Trapik, mas lalala — MMDA

ni Eli San Miguel - Trainee @News | December 11, 2023

Nagbabala ang Metropolitan Manila Development Authority (MMDA) sa publiko ngayong Lunes na asahan ang mas matinding trapiko sa mga lungsod habang nalalapit na ang Pasko.

Ipinahayag ni MMDA Chairman Romando "Don" Artes na mas bumabagal ang sitwasyon ng trapiko sa mga northbound at southbound lanes sa EDSA dahil sa Christmas rush.

“Bumagal 'yung daloy ng traffic (sa EDSA). Before. it's 17 kph ang southbound average speed. Ngayon ay 16 [kph] na lamang. Northbound dati. nasa 19-plus, almost 20 kph. Ngayon ay nasa 19 [kph] na lang,” saad ni Artes.

Dagdag niya, inaasahan din ang matinding trapiko sa weekend na sumasabay sa payday at sa weekend bago ang Pasko. Maaaring maging mas malala ito simula Disyembre 22, ang huling araw ng trabaho bago ang Pasko.

Ipinaliwanag ni Artes na ipinapatupad na ng ahensiya ang “no late, no absent policy” para sa lahat ng kanilang mga traffic enforcer upang makatulong sa mga motorista.

“Unang-una, in-extend na po natin 'yung ating deployment ng traffic enforcers hanggang alas-dose ng hatinggabi. Pangalawa, no absent no late policy tayo, no leave at ganu'n din po 'yung task force na Strike force na nagki-clear ng Mabuhay lanes,” sabi ni Artes.

Paglalabas ng pangalan ng traffic violator, bawal — MMDA

ni Eli San Miguel - Trainee @News | November 16, 2023

Ipinagbabawal ang paglalabas ng pangalan ng mga traffic violators sa ilalim ng Data Privacy Act, ayon kay Metropolitan Manila Development Authority (MMDA) Chairman Romando Artes ngayong Huwebes.

“Hindi po dapat binabanggit ‘yung mga pangalan ng mga nahuhuli. Sufficient na po ‘yung ma-isyuhan ng ticket na penalty… May Data Privacy Law po tayo na nagpo-protect ng information na ‘to… Kaya itong pagsasabi ng mga pangalan na ito ay clearly a violation po nitong Data Privacy [Act],” paliwanag ni Artes sa isang press conference.

Nagbigay ng pahayag ang MMDA chief sa gitna ng suspensyon ni Task Force Special Operations chief Bong Nebrija.

Ayon kay Artes, bahagi ng dahilan ng pagsuspinde kay Nebrija ay ang maling pahayag nito na nahuli ang dating Ako-Bicol party-list Representative Christopher Co at Senador Ramon Revilla sa paggamit ng EDSA bus lane.

Itinanggi nina Revilla at Co ang alegasyon. 'Di kalaunan, humingi ng paumanhin ang MMDA kina Revilla at Co.

Multa sa lalabag sa EDSA Bus Lane, itinaas

ni Eli San Miguel - Trainee @News | November 12, 2023

Nagbabala muli ang Metropolitan Manila Development Authority (MMDA) sa mga motorista laban sa pang-aabuso sa EDSA Bus Lane, kasabay ng pagpapatupad ng mas mataas na multa para sa mga lalabag simula sa Lunes, Nobyembre 13.

Ayon kay MMDA Chairman Don Artes, siya mismo ang mangunguna sa unang araw ng pagpapatupad ng Regulation No. 23-002 ng ahensya, alas-6 ng umaga upang tiyakin na mapaparusahan ang mga lalabag sa patakaran.

Ipinahayag din niya na ang hindi naaantalang daloy ng trapiko sa EDSA Bus Lane ay nagbibigay ng mas mabilis na pag-ikot ng mga bus at nagdadala ng benepisyo sa maraming commuters.

Sa ilalim ng MMDA Regulation na inaprubahan ng Metro Manila Council, ang itinaas na multa para sa EDSA bus lane violators ng parehong pampubliko at pribadong sasakyan ay:

1st Offense – P5,000

2nd Offense – P10,000 plus one month suspension of driver’s license, and required to take a road safety seminar

3rd Offense – P20,000 plus one year suspension of driver’s license

4th Offense – P30,000 plus recommendation to Land Transportation Office for revocation of driver’s license