescue ng National Bureau of Investigation (NBI) mula sa prostitusyon.

Sa isang bar sa Pasay City, 48 umano ang biktima ng prostitusyon.

May nadatnan pa ang NBI anti-human trafficking division na mga aplikante para mamasukan bilang sex worker.

Inaresto at kinasuhan ang manager ng bar.

Sa isa namang motel sa Maynila, agad ni-rescue ang 3 babae matapos umanong ibugaw online.

Ayon sa report, single mother ang 3 at wala umanong mahanap na trabaho kaya tinanggap ang alok ng bugaw.

Panustos sa pamilya ang pangunahing dahilan kung bakit umano ito pinapatulan ng mga kababaihan, ayon sa NBI.

Sasailalim sa counselling ang mga nasagip na biktima.

NBI nagbabala sa mga delivery scams

ni Jasmin Joy Evangelista | October 27, 2021

Nagbabala ang National Bureau of Investigation sa publiko ukol sa dumadaming kaso ng delivery scam sa bansa.

Ayon kay NBI cybercrime division chief Victor Lorenzo, karamihan sa mga nabibiktima ng scam na ito ay mga delivery rider.

"Talagang nuisance lang, pang-iinis lang. Gusto lang makaperwisyo kasi hindi namin nakikita na kinancel," aniya sa isang panayam.

"Kapag for financial gain 'yung modus, organized 'yun. 'Yun ang tinututukan namin. Pero 'yung iba, 'yung nuisance scammers lang, 'yung pang-iinis lang, medyo hindi nasusundan 'yun kasi ayaw i-substantiate ng mga sumusulat sa amin 'yung complaints nila," dagdag niya.

May babala naman si Lorenzo sa mga taong sangkot sa fake bookings o fake orders dahil aniya, may kaukulang parusa sa identity theft na aabot mula 6 hanggang 12 taong pagkakakulong.