Towns, Lebron at Davis ganado sa pagpapasikat

ni Anthony E. Servinio @Sports | Jan. 23, 2025

Photo: Hindi maawat ang init ng mga kamay ni Anthony Davis ng Los Angeles Lakers nang tambakan ang kulelat na Washington Wizards sa NBA game kahapon. (docsports) 

Naitakas ng bisitang New York Knicks ang 99-95 panalo sa kapitbahay na Brooklyn Nets sa simula ng NBA Rivals Week kahapon sa Barclays Center. Magtatakda ang liga ng mga piling laro ngayong linggo na puno ng kasaysayan na aabangan ng mga tagahanga. 

Kumakapit ang Nets sa 90-89 lamang bago bumira ng dalawang magkasunod na buslo si Jalen Brunson para maagaw ang bentahe sa huling 2 minuto 93-90. Ipinasok ni Keon Johnson ang dalawang free throw pero nariyan muli sina Brunson at OG Anunoby para ihatid ang mga pandiin na puntos, 97-92 at isang minuto sa orasan. 

Nagtapos na may walo ng kanyang 17 puntos sa huling quarter si Brunson na tinuldukan ng dalawang paniguradong free throw na may 7 segundong nalalabi.  Nanguna sa Knicks si Karl-Anthony Towns na may 25 at 16 rebound at Anunoby na may 20. 

Ilan sa mga malaking salpukan ay ang pagkikita muli ng World Champion Boston Celtics at Los Angeles Lakers sa Biyernes. Matapos nito ay dadalaw ang Celtics sa tinalo para sa kampeonato Dallas Mavericks sa Linggo. 

Naghanda ang Lakers para sa Celtics sa 111-88 nang tambakan ang kulelat na Washington Wizards. Triple-double si LeBron James sa 21, 10 rebounds at 13 assists.  Nanguna si Anthony Davis na may 29 at 16 rebounds at umakyat ang Lakers sa 23-18 habang lagpak sa 6-36 ang Wizards. 

Tagumpay ang Portland Trail Blazers sa Miami Heat, 116-107. Bago ang laro, ginawaran ng USA Basketball ng singsing sina Bam Adebayo at kabayan Coach Erik Spoelstra para sa kanilang gold medal sa Paris 2024 Olympics. 

Samantala, maghaharap sa dalawang opisyal na laro ang Indiana Pacers at San Antonio Spurs sa Accor Arena kung saan ginanap ang Olympics sa Biyernes at Linggo. 

Magkaribal ang mga koponan buhat pa noong panahon nila sa American Basketball Association (ABA) na nagsara noong 1976.  

Harden ng L.A. Clippers bida, laro ng Lakers matamlay pa

ni Anthony E. Servinio @Sports | Jan. 15, 2025

Photo: James Harden - L.A. Clippers / FB

Gumanap ng malaking papel si Jalen Green sa 120-118 panalo ng Houston Rockets sa Memphis Grizzlies sa NBA kahapon sa Toyota Center. Ito ay sa gitna ng pagbabalik ng mga laro ng Los Angeles Lakers at tagumpay ng L.A. Clippers matapos ang malaking sunog sa lungsod sa nakalipas na mga araw na dahilan ng pagliban sa ilang laro. 

Tinumbasan ni Green ang kanyang personal na markang 42 puntos at ang huling buslo ang nagbalik ng lamang sa Rockets, 116-115, at 34 segundo sa orasan. Mula roon ay nagpasok ng tig-dalawang free throw sina Amen Thompson at Fred VanVleet upang makumpleto ang kanilang paghabol mula sa 87-100 maaga sa huling quarter. 

Nagtala ng tig-23 sina Victor Wembanyama, Devin Vassell at rookie Stephon Castle at binigo ng San Antonio Spurs ang Lakers, 126-102, sa Crypto.com Arena. Ang laro ay kasabay ng seremonya ng pagretiro ng Lakers ng numero 21 para kay alamat Michael Cooper na naglaro mula 1978 hanggang 1990 at naging bahagi ng limang kampeonato.

Sa Intuit Dome, humarurot sa pangalawang half ang Clippers upang tambakan ang Miami Heat, 109-98. Double-double sina James Harden na 26 at 11 assist at Ivica Zubac na 21 at 20 rebound habang may 29 puntos si Norman Powell. 

Impresibo si Cade Cunningham sa 36 puntos upang itulak ang bisitang Detroit Pistons sa malaking 124-119 panalo sa New York Knicks. Hindi pinapuntos ng Toronto Raptors ang Golden State Warriors sa huling dalawang minuto at bumuslo sina Chris Boucher at Ochai Agbaji upang maagaw ang 104-101 resulta. 

Lalong ibinaon ng Minnesota Timberwolves ang kulelat na Washington Wizards, 120-106, sa likod ng 41 ni Anthony Edwards. Kung maganda ang laro ni “Antman” ay patuloy naman ang hindi magandang asal kaya pinatawan siya muli ng multang $50,000 (P2.93-milyon) bunga ng  inasta sa mga reperi sa  laro kontra Memphis.  

Kawhi balik laro, Jokic ganado, Rose dinidigahan ng Strong Group

ni Anthony E. Servinio @Sports | Jan. 6, 2025

Photo: Kawhi Leonard - LA Clippers - IG

Sa loob ng 24 oras ay nag-overtime muli subalit iba ang resulta at gumanti ang bisitang Denver Nuggets sa San Antonio Spurs, 122-111, sa NBA kahapon sa Frost Bank Center. Balik-aksiyon din si Kawhi Leonard matapos lumiban sa unang 34 laro at wagi ang kanyang L.A. Clippers sa Atlanta Hawks, 131-105. 

Itinapik ni Devin Vassell ng Spurs ang sarili niyang mintis para ipilit ang overtime, 108-108, at 14 segundo sa orasan. Tiniyak ni Nikola Jokic na hindi mauulit ang nangyari sa 110-113 pagkabigo sa Spurs at mag-isang ipinasok ang unang 7  puntos ng overtime para lumayo agad ang Nuggets, 115-108.

Nagtapos si Jokic na may 9 ng kanyang 46 sa overtime na may kasamang 10 assist.  Lamang ang Spurs sa simula ng huling quarter, 92-81 at humabol ang Denver sa likod ni Michael Porter Jr. na ginawa ang 10 ng kanyang 28.

Hindi masyadong pumuntos ang tinaguriang “The Klaw” at nagtala ng 12 sa unang tatlong quarter at hindi na ginamit sa huli pero lumaki pa rin sa 124-96 ang bentahe.  Pitong iba pang kakampi ang may 10 o higit sa pangunguna ni Norman Powell na may 20 para sa kanilang ika-20 panalo sa 35 laro. 

Ibang inspirasyon ang hatid ng dating MVP Derrick Rose at tinambakan ng Chicago Bulls ang New York Knicks, 139-126.  Parehong nagbagsak ng tig-33 sina Zach LaVine at Coby White kasabay ng pormal na pagpugay kay Rose ng koponan niya mula 2008 hanggang 2016. 

Naghayag ang Bulls na ireretiro ang numero ng uniporme ni Rose na 1 sa susunod na taon at tatabihan nito ang mga naunang 4 (Jerry Sloan), 10 (Bob Love), 23 (Michael Jordan) at 33 (Scottie Pippen).  Laman ng usapan na kinukuha si Rose ng Filipino Club Strong Group Athletics sa Dubai International Championship sa katapusan ng buwan.