Quarantine classification sa Mayo, pinag-aaralan na ng MM mayors

ni Mary Gutierrez Almirañez | April 27, 2021

Magsusumite ang Metro Manila Council (MMC) ng rekomendasyon sa Inter-Agency Task Force (IATF) ngayong araw, para sa magiging quarantine classifications ng National Capital Region (NCR) sa pagtatapos ng modified enhanced community quarantine (MECQ) sa ika-30 ng Abril, batay sa naging panayam kay MMC Chairman at Parañaque City Mayor Edwin Olivarez.

Aniya, “Magkakaroon ng consensus ang Metro Manila Council kung ano po ang irerekomenda po natin sa Inter-Agency Task Force… Itong tanghali po.”

Paliwanag pa niya, “‘Di kaya mag-relax pa ng local government units sa quarantine natin dahil ang ating critical care based on the data ng ating DOH, bumaba ang ating critical care pero nasa 70 percent ang occupancy natin.”

Sa huling tala ng Department of Health (DOH), umabot na sa 444,970 ang kabuuang bilang ng COVID-19 sa National Capital Region (NCR), kung saan 6,200 na ang mga namatay.

Matatandaang ipinatupad ang lockdown sa NCR at mga kalapit nitong lalawigan upang mapababa ang kaso ng COVID-19, mula noong maging sentro ng pandemya.

Sa ngayon ay tinatayang 31,498 ang active cases sa NCR, kung saan Quezon City ang nangunguna sa mga lungsod na may pinakamataas na kaso.

Samantala, hindi naman binanggit ni Olivarez ang quarantine classification na kanilang irerekomenda sa IATF mamayang tanghali. Gayunman, iginiit niyang magiging problema ang unemployment rate kung magpapatuloy ang MECQ sa NCR.

UK, South African at P.3 variant ng COVID-19, pataas din ang cases

ni Mary Gutierrez Almirañez | April 18, 2021

Nakapagtala ang Department of Health ng mga karagdagang kaso ng UK variant, South African variant at P.3 variant ng COVID-19 mula sa mahigit 752 indibidwal na isinailalim sa test, batay sa pinakahuling datos na inilabas ng DOH, katuwang ang University of the Philippines-Philippine Genome Center (UP-PGC) at University of the Philippines-National Institutes of Health (UP-NIH).

Ayon sa ulat, 266 ang nagpositibo sa UK variant ng COVID-19, kung saan 11 sa kanila ay mga OFWs, habang ang 188 ay local cases at ang 67 nama’y bine-verify pa. Dulot nito, umabot na sa 658 ang naitalang UK variant o ang B.1.1.7 linage ng COVID-19. Sa nabanggit na kaso, 204 sa kanila ay mga gumaling, habang 8 ang pumanaw at ang 54 ay nananatiling aktibo sa sakit.

Samantala, 351 ang nagpositibo sa South African variant o B.1.351 linage. Kabilang dito ang 15 na OFW at 263 na local cases, habang bina-validate pa ang identity ng 73 na nagpositibo. Umakyat naman sa 695 ang kabuuang bilang ng nasabing variant, kung saan 4 ang namatay at ang 293 ay gumaling na.

Dalawampu’t lima rin ang nadagdag sa P.3 variant, kaya umabot na sa 148 ang naitalang kaso nito. Tinatayang 21 sa nagpositibo ay local cases, habang ang 2 nama’y OFWs at inaalam pa ang pinanggalingan ng natitira.

Sa kabuuang bilang, pumalo na sa 926,052 ang mga tinamaan ng COVID-19 sa bansa, kung saan 203,710 ang aktibong kaso, habang 706,532 ang lahat ng gumaling at 15,810 ang mga pumanaw.

Sa ngayon ay isinasailalim sa modified enhanced community quarantine (MECQ) ang NCR Plus at inaasahang bababa pa ang hawahan ng virus dahil sa ipinatutupad na health protocols at quarantine restrictions.

NCR, balik-MECQ... Covid cases, bababa na — OCTA

ni Mary Gutierrez Almirañez | April 12, 2021

Magpapatuloy na ang pagbaba ng kaso ng COVID-19 dahil sa mahigpit na quarantine restrictions na ipinapatupad sa bansa, ayon kay OCTA Research Group Member Dr. Guido David ngayong Lunes, Abril 12.

Aniya, "’Yan ‘yung inaasahan natin na dire-diretsong pagbaba. By next week baka nasa downward trend na tayo, hopefully, or next next week.”

Iginiit din niyang mula sa mahigit 10,000 na nagpopositibo kada araw ay magiging 7,000 na lamang ito at bababa pa iyon nang bababa sa pagpapatuloy ng quarantine.

"Effective naman ang ECQ kasi nakita nating bumaba ang reproduction number sa NCR... ‘Di pa masasabing nagpa-flatten na ang curve kasi 1.24 pa ang reproduction number pero may ilang lungsod sa Metro Manila na pababa na, katulad ng Pasay at Marikina, bumababa na ang cases doon."

Sa ngayon ay isinasailalim na sa modified enhanced community quarantine (MECQ) ang NCR Plus at iba pang lugar. Ibinaba na rin sa 8 pm hanggang 5 am ang curfew hours, at maging ang mga ruta ng pampublikong transportasyon ay nadagdagan na rin.

Ayon naman kay Spokesperson Harry Roque, tinatayang 3,156 hospital beds ang inaloka ng pamahalaan sa mga ospital, kung saan 64 ICU beds ang nadagdag sa critical cases, habang 2,227 regular beds para sa moderate at severe cases, at 765 isolation beds para sa mild at asymptomatic cases.

Batay sa huling tala ng Department of Health (DOH), pinakamataas na ang 55,204 na mga gumaling sa COVID-19. Samantala, 11,681 naman ang mga nagpositibo, at 201 ang pumanaw.

Kahapon din ay dumating na ang karagdagang 500,000 doses ng Sinovac COVID-19 vaccines mula sa China, na tanging bakunang gagamitin sa pagpapatuloy ng rollout.