Pagbabakuna ng mga guro, bilisan

ni Nancy Binay - @Be Nice Tayo | October 10, 2021

Ngayong ikinasa na ng Department of Education (DepEd) na magsisimula ang pilot testing ng limitadong face-to-face classes sa Nobyembre 15 ay dapat siguruhin nitong fully vaccinated na ang staff nito bago ang nasabing petsa.

Lumalabas sa huling pagdinig ng Senate Committee on Education na 30 percent pa lamang ng DepEd personnel ang bakunado.

Nauna nang sinabi ng kagawaran na kailangang bakunado ang mga guro, staff at opisyal na lalahok sa pilot testing.

☻☻☻

Kung kaya’t hinihimok natin ang kagawaran na i-target, sa lalong madaling panahon, ang 100 percent vaccination ng personnel nito.

Kinakailangang makipag-ugnayan agad sa iba pang miyembro ng IATF upang magkaroon ng access ang ating kaguruan sa mga bakuna, lalung-lalo na at frontliners din sila.

Kung ang transport at tourism industries ay ganun kasigasig na mapabakunahan ang kanilang mga manggagawa ay sana ganun din ang DepEd.

☻☻☻

Hinihimok natin ang DepEd at iba pang kagawaran na magtayo ng special vaccination program kung saan makakapagpabakuna ang ating mga guro, lalo na iyong mga nagtuturo sa mga paaralang lalahok sa pilot testing.

Ayon sa mga eksperto, maituturing lamang na fully vaccinated ang indibidwal dalawang linggo matapos niya makumpleto ang required doses ng isang vaccine brand.

Dahil sa rekisitong ito, nakapahalagang masimulan agad ang vaccination program ng mga teaching at non-teaching staff, lalo na at mabilis lamang ang mga araw.

☻☻☻

Nakasalalay sa ating mga kamay ang ikatatagumpay ng pilot testing na ito.

Nakasalalay din sa maayos na implementasyon nito ang ekonomiya at kinabukasan ng ating bansa kung kaya’t magtulungan tayo upang maging ligtas ang pagbabalik paaralan ng ating mga anak.

☻☻☻

Paalala lamang sa lahat na manatili sa loob ng bahay, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Pantay at mabilis na pamamahagi ng bakuna laban sa COVID-19

ni Nancy Binay - @Be Nice Tayo | October 03, 2021

Kaisa tayo sa panawagan ng pantay at mabilis na pamamahagi ng bakuna laban sa COVID-19 ng mga local government units (LGUs) sa labas ng Metro Manila, lalo na sa iyong mga nakararanas ng pagtaas ng bilang ng mga kaso.

Isang dagdag-pananggalang kasi ang pagbabakuna, lalo na at kumakalat ang variants ng COVID-19.

Kung kaya’t nakikiusap tayo sa ating vaccine czar, si Secretary Carlito Galvez, na pakinggan at aksiyunan ang panawagang ito ng ating mga kababayan.

☻☻☻

Ayon sa datos ng pamahalaan, mahigit 45 milyong doses na ng bakuna ang naiturok sa ating mga kababayan, as of September 29. Katumbas ito ng mahigit 21 milyong Pilipinong fully vaccinated na, na kung saan 7.2 milyon ang nasa Metro Manila.

Ayon kay Sec. Galvez, magkakaroon ng at least 100 million vaccine doses sa katapusan ng Oktubre.

Inaasahan din na mahigit 55 milyong doses ang maituturok sa panahon na iyon.

☻☻☻

Ngunit magiging epektibo lamang ang pagbabakuna kung mayroong sapat na supply ng bakuna sa ating mga LGU, lalo pa at itinaas ang target population na dapat mabakunahan.

Kailangang mabakunahan ang 90 percent ng populasyon upang maabot natin ang tinatawag na herd immunity.

Kung kaya’t kailangang pabilisin at gawing pantay ang distribusyon ng mga bakunang ito, lalo na sa mga malalayo at geographically isolated and disadvantaged areas (GIDA).

Dapat maramdaman agad ng ating mga kababayan ang parating na supply ng bakuna at hindi lamang patuloy na maghihintay.

☻☻☻

Paalala lamang sa lahat na manatili sa loob ng bahay, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice! ☻

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Nagagamot naman ‘yan… Tuldukan ang TB sa bansa, ‘wag matakot magpa-test

ni Nancy Binay - @Be Nice Tayo | September 26, 2021

Lumabas sa pagdinig ng Senado kamakailan na bumababa ang bilang ng tests para sa tuberculosis o TB sa ating bansa.

Ayon sa DOH, mula sa 1.16 milyong pasyente na na-test noong 2018, naging isang milyon ito noong 2019, at bumaba pa sa 556,000 noong 2020.

Bumaba ito ng 59 percent nitong nakaraang taon, kung kaya’t nakababahala dahil ang Pilipinas ang may pinakamataas na TB incidence sa buong Asya.

Mayroong 554 kaso ng TB kada 100,000 na Filipino, ayon sa 2020 global TB report ng World Health Organization (WHO).

Ilan sa mga tinutukoy na dahilan ng DOH tungkol sa mababang testing numbers ay ang takot ng mga pasyente na pumunta sa mga health facilities dahil sa COVID-19, mga isyu ng mobilisasyon, at ang reassignment ng mga health worker sa COVID response.

☻☻☻

Ngayong may pandemya, mas lalong nagiging importante ang testing para sa TB.

Ayon sa mga eksperto, posibleng ma-activate ang latent TB ng pagkakaroon ng moderate to severe COVID-19.

Ang latent o dormant TB ay ‘yung kondisyong may impeksiyon ang indibidwal, ngunit inactive ang bakterya at walang sintomas.

Mayroong 27.5 percent ng mga Pinoy ang mayroong latent o dormant TB, ayon sa datos.

☻☻☻

Nagagamot ang TB, ngunit importante ang maagap na gamutan, lalo na at nangako ang Pilipinas noong 2018 sa United Nations High Level Meeting on TB na hahanapin at gagamutin ang 2.5 milyong TB patients by 2022.

Nagsisimula ito sa testing, kung kaya’t hinihimok natin ang ating mga kababayan na kung may nararamdaman ay agad nang magpatingin upang hindi na lumala pa o magdulot ng komplikasyon.

Ang Senado naman ay nagtatrabaho upang lalo pang palakasin ang Republic Act No. 10767, o ang “Comprehensive Tuberculosis Elimination Plan Act” upang lalo pang mabawasan ang kamatayan at pagdurusa ng ating mga kababayan dahil sa TB.

☻☻☻

Paalala lamang sa lahat na manatili sa loob ng bahay, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay